Rozpušćenje Witaj-skupiny w Bukecach, rozestajenja wo serbske rjadownje a přichod doma Měrćina Nowaka w Njechornju běchu mjez druhim wčera temy předsydstwa Budyskeje župy.

Budyšin (SN). Čłonojo župneho předsydstwa župy „Jan Arnošt Smoler“ wuradźowachu wčera popołdnju w Serbskim domje w Budyšinje. Kaž ze zdźělenki regionalneje rěčnicy Katje Liznarjec wuchadźa, su so mjez druhim wo kubłanskej strategiji Domowiny dorozumili. Tuchwilu starosća so čłonojo gremija dla njedawneho rozpušćenja Witaj-skupiny w Bukecach. Po wotpowědnym rozsudźe nošerja AWO je sej tež županka Leńka Thomasowa zjawnje słowa jimała (Serbske Nowiny su rozprawjeli) a jasnje zwurazniła, zo so z aktualnej situaciju njewotnamakaja. Nětko su w župnym předsydstwje dale wo tym wuradźowali, kak móhli najlěpje staršim a dźěćom w kónčinach wokoło Bukec pomhać.