Sulšecy (SN/BŠe). Towarstwo Bratrowstwo Kulowskeje wosady zhladuje na wuspěšne lěto 2024. Wo tym přeswědčić móžachu so hosćo lětnjeho swjedźenja minjenu sobotu w Sulšecach, hdźež dožiwichu přitomni premjeru dźěćaceho dźiwadła. Loni su so dźěći jedyn kónc tydźenja w Kulowje a Sulšecach z bajkami a bajemi rozestajeli. Pod nawodom předsydki towarstwa Sonje Hrjehorjoweje, Susan Domanjoweje a Křesćana Schrö­tera su cyłkownje sydom dźěći tři tematiske wobłuki wupytali, kruchi nadźěłali a nazwučowali. Woni wěnowachu so připołdnicy, lišce a wjelkej kaž tež Krabatej. Wobsah su trochu modernizowali“, Sonja Hrjehorjowa rozkładźe. Zaměr dźěćaceje dźiwadłoweje skupiny je, so jónu wob tydźeń zetkać a wšelke inscenacije nazwučować. Dalši zajimcy su lubje witani. „Tohorunja chcemy so prěni króć na šulerskim swětowym dnju dźiwadła w Budyšinje wobdźělić.“