Lěto bě za Domowinu, zastupjerku serbskich zajimow, jara turbulentne. Komunalne a europske wólby, kaž tež wólby do krajneju sejmow Sakskeje a Braniborskeje běchu jedne ćežišćo politiskeho dźěła třěšneho zwjazka.

Budyšin (SN/BŠe). W swojim prócowanju wokoło wólbow krajneju sejmow Braniborskeje a Sakskeje je Domowina Serbow namołwjała, prašenja za wólbne kopolaki zapodać, kotrež je potom zastupjerjam demokratiskich stronow dale sposrědkowała. Dale je w Hornjej a Delnjej Łužicy wólbne forumy přewjedła. W dalšich rozmołwach je zamołwitym wšelakich politiskich stronow w Braniborskej a Sakskej naležnosće serbskeho ludu sposrědkowała. Wuspěch tutych prócowanjow je, zo buchu serbske zajimy w koaliciskimaj zrěčenjomaj Braniborskeje a Sakskeje wobkedźbowane, kaž na přikład zaručenje financowanja Załožby za serbski lud abo připowědźene zakótwjenje sorabistiki na BTU Choćebuz-Zły Komorow.