Drježdźany (SN). Na přeprošenje wulkopósłanca Čěskeje republiki Jiříja Čisteckeho wobdźěli so předsyda Domowiny Dawid Statnik minjenu srjedu na při­jeću w Drježdźanach. To běše prěni ­wopyt wulkopósłanca w Sakskej, na ­kotrymž so dohromady dźewjeć zastupjerjow z hospodarstwa, politiki a wědomosće wobdźěli. Wot lońšeho 23. oktobra je Jiří Čistecký społnomócnjeny wulkopósłanc Čěskeje w Němskej.

Dołholětne serbsko-čěske styki su Serbam na mnohich polach wužitne. Tak spěchuje Čěska na přikład jedne wučerske městno za wuwučowanje čěšćiny na serbskich šulach. We woso­binskej rozmołwje z wulkopósłancom pokaza předsyda Dawid Statnik na ­wažnosć Łužiskeho seminara w Praze jako sydło Towarstwa přećelow Serbow a Sakskeho zastupnistwa a dźakowaše so wulkopósłancej zastupujo za podpěru Čěskeje. Njebě to prěnje zetkanje wulkopósłanca ze Serbami. W swojej něhdyšej funkciji jako referent wonkowneho ministerstwa je Jiří Čistecký tehdyšeho čěskeho wonkowneho mi­nistra Karela Schwarzenberga w lěće 2012 na wopyće w Budyšinje přewodźał.