Mjenje wolerjow hač 2018, zwadny kandidat nětko w kruhu zapósłancow

Njebjelčicy (SN/mb). W přestawce sydachu běrny z twarohom a lanym wolijom a kisałe kórki, doniž wólbna komisija sobotu w Njebjelčan Bjesadźe po štyrjoch hodźinach wuličenja a wuhódnoćenja wuslědki druhich wólbow Serbskeho sejma njeprezentowaše: 1 006 wosobow je so jako wolerjow registrować dało (2018: 1 282), 762 wólbnych listow (2018: 908) je dóšło, z nich bě 738 hłosowanskich cedlkow płaćiwych, štož je porno 828 na prěnich wólbach wo 10,9 procentow mjenje.

Mjez kandidatami z Hornjeje Łužicy docpě Hajko Kozel najwjac hłosow: 252 (2018: 245), Tomaš Čornak je z 233 hłosami (2018: 295) na druhim městnje. Jimaj sćěhuja dr. Měrćin Krawc z 210 hłosami (2018: 133), nowy kandidat dr. Hagen Domaška (183 hłosow), Ignac Wjesela z 167 hłosami (2018: 272) a Aneta Zahrodnikowa z 115 hłosami (2018: 142). Dalšej nowaj kandidataj dr. Stanisław Nawka a Jakub Čornak dóstaštaj 112 resp. 110 hłosow. Zapósłanc dr. Tomaš Wornar docpě 102 hłosaj (2018: 99).