Župne předsydstwo je so konstituowało a Michaela Apela wuzwoliło

Choćebuz (SN/mb). Najwjetša župa ma noweho župana: Předsydstwo župy Delnja Łužica je wčera nawječor w Choćebuskim Serbskim domje na swojim konstituowacym posedźenju z 11 hłosami wot 12 přitomnych Michaela Apela wuzwoliło. Na njedawnej hłownej a wólbnej zhromadźiznje župy njeje so žadyn kandidat namakał. 62lětny rodźeny Choćebužan pochadźa ze swójby bjez serbskich korjenjow, je tež čłon braniborskeje rady za naležnosće Serbow a jeje kulturnopolitiski rěčnik. Apel je so zahe ze serbskim žiwjenjom regiona zeznajomił, tež jako wuměłski nawoda drastoweho towarstwa „Pśěza“.