Domowina hotuje so na hłownu zhromadźiznu sobotu w Budyšinje

Budyšin (SN/MG). Zarjad Domowiny kaž tež čłonske towarstwa třěšneho zwjazka mějachu w poslednich dnjach a tydźenjach wulki dypk na swojej to-do-lisćinje: hłownu a wólbnu zhromadźiznu. Sobotu přewjedu 23. rjadnu hłownu zhromadźiznu na žurli Serbskeho ludoweho ansambla. Ale kak wona poprawom funguje, tuta hłowna zhromadźizna, a što stawa so w nimale wosom hodźinach, kotrež delegatki a delegaća wuradźuja?

Madlena Di Sarnowa je referentka Domowiny za naležnosće třěšneho zwjazka a jako tajka sobu tež za organizaciju „hłowneje“ zamołwita. Wona wě, zo schadźuje so towarstwa třěšneho zwjazka na hłownu zhromadźiznu w normalnym padźe kóžde druhe lěto. Kóžde štwórte lěto su wólby. Lětsa skónči so wólbna perioda zwjazkoweho předsydstwa, předsydy a městopředsydow. Tohodla je jedyn z najwažnišich nadawkow lětušeje zhromadźizny wuzwolenje noweho nawoda za Domowinu.