Na hłownej zhromadźiznje Domowiny přichodnu sobotu wuzwola delegaća nowu zestawu gremija
Beno Bělk
staroba: 69 lět
powołanje: žurnalist/rozhłosownik, wuměnkar
towarstwo: Zwjazk serbskich spěwarskich towarstwow
Kak dołho sće hižo čłon zwjazkoweho předsydstwa?
Sym wot lěta 2021 čłon.
Sće aktiwny w dalšich towarstwach?
Sym čłon chóra Meja a sportoweho towarstwa ST 1922 Radwor.
Čehodla chceće so w Zwjazkowym předsydstwje Domowiny angažować?
Serbskosć mojeje domizny mi jara na wutrobje leži. W Domowinje mam dobru móžnosć sobu přemyslować a wo tym rozsudźeć, kak hodźeli so wšelake naležnosće na dobro Serbow rozrisać. Nochcu jenož přihladować.
Što su po wašim měnjenju najwažniše temy serbskeho ludu?
Móžno, zo budu nas w přichodnym času mjeńše horncy spěchowanskich pjenjez zaběrać. W hóršim padźe snano tež změna serbskeje struktury. Při wšěm pak kedźbujmy zhromadnje na to, zo wostanje woprawdźita dwurěčnosć w zjawnosći prezentna. Za to trjebamy sebjewědomych Serbow runje tak kaž Němcow, kotřiž so za nas zasadźuja.
