Bórze politiske zemjerženje?
Z prof. Wernerom Patzeltom (71), najznaćišim a najzwadnišim politologu zašłych lětdźesatkow w Sakskej, je so Marcel Brauman wo wuhladach w zwisku z lětušimi wólbami krajneho sejma rozmołwjał.
Po aktualnych woprašowanjach je bjezdwěla móžno, zo AfD a BSW zhromadnje wjace hač połojcu mandatow w přichodnym Sakskim krajnym sejmje dóstanjetej – što woznamjenja to za stabilitu našeho zwjazkoweho kraja?
W. Patzelt: Nad němskim zwjazkowym krajom, kiž ma wobmjezowane kompetency a podleža wobšěrnym zakonjam, móžeš tež z kompetentnym zarjadniskim jednanjom knježić. Potajkim njeměli móžneje instability krajneho knježerstwa dla hnydom instabilitu cyłeho kraja wočakować. Přikładaj za tajku situaciju stej Italska abo Belgiska.
Njeby so CDU potom při wuzwolenju přichodneho koaliciskeho partnera roztorhnyła: AfD jako partnera wuzamkuje, ale koalicija ze stronu Sahry Wagenknecht je najskerje mnohim čłonam CDU tež njepředstajomna …
„Swět filmoweje hudźby“
W Drježdźanach wotměwa so tuchwilu Palaisowe lěćo. Na nim wustupi dźensa wječor 20 hodź., w Ostra-Domje Serbski ludowy ansambl (SLA). Liza-Marija Cyžec je so z rěčnikom SLA Stefanom Cušku, rozmołwjała.
Palaisowe lěćo je kruty wobstatk Drježdźanskeho kulturneho žiwjenja. Wo čim wuhotowarjam festiwala scyła dźe?
S. Cuška: Festiwal pod hołym njebjom skići pisany wuměłski program, z poskitkami, kotrež sahaja wot kultury hač ke kubłanju, z čitanjemi, wuměłstwowymi wustajeńcami kaž tež koncertami klasiskeje a načasneje hudźby.
SLA so wospjet na festiwalu wobdźěli. Što wopytowarjam poskićiće?
S. Cuška: Publikum dožiwi na Palaisowym lěću koncertnu galu z hudźbnymi titulemi filmow, musicalow a kina na temu „Swět filmoweje hudźby“. Přihladowarjow překwapimy ze słuchanskim dopominanjom na njezapomnitych rjekow Hollywooda a Broadwaya. Forrest Gump, James Bond, Titanic – wšitko je pódla! Budźe to wulki dyrdomdej. Dźe wo dramu, romantiku a sciencefiction. Potajkim mamy poskitk za kóždeho.
Sće rjekł, zo budźe to koncertna gala. Na čo smědźa so wopytowarjo wjeselić?
Přićahliwosć zwyšić
Dźensa je sakski kultusowy minister Christian Piwarz (CDU) zakładnu šulu w Malešecach wopytał a tam něhdźe sydom milionow eurow „ćežki“ šek přepodał. Milan Pawlik je so z Malešanskim wjesnjanostu Matthiasom Seidelom (CDU) rozmołwjał.
Kak zhladujeće jako wjesnjanosta na spěchowanje zakładneje šule we Wašej gmejnje?
M. Seidel: Nad schwalenej financnej podpěru so wězo jara wjeselu. Wěm, kak požadane tute srědki mjez sakskimi šulemi su a kak dołha lisćina požadarjow lěto wob lěto je, wšako je naša gmejna nošer zakładneje šule.
Jako zamołwići gmejny sće hižo dołho planowali, stejnišći wyšeje šule w Malešecach a zakładneje šule w Barće mjez sobu wuměnić. Je tutón fakt schwalenje srědkow wowliwował?
Dušacy kašel – trajacy problem
W Sakskej přiběraja pady dušaceho kašela w poslednich lětach masiwnje, wosebje pola dźěći a młodostnych. Wo přičinach, rozrisanjach a problemach je so Maximilian Gruber ze serbskej dźěćacej lěkarku Jadwigu Wałdźinej rozmołwjał.
Tuchwilu je w Sakskej 663 wosobow na dušacy kašel schorjenych. To je wo wjele wjace hač loni w samsnym času. Na čim to zaleži?
J. Wałdźina: Smy tuchwilu generelnje jara chorowaći, wšako je korona swoje slědy zawostajiła. Wšelakore chorosće howrja tuchwilu paralelnje a tuž njeje naš imunitny system cyle tak fit. W najlěpšim padźe njezačuja inficěrowani swoje infekcije přejara, hdyž su šćěpjeni. Přiznać dyrbju, zo njeje, wosebje za młodostnych a dorosćenych, přelochko dušacy kašel zwěsćić, dokelž tukaja mnozy ludźo spočatnje skerje na druhu infekciju. Pola dźěći je to lóšo, dokelž nimaja prosće telko chorosćow. Problematiska pak chorosć w dźensnišim času njeje. Je to jenož hišće chorosć, kotraž so spěšnje rozpřestrěwa. Kóždy čłowjek móže wjacore razy w swojim žiwjenju na njej schorjeć, to je zakładny problem.
Njewidźa, ale tola widźa
Lilo Nöske přewodźa studentow Choćebuskeje uniwersity při tym, sej rumy a w nich skutkowace zwuki wotkryć. Milenka Rječcyna je so z architektku rozmołwjała.
Što wjedźe Was do Łužicy?
Lilo Nöske: Zhromadnje z Adrianom Dorschnerom, kiž je hóstny profesor na BTU w Choćebuzu a swojim kolegu Zeno Schnelle, zbližimy studentam architektury mjez druhim poměr mjez rumami a w nich skutkowacymi zwukami.
Sće podłu Jawory pućowali a sej statoki w Pěskecach a Njebjelčicami wotkryli. Što su Wam wone sposrědkowali?
Lilo Nöske: Wjesce a statoki dopominaja mje prawdźepodobnje na wjes w Nižej Bayerskej, w kotrejž bydlu. To zwisuje z wjesnej atmosferu ale tež ze zaćišćom, zo poskića wuskosć mjez wsami cyle wosebitu zhromadnosć. To je w městach cyle hinak, štož tež w Choćebuzu nazhonjam.
Kotre zapopadnjene abo nazhonjene zwuki su Was wosebje narěčeli?
Niske płaćizny su problem
Tuchwilu je zaso čas za žně žita. Tak tež pola Sorabije w Róžeńće. Płaćizny za žito pak dale spaduja. Za wotrjadnika produkcije pólnych płodow Clemensa Hrjehorja je to problem. Z nim je so Milan Jurk rozmołwjał.
Kak wuspěšnje su waše žně lětsa?
C. Hrjehor: Na našich polach rosće róžka, pšeńca a ječmjeń. Žně su lětsa poprawom cyle wuspěšne.
Wudani so plahowanje žita scyła hišće, a hdyž, kotre?
C. Hrjehor: Problem, kiž při tym nastanje, je, zo trjeba kóždy bur na swojim polu wěsty płodoslěd. K tomu słuša plahowanje wšelakich žitow, štož ma pozitiwne wuskutki na pódu. Z tym so tež chorosće wot žita k žitej dale dać a žně pohubjeńšeć njemóža. Kóžde žito trjeba wšelake wobstejnosće za docpěće wulkeho dobytka. Tohorunja je płaćizna za žito přesnadna. Płaćizna njewotpowěduje narokej nas burow. Tomu pak njemóžemy zadźěwać, dokelž smy wotwisni wot swětowych płaćiznow.
Što dyrbi so změnić? Kak wysoko ma płaćizna za žito stupać?
C. Hrjehor: Situacija dyrbi so cyłkownje změnić. Bur ma na kóncu dnja z dobytkom domoj hić a sebi wěsty być, zo je so jeho słužba wotpowědnje zapłaćiła.
Technologije su přewšo wabjace
Matilda Šěnec ze Šunowa je so na lětušej lětnej dźěłarničce Fabmobila w Zhorjelcu wobdźěliła. Milenka Rječcyna je so ze šulerku přichodneho 8. lětnika Budyskeho Serbskeho gymnazija rozmołwjała.
Z kotreje přičiny Će Fabmobil wabi?
M. Šěnec: Sym loni dwójce na dźěłarničce Fabmobila we Běłej Wodźe a w Zhorjelcu była. Camp poskići zaběru z nowymi technologijemi. A to mje přewšo wabi. Přetož, štó to hižo wě, snadź móžu swoje nazhonjenja pozdźišo trjebać. Nimo toho je rjenje, hdyž sy z přećelemi hromadźe, kotřiž maja samsny zajim.
Na čim sy w campje dźěłała?
M. Šěnec: W srjedźišću je stało digitalne rysowanje. Smy takrjec z rysowankami wšelke poskitki campa zapopadnyli a rysowanu chroniku zhotowili. W dalšim kursu sym časnik rysowała, kotryž informacije we słowach, nic w ličbach posrědkuje. Tón smědźach sej sobu domoj wzać.
Što je će tónraz wosebje překwapiło?
Lětsa z nowym nošerjom
Budyska chórowa akademija přiwabi hižo wjacore lěta lubowarjow hudźby a spěwanja. Milenka Rječcyna je so z hudźbnym nawodu, cyrkwinskim hudźbnym direktorom na wuměnku Friedemannom Böhme rozmołwjała.
Je tomu tak, zo ma chórowa akademija noweho nošerja?
F. Böhme: Haj, tomu tak je. Lětsa chce Budyski serwisowy klub Rotary, kotrehož čłon sym, chórowu akademiju generacijow pod hesłom „Harmonija, kotraž zwjazuje“, podpěrać. Dotal běše so projekt z podpěru města Budyšin we wobłuku Łužiskeho hudźbneho lěća wotměł.
Kotre dalše nowinki na zajimcow čakaja?
F. Böhme: Mam nadźiju, zo so prawje wjele spěwarkow a spěwarjow přizjewi. Wšako wobroćamy so na žony a muži wšitkich generacijow. Akademija je na to wusměrjena, ludźi wšelkich starobnych skupin z pomocu uniwerselneje rěče hudźby zjednoćić. To stanje so z intensiwnym hudźbnym dalekubłanjom a zhromadnym dožiwjenjom.
Što zajimcow wočakuje, kotřiž so za chórowu akademiju zajimuja?
Něšto wjace wo serbšćinje zhonić
Skupina studowacych Wysokeje šule za wudźeržliwe wuwiće Eberswalde (HNEE) wuhotuje přichodnu póndźelu workshop wo „Spěchowanju serbskeje rěče w biosferowym rezerwaće Hornjołužiska hola a haty“ w Domje tysac hatow. Mjez nimi je Freya Kipping, z kotrejž je so Axel Arlt rozmołwjał.
Knjeni Kipping, kak sće na temu workshopa přišli?
F. Kipping: To je so stało we wobłuku modula „transformacija wudźeržliwosće w teoriji a praksy“ našeho masteroweho studijneho předmjeta wudźeržliwe regionalne wuwiće. Wobswětowe kubłanje je jedne ćežišćo při tym. Zhromadne dźěło HNEE z biosferowym rezerwatom hižo někotre lěta traje. Zarjadnistwo w Stróži je za lětuši projekt studowacych někotre temy namjetowało. Hromadźe ze štyrjomi komilitonkami smy so za předmjet w zwisku ze serbšćinu rozsudźili.
Što sće w přihotach hižo rešeršowali?
Skrótšenjam zadźěwać
Prěni raz přebywaše nowy intendant MDR Ralf Ludwig póndźelu w Serbskim domje kaž tež w Budyskim serbskim studiju MDR. Bjarnat Cyž, jenički zastupjer Serbow w rozhłosowej radźe MDR, je jeho přewodźował. Milan Pawlik je so z nim rozmołwjał.
Kak „wotewrjenej wuši“ maja zastupjerjo rozhłosoweje rady za serbske naležnosće?
B. Cyž: „Wotewrjenej wuši“ za serbske naležnosće dyrbiš sej stworić. Gremij je wulki, wšako wusyła sćelak w třoch wuchodnych zwjazkowych krajach. Dohromady 49 čłonow zastupuje najwšelakoriše strony a towaršnostne organizacije z tutych krajow. Za wuspěch mam, zo smy po 30 lětach politiskeho wojowanja zaručili, zo maja Serbja kruty mandat w rozhłosowej radźe.
Kak je k wopytej intendanta MDR Ralfa Ludwiga dóšło?
