Serbskemu kulturnemu turizmej přistupili
Turjej (HA/SN). Po tym zo bě so předsydstwo župy Delnja Łužica hižo dwójce z tym zaběrało přistupić towarstwu Serbski kulturny turizm, su tole wčera zwoprawdźili. Na posedźenju w Turjejskim gmejnskim domje čłonojo předsydstwa wobzamknychu, zo přichodnje w towarstwje sobu dźěłaja. Při tym dachu so wot mysle wodźić, zo móža nětko do turistiskeho dźěła w Delnjej Łužicy kulturu, rěč, tradicije a stawizny Serbow lěpje zapřijeć. Nimo toho spjelni předsydstwo dwě próstwje Choćebuskeho měšćanskeho zarjadnistwa: Župa sćele přichodnje swojeho zastupnika do wokrjesneje šulskeje přirady w Choćebuzu. Nimo toho chce po swojich mocach interkulturny tydźeń podpěrać, kotryž tam kónc septembra a spočatk oktobra planuja. Město chce wopytowarjam tež zarjadowanja ze serbskej tematiku poskićić.
Ani pastwa na hrodźišću dowolena njeje
Wotrow (KJu/SN). Župa „Michał Hórnik“ je sej do swojeho lětneho plana zapisała, nimo nětko hižo tradicionalnych zetkanjow wjesnych chronistow z přednoškom jich a dalšich zajimcow na wodźenja po zajimawych městnosćach w župje přeprosyć. Prěnje tajke zarjadowanje wotmě so wčera na Wotrowskim hrodźišću. Skupina dwanaće zajimcow njebě so wot njewěstych wjedrowych powěsćow wottrašić dała a přichwata k zetkanišću při Klóšterskej wodźe. Wodźenje po hrodźišću přewza wědomostnica Kamjenskeho Muzeja zapadneje Łužicy Sabine Kuhlmann. Wona rozłoži wobdźělnikam nastaće a wuwiće hrodźišća po archeologiskich a stawizniskich dopóznaćach. Tak tež domoródni někotružkuli nowosć přinawuknychu.
Župny projekt Jurjej Brězanej wěnowany
Budyšin (kl/SN). 100. posmjertne narodniny Jurja Brězana steja takrjec před durjemi. Budyskej župje „Jan Arnošt Smoler“ je to witana składnosć, wot 16. do 22. junija projektowe dny za šulerjow serbskich zakładnych šulow a šulerjow, kotřiž serbšćinu jako cuzu rěč wuknu, w Hornim Hajnku na ležownosći Jurja Brězana přewjesć. To je zhromadne předewzaće z Kamjenskej župu „Michał Hórnik“, na kotrymž wobdźěli so 250 šulerjow. Na wšelakorych stacijach maja woni tami wo žiwjenju a skutkowanju serbskeho spisowaćela zhonić. Předsydstwo Budyskeje župy bě so z tymle jubilejom a ze zarjadowanjemi k tomu na wčerawšim wuradźowanju w Budyskim Serbskim domje zaběrało.
Wažnosć kładu pak tež na wubědźowanje „Krabat dźensa – pisaj, basni, moluj“. Wone wusměrja so lětsa nazymu na serbskich šulerjow a młodostnych, kotřiž chcedźa so kreatiwnje abo literarnje z temu rozestajeć.
Hłowna zhromadźizna zwołana
Zwjazkowe předsydstwo Domowiny je 18. wólbnu hłownu zhromadźiznu Domowiny zwołało. Wona budźe 25. měrca 2017 na žurli Wuchodosakskeje lutowarnje w starym měsće Wojerec.
Budyšin (SN/at). Čłonojo zwjazkoweho předsydstwa su přihotowanske dokumenty za 18. hłownu zhromadźiznu Domowiny, tak tež naćiskaj wólbneho a jednanskeho porjada, na swojim sobotnym posedźenju w Budyskim Serbskim domje jednohłósnje schwalili. Z přitomnymi 15 sobustawami bě gremij wobzamknjenjakmany, hižo jedna wosoba mjenje pak by dźěłanjekmanosć woznamjenjała.
Na 25 lět znowazałoženja zhladuje lětsa Zwjazk serbskich ...
Za grafitijowy projekt so přizjewić
Budyšin (rw/SN). Třěšny zwjazk Serbow Domowina přeproša dypkownje do lětnjeho časa serbskich młodostnych wot 14 lět na interkulturny projekt „Krabat between us“, kotryž wotměje so w juniju a awgusće w Budyskim Kamjentnym domje. Serbscy, němscy a syriscy młodostni zaběraja so tam na kreatiwne wašnje z pomocu grafitijoweho rysowanja z historiskej a bajowej figuru Krabata, ze swójskej kulturu a wiziju wo zhromadnym Krabatowym swěće w přichodźe. Zahajenske zarjadowanje wotměje so srjedu, 1. junija, w 17 hodź. w Kamjentnym domje. Młodostni měli sej dale zaplanować přihotowanske dny w juniju, kotrež su stajnje póndźelu, a to 6., 13. a 20. junija wot 16 do 19 hodź.
Wjele noweho nazhonili
Wo wuprawje seniorow Serbskeho šulskeho towarstwa
Lětsa je tomu 25 lět, zo załoži so w Chrósćicach Serbske šulske towarstwo SŠT. Wažny stołp dźěławosće SŠT tworjachu wot wšeho spočatka wuměnkarjo. Njeboh Beno Kućank bě ideju zrodźił, přewjesć kubłanske jězby seniorow. Prěnja tajka wotmě so 1994 do Delnjeje Łužicy. Wot lěta 2000 běchu to wjacednjowske jězby. A wot lěta 2002 přewjedujemy kóžde lěto w nalěću wjacednjowsku wuprawu a nazymu dnjowy wulět.
Tačel a jeje zajimawostki
W dešću smy lětušu jězbu 26. apryla zahajili. Wokoło Lipska překwapichu nas sněhowe šwihele, a jako dojědźechmy do Weißenfelsa, prěnjeje stacije našeje wuprawy, swěćeše słónco. Tam wobhladachmy sej dom, w kotrymž je najwažniši němski komponist 17. lětstotka Heinrich Schütz (1585–1672) swoje poslednje žiwjenske lěta bydlił. Do toho bě něhdźe 40 lět w Drježdźanach jako dwórski kapałny mišter skutkował. Schütz tworješe wosebje wokalnu cyrkwinsku hudźbu a zawostaji wjace hač 500 kompozicijow.
Myto Bogumiła Šwjele spožčene
Na hłownej zhromadźiznje Maśicy Serbskeje minjeny pjatk w Choćebuskim Serbskim domje su absolwentku tamnišeho Delnjoserbskeho gymnazija z Mytom Bogumiła Šwjele wuznamjenili.
Choćebuz (HA/SN). Myto Bogumiła Šwjele, kotrež spožča Maśica Serbska młodym ludźom za wosebite zasłužby při spěchowanju delnjoserbskeje rěče a kultury, dósta lětsa Saskia Krygarojc. Wona je za maturu spisała fachowe dźěło „Wobaranje přećiwo diskriminaciji Serbow w nacistiskej Němskej na přikładźe Pawliny Krawcoweje“. Zaběrała je so ze žiwjenjom a ludowuměłskim tworjenjom serbskeje žony, kotraž bě so jako wuspěšna šwalča a wušiwarka narodneje drasty za serbstwo zasadźała. To běchu jej nacije wumjetowali a tyknychu ju 1938 do jastwa. 1941 wumrě Pawlina Krawcowa na sćěhi schorjenjow, kotrež běchu wuslědk hrózbneho časa. „Njebojazna serbska žona njeje so wot fašistiskeho mócnarstwa wottrašić dała a je přeco za serbskosć wustupowała“, praji Saskia Krygarojc při předstajenju swojeho dźěła, kotrež je tež za přinošk w Serbskej pratyji literarnje wobdźěłała.
Z dźěćimi mejski nałožk hajili
Sernjany (aha/SN). Poprawom w Sernjanach stajnje njedźelu po Božim spěću meju mjetaja. Dokelž pak by to lětsa přezahe było a tež hišće runje na dnju maćerje, stej so wjesny klub pod nawodom Rafaela Matki a młodźinski klub ze swojim agilnym předsydu Tomašom Čornakom dojednałoj, swjedźeń přepołožić na sobotu do swjatkow.
