Wjace hač połsta čłonow a hosći, mjez nimi přećelow Serbow z Čěskeje a Pólskeje, referenta społnomócnjeneje kraja za naležnosće Serbow w braniborskim ministerstwje za wědomosć, slědźenje a kulturu Měta Nowaka kaž tež předsydu Domowiny Dawida Statnika, móžeše městopředsydka Maćicy Serbskeje dr. Anja Pohončowa sobotu popołdnju na hłownu zhromadźiznu towarstwa witać.

Budyšin (SN/CoR). Ze stejišćom chce so Maćica Serbska přećiwo přeměstnjenju Budyskeje Serbskeje kulturneje informacije ze Serbskeho domu do Röhrscheidtoweje bašty SLA wuprajić. Wotpowědny list ma předsyda Jurij Łušćanski radźe Załožby za serbski lud do posedźenja 4. apryla přepodać. Wón skedźbni na zrěčenje mjez Maćicu (jako bywšim mějićelom), Domowinu (jako nětčišim mějićelom) a Sakskej, hdźež rěka, zo ma so Serbski dom „jako centrum kulturneho žiwjenja Serbow“ zachować. „Nochcemy, zo stanje so wón z běrowowym domom“, podšmórny Łušćanski. Dawida Statnika chcedźa na hłownej zhromadźiznje Domowiny 25. měrca jako předsydu podpěrać. Łušćanski namołwi dorost, so na wubědźowanju wo Myta Maćicy wobdźělić.

Serbske jutrowne wiki w Budyšinje znowa kónctydźenski magnet byli

Budyšin (JK/SN). Hižo 26. raz wotměchu so kónc tydźenja w Budyskim Serbskim domje serbske jutrowne wiki. Něhdźe 2 500 wopytowarjow je na nje sobotu a wčera přichwatało, z čimž bě Spěchowanski kruh za serbsku ludowu kulturu jako wuhotowar jara spokojom.

Na chódbje prěnjeho poschoda, w foyeru druheho a wosebje na žurli pokazowachu debjerjo jutrownych jejkow z Delnjeje, srjedźneje a Hornjej Łužicy swoje wušikne dźěło. K spokojenju znajerjow a lubowarjow jejkow běchu woni ze wšitkimi znatymi debjenskimi technikami zastupjeni. Dominanca někajkeje techniki njehodźeše so zwěsćić, hačrunjež chila trend po wuprajenju debjerjow k bosěrowanju.

Chrósćicy (KJu/SN). Županka Zala Cyžowa bě kandidatow župy „Michał Hórnik“ za Zwjazkowe předsydstwo Domowiny – wjesnjanostu gmejny Chrósćicy Marka Klimana a bywšeho jednaćela Domowiny Bjarnata Cyža – na wčerawše posedźenje župneho předsydstwa w Chrósćicach přeprosyła. Zala Cyžowa tohorunja kandiduje. Kandidaća su hnydom prěni nadawk­ dóstali. Někotre lěta hižo njewotměwaja so posedźenja zwjazkoweho předsydstwa wjace na teritoriju župy „Michał Hórnik“. Zo móhło župne čłonstwo kontakt z třěšnym zwjazkom hajić, je wažne tež tu na městnje posedźenja přewjesć. To měło so w nowej wólbnej periodźe změnić.

Župne předsydstwo schwali wčera dźěłowy plan za lěto 2017. Štyri ćežišća su dźěći, młodźina a swójby; rěč, kultura stawizny; Domowinske skupiny, towarstwa, swjedźenje a přećelske poćahi do Pólskeje. Wjetše a mjeńše projekty měrja so na čłonstwo kaž tež na dalšich zajimcow na teritoriju župy. Župa planuje dale projektaj za wyšej šuli Ralbicy a Worklecy w Hornim Hajnku. Chcedźa so tematisce z knihomaj Jurja Brězana „Naš wuj z Ameriki“­ a „Stary nan“ zaběrać.

Wojerecy (SN). Swoje namjety nastupajo kandidatow za nowe Zwjazkowe předsydstwo Domowiny su nimo župy Delnja Łužica wšitke towarstwa a župy zapodali. To zwěsći prezidij Domowiny na swojim wčerawšim posedźenju we Wojerecach, kaž předsyda Dawid Statnik zdźěli. Župa Delnja Łužica kandidatow jutře na hłownej zhromadźiznje w Turjeju pomjenuje.

Z přihotami 18. hłowneje zhromadźizny Domowiny su so čłonojo prezidija wčera wobšěrnje zaběrali. Trěbne su hišće namjety za rewizijny kaž změrcowski wuběrk třěšneho zwjazka. Za to kaž tež za dźěłakmanosć hłowneje zhromadźi­zny trěbnej redakcisku a wólbnu komisiju proša čłonske towarstwa a župy wo zwólniwych Domowinjanow. Čłonojo prezidija delego­wachu Serbsku rejowansku skupinu Smjerdźaca na folklorny festiwal, kotryž wotměje so w bołharskim Burgasu. Dale podpěruje Domowina kulturnu wuměnu Delnjoserbskeho dźěćaceho a młodźinskeho ansambla ze spěwnym ćělesom Southend-Boys-and-Girls-Choir z Jendźelskeje a wuměnu Krabatoweho towarstwa z turistiskim zwjazkom Vigred Metlika w Słowjenskej.