Choćebuz (SN/MiR). Strowota a strowotniske zastaranje přichoda běštej temje 2. łužiskeje fachoweje konferency w Kulturnej fabrice w Schönbachu njedaloko Lubija. Na zarjadowanju Syće strowa Łužica wobdźěli so něhdźe 80 zajimcow, kotřiž so z fachowcami z wědomosće a praksy do rozmołwy dachu. Fachowe nastorki za to daštaj mjez druhim projektowy koordinator za medicinske zastaranje w Zhorjelskim wokrjesu Markus Cording kaž tež prof. dr. Kristina Barczikowa, nawodnica projekta ZukunftAlter, spěchowaneho wot zwjazkoweho ministerstwa za slědźenje, technologiju a swětnišćowe lětarstwo (BMFTR). Zhromadnje z nimaj nazběrachu wobdźělnicy nowe ideje a nadźěłachu sej nowe perspektiwy.

36. filmowy festiwal su wčera, wutoru, w Choćebuzu zahajili. Hač do přichodneje póndźele pokazaja dohromady 147 filmow z 43 krajow, organizaciski team mjezynarodneho­ festiwala zdźěli. Tež serbske wobsahi so jewja. Tak pokazaja na přikład­ wurězki z filmow, kotrež leža w Serbskim kulturnym archiwje. Na swjatočnym­ wotewrjenju, kotrež je mjez Serbami derje znaty moderator delnjoserbskeho­ telewizijneho programa Łužyca Christian Matthée (naprawo) moderěrował­, pokazachu letiski film Escape Net. Tež Choćebuski wyši měšćanosta Tobias Schick (nalěwo) bě mjez hosćimi. Foto: FFC/Marthe Gärtner

TSV Połčnica –SJ Njebjelčicy 4:1 (1:0)zestawa hosći: Weclich – Hanuza, Hrjehor (86. Herrmann), Korjeńk, Wjerš, Marticke (75. R. Čornak), Krawčik, Rudolf, Wjacławk, Zarjeńk (75. Lehmann), PlaettnerTež hdyž běchu Njebjelčenjo derje do sezony startowali, steješe pola njeporaženych Połčničanow sydom dypkow wjace na dypkowym konće. Tuž bě hižo do dypkoweje hry jasne, zo budźe to pola načolnika tabulki najćeši duel za Njebjelčanskich hrajerjow.Hosćićeljo wot wšeho spočatka pokazachu, zo běchu jako zestupnik a načolnik tabulki faworit. Přiwšěm hosćo najprjedy jara derje sobu dźeržachu. Defensiwnje nastajene mustwo trenarja Daniela Pohlinga měješe sylnu ofensiwu hosćićelow derje pod kontrolu. Tež doprědka so SJN přeco zaso zwaži. Dźakowano spěšnym wonkownym hrajerjam nastachu dobre šansy, kotrež pak wostachu njewužite. Prěnje wrota hry docpěchu tuž hosćićeljo. Róžk suny so płonje přez šěsnatku, skoči njezbožownje do nohi Jonasa Krawčika a wottam dale k 0:1 (36.) do wrotow. ...

Wosom studowacych Techniskeje uniwersity w Liberecu je sej dźensa zhromadnje ze swojim docentom prof. Petrom Kaletu (srjedźa w čerwjenej kapje) na studijnu jězbu do Budyšina dojěło, zo bychu wjace wo Łužicy a Serbach zhonili. Mjez druhim wopytachu Serbski institut a Serbski dom. Foto: SN/Bojan Benić

Serbsce a němsce wotnětka ludźi do Łaza witaja. Na fasadźe twarjenja, w kotrymž matej wudźerske kaž tež domizniske a kulturne towarstwo swój domicil, skedźbnja pisany wobraz na wosebitosće regiona. Financowali su projekt z pomocu komunalneje pawšale Sakskeje za serbskosć. Wuměłc Karsten von Wing bě wobraz stworił. Wjesnjanosta Thomas Leberecht a předsyda domizniskeho­ towarstwa Heiko Keller (wotlěwa) so nad rjanej ideju wjeselitaj. Foto: Andreas Kirschke

Na Wojerowskej zakładnej šuli „Handrij Zejler“ dyrbi dźesać šulerjow, kotřiž su dotal jako skupina serbšćinu wuknyli, wotnětka w druhej rjadowni dale wuknyć.

Marek Krawc rozprawja wo aktualnje rozjimanych temach w ČěskejPraha. Po ćahańcy wo financowanje zjawno-prawniskeho čěskeho rozhłosa su připosłucharjo a přihladowarjo wčera podarmo na swoje zwučene wusyłanja čakali. Přistajeni a swobodni sobudźěłaćerjo rozhłosa su mjenujcy stawkowali. Tak drje móžachu Češa zakładne powěsće hladać a słuchać, tamne aktualne programy pak njebuchu wusyłane a tež online nańdźechu ludźo jenož přinoški z archiwa. Iniciatiwa „Veřejnoprávně“ (Zjawno-prawnisce) rozjasni krótko do wosmich, do dwanaćich a wječor do šesćich přičiny stawka.Wjetšina rozhłosownikow radija a telewizije běše so za protest wuprajiła. Zwjazk europskich nowinarjow (EFJ) kaž tež Zwjazk mjezynarodnych nowinarjow (IFJ) wozjewištej póndźelu, zo podpěrujetej akciju přistajenych Čěskeje telewizije a Čěskeho rozhłosa. Tak steješe stawkowacym wjace hač 30 mjezynarodnych a narodnych nowinarskich zwjazkow a orga­nizacijow poboku.