Serbscy burja wužiwaja słónčne dny za žně a přihot role
Njeswačidło/Chrósćicy/Miłoćicy. (StŠ/SN) Mnohim, kotřiž tele dny po Łužicy jědu, drje napadnje, zo je na tudyšich polach a łukach hišće tójšto pohiba. Mjeztym zo tu hišće raz trawu syku, žněja druhdźe kukuricu a zaso druhdźe přihotuja rolu hižo za nowe lěto. „Smy wčera prěni dźeń w kukuricy byli. Dohromady mamy ju na něhdźe 180 hektarach pola nas kołowokoło Njeswačidła a Hory, ale tež na polach we Wulkich Zdźarach kaž tež wokoło Wotrowa a Jawory. Myslu sej, zo budźemy skoro cyły měsac kukuricu žnjeć a ju sem do zawoda do Njeswačidła zwozyć. Tule potom małe žołte zornjatka sušimy“, Achim Rjeda rozkładuje.
Něhdźe 60 sobustawow chóroweje akademije Rotarycluba Budyšin je so njedawno na cyłodnjowskej probje w rumnosćach Serbskeho ludoweho ansambla (SLA) wobdźěliło. Chór přihotuje so na beneficny koncert, kotryž wuhotuje tule njedźelu w Budyskej Michałskej cyrkwi. Pod nawodom Friedemanna Böhme zaklinča wot 17 hodź. zynki z repertoira Marc-Antoine Charpentiera, Wolfganga Amadeusa Mozarta a Korle Awgusta Kocora. Spěwarjow a spěwarki přewodźa orchester SLA. Romy Petrick, Maria Untchowa, Marlen Herzog, Mikołaj Walerych a Clemens Heidrich chór solistisce podpěraja. Foto: Julius Paška
Po tym zo bě druhe wolejbulowe mustwo holcow Viktorije Worklecy tydźenja 3:0 (25:11, 25:19, 25:10) přećiwo mustwu Nysa wolejs dobyło, nastupi wone nětko prěni raz w nowej hrajnej dobje doma we Worklecach. Přećiwo Ochranowskim wolejfantkam cyłk wokoło kapitanki Sary Šnablec (třeća wotlěwa, Worklecy) 0:3 (13:25, 15:25, 13:25) přěhra, přećiwo Žitawčankam pak 3:0 (25:19, 25:15, 25:12) doby. W prěnjej hrě dnja bě Josefine Wróblec najlěpša hrajerka w rjadach hosćićelkow, w druhej hrě bě to Sarah Šnablec. Přichodnej domjacej hrě změja Worklečanki sobotu, 5. decembra, wot 14 hodź. Foto: Konstantin Hrjehor
Mjenje pjenjez za sakske dźiwadła a orchestryDrježdźany/Halle (dpa/SN). Kraj Sakska chce swoje přiražki za dźiwadła, orchestry a druhe kulturne zarjadnišća znižić. Přećiwo tomu přistajeni nětko protestuja. Pod hesłom „Kultura trjeba přichod – Sakska trjeba kulturu“ su so kulturnicy wčera, póndźelu, před Semperowej operu w sakskej stolicy zešli. Krajny zwjazk Němskeho jewišćoweho towarstwa zliči něhdźe 1000 wobdźělnikow. Tež dźěłarnistwa a opozicija w krajnym sejmje su protest podpěrali.„Skrótšenja za kulturu w přichodnym dwójnym etaće knježerstwo zwoprawdźić njesmě“, rjekny předsyda krajneho zwjazka, intendant dźiwadła w Kamjenicy Christoph Dittrich. „Tu njeńdźe jenož wo jednotliwe projekty, ale skrótšenja wohrožuja strukturu, dźěłowe městna a cyłe sparty.“ Nimo toho je jasna strategija za kulturne institucije při nowelěrowanju zakonja wo kulturnym rumje trěbna.
Hačkuli njejsu wětřikec hólcy njedźelu přemócnje po Hornjej Łužicy fičeli, su w Smječkecach tola někotre zmije do njebja stupali. Tamniše wjesne towarstwo bě wobydlerjow a zajimcow na tradicionalne zmijepušćenje přeprosyło. Dohromady 600 słódnych plincow, kotrež mjeztym runje tak k podawkej słušeja kaž zmije same, su chłóšće huby při krasnym nazymskim wjedrje zjědli. Foto: Andreas Paška
Jan Wjenk z Wotrowa wupraja so w zwisku z narěču bamža Leja XIV. před zhromadźiznu UNESCO w Parisu:Nawjazujo na přednošk bamža Leja XIV. 25. septembra w Parisu, kotryž poruča wšěm ludam přemyslować a jednać, běch hnuty a njemóžach so změrować, myslo na Druhu swětowu wójnu, jako dyrbjach jako štyrilětny hólc na připójsnjenym ručnym wozu pola bura, kotryž měješe jenož hišće konja, we wójnje ćěkać. W pincy pod bróžnju smy spali a ležach na starych durjach na rěpje a neplach za schodom, a znaći z Delan jenož rózarije spěwachu.Hdyž dźensa bamž Leo XIV. ludźi namołwja, z druhimi rěčeć, myslach tež na swójby z dźěćimi a młodostnymi, kiž su wot wójnow potrjecheni. Nětko zaso započnu w bliskim Zhorjelcu, so z wojerskej techniku zaběrać, bjez zmysła.W susodstwje na Tuchorskej horje blisko Wujězda běchu atomowe brónje składowane. Tam staj sej, tak steješe w Katolskim Posole, ameriski a ruski general ruku zawdałoj a běchu brónje wotwjezli. Spominamy kóždolětnje na pokutnym dnju z małym nyšporom ...
Z Markom Šimanom, wčera znowa wolenym předsydu parlamentariskeje přirady Załožby za serbski lud, je so Marcel Brauman rozmołwjał.Połdra lěta je trało, doniž njeje přirada po spočatku wólbneje doby zaso dospołnje dźěłakmana. Je to wuraz přiběraceje dysfunkcionalnosće politiki?Ně, to ma druhe přičiny, skerje, zo su na zwjazkowej runinje priority hinak zarjadowali. Łužiski zapósłanc CDU Florian Oest pak je ćišć wukonjał, zo bychu procedere zakónčili. Wón bu na namjet CDU jako čłon přirady woleny. Jeho zastupjer je Knut Abraham (CDU). Na druheho zastupjerja – tule ma AfD prawo namjeta – njejsu so dojednali. Braniborski krajny sejm je Larsa Katzmareka (SPD) a Falka Peschela (BSW) wolił, jeju zastupjerjej staj Wolfgang Roick (SPD) a Julian Brüning (CDU). Ze Sakskeje je nimo mje Doreen Schwietzer (AfD) zaso w přiradźe, naju zastupujetaj Elaine Jenčec (CDU) a Timo Schreyer (AfD).Što budu ćežišća dźěławosće w tutej wólbnej dobje?
