Dorostowi spěwarjo z cyłeje Sakskeje howrjacy přiklesk žnjeli
Kulow (SN/bn). Pod hesłom „Wobnowjenje“ je Krajny młodźinski chór Sakskeje předwčerawšim w Kulowskej cyrkwi swj. Marije donjebjeswzaća koncert wuhotował. Za swój prěni wustup we Łužicy po dźewjeć lětach bě sej ćěleso po wšěm zdaću tójšto předewzało a sej sep sadźbow wuzwoliło, kotrymž so samo najrenoměrowaniši profesionalni spěwarjo z wulkim respektom bliža. Tomule narokej zamó chór dohromady něhdźe 40 sobuskutkowacych połnje wotpowědować a dopokaza, zo sej chětro krute kriterije přistupa podarmo nježada (SN rozprawjachu).
Prěnje koparske mustwo Sportoweho towarstwa Marijina hwězda a druhe koparske mustwo Sportoweje jednotki Chrósćicy stej sej wčera popołdnju na sportnišću w Pančicach dypkaj dźěliłoj a njerozsudnje 1:1 (1:0) hrałoj. Hru widźało je 50 přihladowarjow. W tabulce wokrjesneje ligi stej wobaj cyłkaj z wosom ličakami dale tabulkowej susodaj. Foto: Mia-Katarina Hrjehorjec
Namócne demonstracije z wulkej škoduParis (dpa/SN). Po protestach w Francoskej je prezident Emmanuel Macron wobydlerjam přilubił, zo budźe so knježerstwo z jich starosćemi zaběrać. Dokładne naprawy pak wón hišće namjetował njeje. „Knježerstwo čini wšo, štož je jemu móžno, zo bychmy centralnu temu kupneje kmanosće rozrisali. Wěm, zo sej Francozojo konkretne wuslědki žadaja a budźemy dale na tym dźěłać“, rjekny Macron wčera wječor w telewizijnej narěči.Jedna z temow masowych protestow běchu sobotu wysoke kóšty za wudawki wšědneho dnja. Tute sćěhuja tuchwilu wosebje z konflikta na Bliskim wuchodźe, rjekny Macron. Wón so w zwisku z tym na mjezynarodnej runinje za niske płaćizny ćěriwow a energije zasadźuje. Dźensa poda so na jězbu po štyrjoch krajach při Persiskim zaliwje, zo by zastaranje z energiju w Francoskej zaručił. Za protesty šulerjow a studentow ma wón zrozumjenje, Macron rjekny.
Składnostnje „Łužiskeho dnja wjelka“ su sobotu na Erlichtec dworje w Rěčicach nowu stajnu wustajeńcu wotewrili. Wona předstaja žiwjenje a stawizny wjelka w našim regionje.Rěčicy (AK/SN). Na wotewrjenje wustajeńcy bě běrow za wobswětowe kubłanje „Wjelk“ wokrjesa Zhorjelc přeprosył. Wón je zhromadnje ze Zhorjelskim wokrjesnym zarjadom za lěsnistwo, institutom za monitoring a wuslědźenje wjelkow w Němskej LUPUS a fachowym běrowom „Wjelk“ wjacore měsacy trajace předźěłanje stajneje wustajeńcy přewodźał, kotraž wot 2007 wobsteji. Nowu koncepciju je inženjerski běrow Přiroda a kubłanje Drježdźany zdźěłał. Jeho jednaćelka Claudia Naumann wuzběhny zaměr noweje přehladki: zo bychu so wosebje swójby a małe skupiny temje ze wšěmi zmysłami bližili.
Budyski krajny rada Udo Witschas (CDU) je minjeny pjatk Eliasej Kummerej wuznamjenjenje wokrjesa jako čestnohamtskemu za měsac oktober přepodał. 20lětny Budyšan organizuje sportowe zarjadowanja a młodźinske turněry a skutkuje jako wuchowanski płuwar. Wón studuje tuchwilu w pjatym semestru w Lipsku wučerstwo za wyši schodźenk za předmjetaj sport kaž tež hospodarstwo, domjacnosć a techniku (htd). Prózdninski sobudźěłaćer SN Linus Hrjehor je so z nim rozmołwjał.Sto Će motiwěruje, telko časa a energije za čestnohamtske nadawki nałožować?
