Budyšin wita přichodnej kóncaj tydźenja 512 wobdźělnikow na 26. krajne wubědźowanje „Młodźina hudźi“. Wurisanje organizuje Sakska hudźbna rada hromadźe z městom Budyšinom.

Budyšin (SN/at). „Prěni raz je Budyski Kamjentny dom hrajnišćo“, wjeseli so Torsten Tannenberg, jednaćel Sakskeje hudźbneje rady. Swojoraznej atmosferje wotpowědujo zahaji so tam marathon něhdźe 140 małych koncertow z wubědźowanjom w kategoriji drum-set (pop) pjatk, 17. měrca, w 11 hodź. Krajne finale „Młodźina hudźi“ wotmě so před dźesać lětami, 2007, hižo raz w Budyšinje. Tohodla njerěči Tannenberg jenož nastupajo Kamjentny dom wo polěpšenych wuměnjenjach; runje tak budu kafeteriju/mensu w powołanskošulskim centrumje za hospodarstwo a techniku wužiwać. Wšako je tež wokrjesna hudźbna šula tam zaměstnjena. Paletu hrajnišćow wudospołnjatej Schillerowy a Melanchthonowy gymnazij. Wo tym informowachu wuhotowarjo a podpěraćeljo dźensa we wobłuku nowinskeje rozmołwy.