Eksistenca młodeho předewzaćela je wohrožena, dokelž je serbski motiw do swojeho rjada „stari mištrojo“ zapřijał
Žonu, kotraž přećiwo njemu skorži, Gerhard Zschau ženje widźał njeje. 38lětny designer mody ze Zhorjelca potajkim scyła njewě, kajka wona wupada. Tole pak by za pohódnoćenje pada, kotryž jeho hospodarsku eksistencu wohrožuje, wažne było. Dokelž žona wojuje wo „prawo na swójski wobraz“. Twjerdźi za zakładźe wobkrućenja město přisahi, zo su ludźo z jeje přećelstwa ju loni na wobrazu w Serbskich Nowinach z motiwom t-shirta kolekcije Gerharda Zschauwa spóznali. Najebać 62 lět mjez nastaćom motiwa a lońšim wozjewjenjom. Kak je tomu dóšło, zo je twórba Hanki Krawcec nětko předmjet sudniskeho rozestajenja, kotrež je designera hižo wjac hač pjeć tysac eurow płaćiło?
