Wobdźělnicy wuprawy do wuchodneje Belgiskeje wo samozarjadnistwje zhonili a nad rěku Maas přećelske styki nawjazali

Alexander Louvet so mjerza. Fotograf a wuměłc žane zrozumjenje nima, zo je předwječor runje francosce rěčaca skupina na jazzowym koncerće w kinje městačka St. Vith wustupiła. Při rańšim piwku dźeń pozdźišo rjekny, zo je tež w Němskorěčnym zhromadźenstwje tójšto wuměłcow, kotřiž bychu wony koncert naročnje wuhotowali. „To su naše pjenjezy. Čehodla maja francosce rěčacy lěpšinu z toho měć?“, so wón praša.

Epizoda to nimale na kóncu přebytka skupiny z čłonami Serbskeho sejma a ludźimi, kotřiž so za samozarjadnistwo na dobro kulturneje a kubłanskeje awtonomije zajimuja. Woni přebywachu kónc septembra we wuchodnej Belgiskej. Epizoda pak wuwědomi, zo je tež tam wobstejnosćow, kotrež kritiku zbudźeja.