Městnosć połna dohladow do židowskeje wěry a kultury
Hižo wjace hač 70 000 ludźi je muzej Kraj biblije w Oberlichtenauwje blisko Kamjenca wopytało. Čas pandemije su zamołwići jara efektiwnje wužili a teren z tójšto nowymi elementami wobohaćili, mjez druhim z miniaturnej synagogu.
Dźesać Božich kaznjow w hebrejšćinje na dwěmaj drjewjanymaj tafličkomaj. Křinja, w kotrejž leži thora, swjate pismo Židow kaž tež porst za čitanje thory (hebrejsce: jad). Pódla steji sydomručny swěčnik – swědk bibliskeje stawizny Genezis. W pozadku krasne, we wšelakich barbach pomolowane wokno. Tutón napohlad dožiwja wopytowar Kraja biblije w Oberlichtenauwje.
