Sorabija Lipsk njeje jenož serbske studentske towarstwo, ale zdobom rada jědnatkow. Tak je to jedyn z dźewjeć cyłkow, kotrež w běhu lěta studentske póstnicy w Lipsku organizuja.

„Serbske póstnicy” su tam dołho hižo znate jako krótke, ale słódke. Z lóštnymi skečemi a wosebje dobrymi spěwami. Tež lětsa móžachu serbscy studenća hosći zbliska a zdaloka přeswědčić. „Kotwica” (Anker), woblubowana žurla za najwšelakoriše zarjadowanja, bě sobotu kopata połna, jako prošachu Sorabičenjo na program z titulom „Módry banćik”. Młodźi studenća orientowachu so na koncepće serbskeje bajki: młodemu hólcej Janej spožči so módry banćik a z tym hoberske mocy. Z nim zamóže samo lawy přewinyć, kotrež so jemu na to kłonja. Zawistna macocha Jana přeradźi a spyta jeho samo zatepić. W poslednim wokomiku lawy zakroča a Jana wumóža.