Krasne słónčne wjedro lětsa tysacy turistow do serbskich wosadow a do Budyšina wabiło
Cyrkej w Dešnje bě ćichi pjatk połna wobsadźena při tradicionalnym spěwanju chóra Łužyca. Foto: Michael HelbigHižo jutrownu sobotu pěstowachu młode žony starodawny nałožk jutrowneho spěwanja w Čornym Chołmcu. Foto: Gernot MenzelTelko hosći Hornja Łužica k jutram dołho wjac dožiwiła njebě. Jutry kaž molowane dožiwichu hosćo po cyłej kónčinje. Předewšěm běchu jutrońčku ludźo po tysacach we Łužicy po puću, zo bychu sej křižerske procesiony wobhladali. W serbskich wosadach je lětsa dohromady 1 380 křižerjow jutrownu powěsć w dźewjeć procesionach wozjewiło. Mjez nimi bě šěsć złotych jubilarow – Hans-Jürgen Korch, Joachim Werner a Clemens Brězan w Kulowskim procesionje, Pětr Domš a Chrystof Bulank we Wotrowskim procesionje kaž tež Achim Žur w Ralbičanskim procesionje. Dale witachu serbscy křižerjo w swojich rjadach dohromady 38 nowačkow a 45 slěbornych jubilarow.
Na wsach we Łužicy pěstowachu abo wozrodźichu nałožki kaž na přikład jutrowne spěwanje.
