Piwo doma abo w korčmje, wšelaki outfit na kemšach – mjez Serbami a Čechami je tójšto małkich kulturnych rozdźělow

By-li sej Serb časowu mašinu wobstarał, z njej wróćo do zymskeho semestra 2023 do Lipska mjez serbskich studentow lećał a z nimi w Centrifuze piwko pił, by najskerje slědowacu scenu dožiwił: Na konopeju sedźi črjóda Serbow w čiłej rozmołwje. Bachtajo Serbja kopańcu hladaja abo někajki wuznamny wupłód němskeje popoweje kultury – Germany’s Next Topmodel, Bur sej žonu pyta, Der Bachelor a druhe pokłady. Wosrjedź tuteje wjesołeje bobrije sedźi „typ“, kotryž je přišoł, mjelčo strowił, so sydnył a potom jednu, dwě abo tři hodźiny ničo njeprajił. Cyły čas na swojim piwje coma, hdys a hdys so njewěsće posměwknje, potom na wobrazowku abo do handyja hlada, doniž njestanje, „dobru nócku“ praji a woteńdźe. Tuta scena so prawidłownje wospjetuje. Woprawdźe, prašejće so někoho, kotryž je w tutym času w Lipsku studował a w Sorabiji aktiwny był! Hišće zajimawšo by było, tutomu „typej“ – młodemu čěskemu kadli – do mozow hladać, kotrehož jenički zaměr tehdy bě: ze Serbami so přećelić.