Wot februara 1945 hač do lětušeho nalěća bě zwisk mjez zapadnym a wuchodnym brjohom pomjezneje rěki přetorhnjeny
Štóž znaje kolesowanski puć podłu Łobja, waži sej móžnosć na druhi brjóh rěki změnić móc a na tamnej stronje dale kolesować. Někotre mosty a předewšěm wjacore zwiski přewozow to njeproblematisce zmóžnjeja. Tajkich móžnosćow při Wódrje njeje, kotraž je přewažnje pomjezna rěka mjez statomaj. Wot kónca Druheje swětoweje wójny 1945 tam přewozy lědma hišće znaja. Na srjedźnym wotrězku rěki, nimale na połojcy mjez Eisenhüttenstadtom a Frankfurtom nad Wódru, je tomu wot lětušeho nalěća hinak: Mnozy kolesowarjo-turisća na Wódro-Nysowym kolesowanskim puću a wulětnikarjo z pomjezneho regiona su ponowjeny stary přewozny zwisk přez rěku mjez němskim Aurithom a pólskim Uradom jako turistiski cil hnydom přiwzali.
