Simon Žur je wjele po puću. Runje jědźe 38lětny Serb z westfalskeho městačka Lünen na sewjero-wuchodnym kóncu Poruhrskeje domoj do Worklec. W Lünenje ma předewzaće REMONDIS swoje centralne zarjadnišćo Němskeje.

REMONDIS je tak mjenowany „global player“ hladajo na recycling wšitkich kumštnych a přirodnych maćiznow, pochadźacych z priwatneho kaž tež z industrielneho sektora. REMONDIS njeje koncern, ale dźěl swójbneho předewzaća Rethmann SE. „Zwjazanosć swójby ze swojim předewzaćom je jara wulka. 84lětny załožićel je přeco hišće aktiwnje po cyłej Europje po puću, zo by z přistajenymi do rozmołwy přišoł“, praji Simon Žur. Něhdźe 40 000 přistajenych ma předewzaće po cyłym swěće. Wobchodniske ćežišća REMONDIS su: Zběranje a recyclowanje wotpadkow, logistika a składowanje maćiznow a tworow, recycling organiskich wotpadkow a zjawna logistika. Tež předewzaće Regio Bus Hornja Łužica je dźěl logistiskeje sparty předewzaća.