Syman Pöpel rozprawja wo swojich dožiwjenjach w Georgiskej, hdźež je sej són spjelnił

Hižo dołho wabjachu mje hory Kawkaza na wuchodźe Europy. Tutón cil sej we lěćnych prózdninach spjelnich. Prjedy pak hač k tomu dóńdźe, dyrbjach krosnowanskeho přećela namakać, kiž ma tohorunja chwile a lóšt, strapacy w dowolu na so wzać. Tuž wottelefonowach dołhu lisćinu a skónčnje mi přećel z Francoskeje připraji.

Z jasnym cilom před wočomaj trenowach na kolesu swoju kondiciju a na kamjenju krosnowanje. Wulke běše to wjeselo, jako so termin bližeše. Ale tež přihot za ličakom mi čas rubješe. Knihowachmoj jeničce lět do hłowneho města Georgiskeje do Tbilissi. Tamne předewzaća kaž nóclěh, transport do wokoliny abo čary, kotrež na wjerški Kawkaza wjedu, sej wšitko samaj organizowachmoj. A runje to njebě cyle tak lochko. Wšako njenamakaš za naju cile kopicu informacijow kaž na př. za tury w Alpach.