K 200. narodninam z Dobruše pochadźaceje sobuzałožerki sakskeho Čerwjeneho křiža
Marja Simonowa, skutkujo mjez zranjenymi wojakami w Saarbrückenje„Njebočička knjeni Simonowa, kotraž je sebi w prusko-awstriskej a potom tež w němsko-francoskej wójnje w nastupanju dobreho wothladanja ranjenych a chorych wojakow wulku chwalbu dobyła, bu 23. februara w Drježdźanach z wulkej a wosebnej česću chowana, přewodźana wot wulkeje syły přewodźerjow, mjez kotrymiž běše tež wjele wojerskich wyškow a druhich wojerskich mustwow. Kašć, kotryž šěsć koni ćehnješe, běše nanajrjeńšo wupyšeny, a před nim dźěštej dwě Albertince (wothladowarce chorych), kiž na dwěmaj židźanymaj zawčkomaj wšitke te wšelake rjady a čestne znamjenja njeseštej, kotrež běše njeboha Simonowa wot němskich a wukrajnych wjerchow dóstała. Němska kejžorka bě jara rjany wěnc pósłała, tohorunja běše kralowna Carola wulki ławrjencowy wěnc na běłožidźanym zawčku spožčiła.
