Lětnja šula słowjanskich studijow

Skónčnje bě tak daloko: Njedźelu, 11. žnjenca,

nastajichmoj so z Amadeju Škodźic z busom na puć do Českich Budějovic. Běchmoj so wo stipendij lěćneje šule słowjanskich studijow požadałoj – a smój jón dósta­łoj! Dohromady bě tam wjac hač 40 wobdźělnikow ze wšelakich krajow cyłeho swěta.

Jako smój na internatnu ležownosć juhočě­ske­je uniwersity dóšłoj, naju asistentce ­Jana a Pavlína witaštej. Na druhe ranje naju słónčko budźeše. Z wokna stwički hladaš na zeleny campus uniwersity. Po nim ­wjedu šćežki za pěškow; mnozy so tu wšědnje ­z psom wuchodźuja. Na łuce pasu so kruwy, konje a stadło wowcow. Idylka wosrjedź juhočěskeho kraja.

Nowy tydźeń započa so ze zahajenskej ceremoniju. Tam předstajichu so nam lektorojo, kotřiž kóždy jednu ze štyrjoch skupinow nawjedowachu. Přizamkny so test za zwěsćenje rěčneho niwowa. Popołdnju so na prěnich wučb­nych hodźinach wobdźě­lich­moj. Po šuli podachmoj so do města, zo bychmoj Budějovice ze jich kućikami, wobchodami a zajima­wostkami zeznałoj.