Jako młoda dźiwadźelnica zaso
w Budyšinje – Katka Krygarjec
Je nazyma. Před woknami kofejownje w starym měsće Budyšina so wětřikec hólcy honja. Hdys a hdys so podešćuje. Za jednym z mnohich blidow sedźi
Katka Krygarjec. Młoda žona wosrjedź dwaceći, čerwjene włosy, zelenej woči.
Srjedź awgusta je w Němsko-Serbskim
ludowym dźiwadle hrać započinała.
„Sym so do domizny wróćiła, z jedneje bruneje dźěry do druheje”, wona smějicy powěda. Minjenych šěsć lět bě nad Baltiskim morjom bydliła, wšako je w Zinnowitzu na kupje Usedom swoje wukubłanje na statnje připóznatu dźiwadźelnicu absolwowała. Hdyž wo tym powěda, druhdy z rukomaj w powětře machajo za wotmołwami pyta, druhdy tež jenož z wočomaj, kotrejž kedźbliwje po rumje chodźitej.
