Budyšin (SN/bn). We wobłuku rjadu referatow Archiwoweho zwjazka Budyšin přednošowaše domizniski slědźer Eberhard Berndt wčera wo drje najzahubnišim stawizniskim kapitlu Hornjeje Łužicy. Pod nadpismom „Wojowanja wo Wóspork a Budyšin w aprylu 1945 – wróćohladanje po 80 lětach“ wobswětli wón poslednju fazu Druheje swětoweje wójny, zapřijawši najnowše dopóznaća na zakładźe žórłow, kotrež po jeho słowach dawno dowuslědźene njejsu. Zajim na zarjadowanju bě tak wulki, zo njewotmě so w sydarni archiwa, ale na žurli Kamjentneho domu. Přiwšěm městna njedosahachu, tójšto hosći čakaše podarmo na snano tola hišće swobodne sydadło. Łoskoćiweje tematiki dla pokaza policija prewentiwnu prezencu.