Nětko hižo na wólby serbskeje rady myslić
Podstupim (SN/at). Krajny sejm Braniborskeje podpěruje europsku iniciatiwu Minority SafePack. Wón přihłosuje jeje wuchadźišću a namołwja Europsku uniju, škit přisłušnikow narodnych a rěčnych mjeńšin ze zaměrnymi naprawami polěpšić a z nich wuchadźacu kulturnu a rěčnu mnohotnosć w EU zachować. To čitamy w nadfrakciskim wobzamknjenju – wot SPD, CDU, Lěwicy a Zwjazka 90/Zelenych zapodatym –, kotrež je krajny sejm minjeny štwórtk (SN rozprawjachu) jednohłósnje schwalił. Požadane naprawy měli so na wobłuki regionalne a mjeńšinowe rěče, kubłanje a kulturu, regionalnu politiku, wobdźělenje, runosć, awdiowizuelne medijowe słužby a dalše medialne wobsahi kaž tež regionalne spěchowanje wusměrić. Krajne knježerstwo měło iniciatiwu podpěrać a so w Zwjazku kaž tež w EU za to zasadźeć, zo so mjeńšinowe zajimy zakótwja a přesadźa.
SPD „pod wulkim ćišćom“
Berlin (dpa/SN). Strowotniski fachowc SPD Karl Lauterbach ma w koaliciskich jednanjach dale njerozrisane prašenje dwuklasoweho medicinskeho zastaranja w Němskej za přewšo wažne. „Smy w tym prašenju pod wulkim ćišćom“, rjekny wón dźensa w telewiziji ARD. Socialdemokraća chcyli přesadźić, zo so lěkarske honorary při lěkowanju kasowych a priwatnych pacientow wurunaja. Lauterbach je optimistiski, zo so SPD z CDU a CSU w tej naležnosći dźensa tola hišće dojedna. Poprawom chcychu wšitcy wobdźěleni jednanja k wutworjenju noweje wulkeje koalicije kónc tydźenja wotzamknyć. Hižo zwoprědka pak běchu dwaj přidatnej dnjej zaplanowali.
Mjeztym je předsyda durinskeje CDU Mike Mohring planowane woprašowanje čłonow SPD wo koaliciskim zrěčenju jako „njepraktikabelne“ kritizował. To by cyły proces dale dlijiło, hladajo na to, zo je Němska mjeztym dlěje hač štyri měsacy bjez knježerstwa, rjekny Mohring nowinarjam. Nowe knježerstwo dyrbjało so spěšnje wutworić.
Wulki potencial
To a tamne (05.02.18)
Chětro wopity a bjez jězbneje dowolnosće je muž w sewjerorynsko-westfalskim Hennefje na policajsku stražu přijěł, zo by za zhubjenej wosobu pytać dał. Zastojnicy čujachu alkohol, naměrichu pola 40lětneho 1,46 promilow a chcychu jeho jězbnu dowolnosć sćazać. Muž pak njeměješe žanu při sebi a chcyše z awtom zaso wotjěć. Tomu pak policisća zadźěwachu. Nětko dyrbi muž ze skóržbu jězdźenja pod wliwom alkohola dla ličić.
Z nadróžnej zawěru su policisća w delnjosakskim Nordhornje dźěsću po puću do žiwjenja pomhali. Staršej dyrbještaj jězbu z awtom do porodoweje kliniki přetorhnyć, dokelž so porod připowědźeše. Alarmowani zastojnicy na to dróhu zaraćichu. Bjezposrědnje po tym zo chorobne awto dojědźe, so dźěćko narodźi. Jemu a maćeri so derje dźe. Wobeju dowjezechu do chorownje.
Michael Kretschmer: „Mamy cyle wosebitu zamołwitosć“
Hakle něšto wjac hač měsac je nětko Michael Kretschmer (CDU) ministerski prezident Sakskeje. Tuchwilu je „nowy“ we wysokim zastojnstwje chětro požadany rozmołwny a medijowy partner. Na njeličomnych terminach dyrbi tu a tam na mnohe prašenja wobydlerjow kaž tež žurnalistow wotmołwjeć, a to k najrozdźělnišim temam. Byrnjež naslědnik Stanisława Tilicha (tohorunja CDU) chětro wjele wokoło wuši měł, je so šefredaktorej Serbskich Nowin poradźiło, prašeć so rodźeneho Zhorjelčana Kretschmera za wobydlerskej iniciatiwu Federalistiskeje unije europskich narodnych mjeńšin (FUEN) Minority SafePack, z kotrejž chcedźa zamołwići skrućenje prawow mjeńšin w Europje docpěć.
Sće iniciatiwu tele dny podpisał.
Rozprawje wo Serbach přihłosowali
Prěnja rozprawa braniborskeho knježerstwa wo połoženju serbskeho luda, kotraž bě wčera předmjet krajneho sejma w Podstupimje, wuwabi přihłosowanje ze wšěch frakcijow.
SPD rekordnje nisko
Berlin (dpa/SN). Krótko do kónca koaliciskich jednanjow je SPD w najnowšim woprašowanju sćelaka ARD w nahladnosći ludźi na runje hišće 18 procentow spadnyła. Najsnadniši to wuslědk, kotryž su hdy naměrili. Unija dóstawa dale 33 proc., AFD je so wo jedyn procent na 14 polěpšiła, Lěwica ma jědnaće (plus dwaj), FDP dźesać (plus jedyn) a Zeleni dale jědnaće proc. Tež dźěło šefa SPD Martina Schulza hódnoća ludźo tak špatnje kaž nihdy: Jenož 25 proc. (minus pjeć) je z nim hišće spokojom.
Dwě miliardźe za kubłanje
Berlin (dpa/SN). Přichodna wulka koalicija chcyła dwě miliardźe eurow za cyłodnjowske šule a za hladanje dźěći nałožić. Na to su so wobdźělnicy jednanjow w Berlinje dojednali. Nimo toho chcedźa Zakładny zakoń změnić a w nim zakótwjeny zakaz kooperacije mjez Zwjazkom a krajemi na kubłanskim polu zběhnyć. Dotal je pjenježna pomoc Zwjazka w kubłanskich naležnosćach jenož wuwzaćnje dowolena.
Tež pola BMW stawkowali
Tójšto dźěła mějachu čłonojo Techniskeho pomocneho skutka ...
Wo wjelkach rěčeli
Berlin/Hannover (dpa/SN). Wjelki w Němskej su tema tuchwilnych koaliciskich jednanjow unije a SPD. Mjez druhim rozjimachu tam nastupajo rozmnoženje rubježneho zwěrjeća „rozumny management“. Tak maja so wosebje agresiwne wjelki kontrolować, wućěrić a w nuzy tež zatřělić. To rjekny delnjosakski wobswětowy minister Olaf Lies (SPD) powěsćerni dpa. Wěstota ludźi je najwažniša. Na tamnym boku chcedźa škit domjaceho skotu z wotpowědnymi naprawami dale zesylnić.
Wobchad z wjelkami bě dźensa tež tema w zwjazkowym sejmje. FDP je naćisk zakonja zapodała, kotryž dowola wjelki třěleć. Te wšak su po europskich zakonjach dotal kruće škitane.
W Žitawje najwjace drobnoprocha
Berlin (SN/MkWj). Zwjazkowy wobswětowy zarjad je wčera wuslědk lońšeho přepytowanja wozjewił, kotrež poćahuje so na poćežowanje němskich městow z dusykowym dioksidom a drobnoprochom. Při tym su sakske města njewočakowano derje wotzamknyli. Dotal najbóle poćežowanej měsće Drježdźany a Lipsk hornju hranicu 40 mikrogramow dusykoweho dioksida w kubiknym metru powětra dodźeržitej, po tym zo běštej ju w lěće 2016 hišće jasnje překročiłoj. Z drobnoprochom najbóle poćežene město je Žitawa. Tam su loni cyłkownje 26 dnjow dnjowu přerěznu měru 50 mikrogramow procha překročili. Cyłoeuropski přerězk wučinja 35 dnjow, byrnjež Swětowa strowotniska organizacija jeničce tři dny wob lěto poručiła.
