Seehofer ma zrozumjenjeza debatu w SPD
Kiel/Mnichow (dpa/SN). Městopředsyda SPD Ralf Stegner po swójskich wuprajenjach z tym liči, zo zwjazkowy zjězd přichodnu njedźelu w Bonnje z wjetšinu za zahajenje koaliciskich jednanjow z CDU a CSU hłosuje. „Přiwšěm budźe to ćežko, dokelž mam kritiku za woprawnjenu“, rjekny schleswigsko-holsteinski krajny předsyda w Kielu. Hladajo na nowu wulku koaliciju wostawa wón dale skeptiski, kaž rjekny. W zwisku z wuslědkami sonděrowanja pak so wudani dale jednać. Dojednane polěpšenja pak su jeno zwoprawdźomne, je-li SPD w knježerstwje zastupjena, Stegner potwjerdźi.
Dobyćerjo wubědźowanja zwěsćeni
Budyšin (SN). Wosebita komisija je wčera w Budyšinje mjeztym 3. koło wubědźowanja „Rěčam přichilena komuna – Serbska rěč je žiwa“ wuhódnoćiła a dobyćerjow wuzwoliła. Cyłkownje 14 městow a gmejnow je so tónkróć na nim wobdźěliło. To je runje telko kaž w minjenymaj přeběhomaj, rjekny Marja Michałkowa, předsydka Rady za serbske naležnosće Sakskeje, našemu wječornikej. Čłonojo rady su runje tak z čłonom komisije kaž wšitcy regionalni rěčnicy Domowiny. Wubědźowanje traje mjeztym 16 lět.
Posudźowali su wobdźělnikow w třoch kategorijach: Do prěnjeje skupiny słušeja tři wobdźělene města, a do druheje pjeć gmejnow, kotrež leža wosrjedź serbskeho sydlenskeho ruma. Třeća skupina wobsteji ze šěsć dalšich dwurěčnych łužiskich komunow.
Dobyćerjow chcedźa 2. februara w Slepom mytować, kaž Marja Michałkowa připowědźi. Wona bě wubědźowanje loni w februaru zhromadnje z prezidentom Sakskeho krajneho sejma Matthiasom Rößlerom zahajiła.
„Bytostny faktor towaršnosće“
Sakski ministerski prezident Kretschmer zastupnikow cyrkwje přijał
Drježdźany (dpa/SN). Sakske krajne knježerstwo ma cyrkej za wažneho partnera w boju wo zhromadnosć w towaršnosći. Tudyši ministerski prezident Michael Kretschmer (CDU) dźakowaše so w dwuhodźinskej rozmołwje z biskopami w Sakskej aktiwnym katolskim diecezam a ewangelskej krajnej cyrkwi. Cyrkej je sylna zhromadnosć, kotraž so na najwšelakoriše wašnje na towaršnostnym wuwiću wobdźěla a tak k tomu přinošuje, zo je kraj žiwjenjahódny, Michael Kretschmer wuzběhny.
Drježdźanskaj biskopaj Heinrich Timmerevers a Carsten Rentzing rěčeštaj wo „konstruktiwnym zetkanju“ a wo „přećelnej“ rozmołwje, kotraž je dowěru do přichoda spožčiła. Rozmołwa wotmě so w sakskej statnej kencliji.
Sym podpisał, dokelž ...
... dyrbimy solidarni być z małymi ludami, kotrež trjebaja šansu, swójske naležnosće w sylnej měrje před wjetšinu zastupować móc. W europskich zrěčenjach je zakótwjene skrućenje mjeńšinowych prawow bóle wobkedźbować, tež na runinje EU. Prócowanja to hišće raz podšmórnu. Njeměli tež na serbske zajimy zabyć. Swójske wobsahi w měrje wulkich narodow poskićeć je wo tójšto wobćežniše. To měli w spěchowanskich směrnicach sylnišo wobkedźbować. Jednory přikład je wudaće knihi: Nałožena próca němskeje a serbskeje knihi je podobna, mnóstwowy nakład a cyłkowny dobytk pak chětro rozdźělnej. Při wotwobaranju tajkich njedostatkow přeju wšěm prócowarjam wjele wuspěcha.
To a tamne (16.01.18)
Konfeti budźe zakazany na lětušim póstniskim ćahu w Stuttgarće 13. februara. Hłowna přičina su wulke rjedźenske kóšty na Hrodowym naměsće, kotrež njesłuša městu, ale krajej, kaž zarjadowar ćaha informuje. Tež w druhich městach ma tajki zakaz płaćić. Karnewalisća su wězo přesłapjeni: Zanjerodźenja, kotrež nory zawostajeja, njejsu dawno tak wulke kaž silwester.
Před črijowym wobchodom w Berlinje přenocowali su wjacori zajimcy, dokelž chcychu sej dźensa na kóždy pad nowe płatowe sportowe črije kupić, kotrež płaća zdobom jako jězdźenka w podzemskej železnicy, tramwajkach a busach Berlinskich wobchadnych zawodow. Črije zhotowjerja Adidas su w stilu poćehnjenja sedłow podzemskeje zhotowjene. Předawane budźe jenož 500 eksemplarow za 180 eurow.
Žiwy poćah k Bohu
Drježdźany (B/SN). Zawodny kurs wosebitych eksercicijow z modlitwu k Bohu a Jězusej wotmě so před měsacom prěni raz w domje we Wysokich dubach. Modlić so wosrjedź přirody, začuwać ćěło a dychanje, zwjazać to z mjenom Jězu Chrysta – tele kročałki sej wobdźělnicy zbližichu a pohłubšichu je. Žiwy poćah k Bohu a ke Chrystusej spóznachu woni w mjelčenju, we wuměnje nazhonjenjow, na wšědnej Božej mši a z modlitwu.
Debata wo cyrkwinskim azylu
Lipsk (B/SN). Zwjazk a kraje chcedźa z cyrkwjemi znowa wo azylu wuradźować. To žadaše sej konferenca nutřkownych ministrow, po tym zo běchu pady cyrkwinskeho azyla minjeny čas přiběrali. Tajki azyl je „žohnowanje za prawniski stat“, podšmórny ćěkanska słužba jezuitow. Tuchwilu je w Němskej něhdźe 500 před wotsunjenjom wohroženych ćěkancow w cyrkwinskim azylu.
Mandźelstwo za wšitkich?
Bamž we Łaćonskej Americe
Rom (dpa/SN). Na swoju mjeztym šestu jězbu do Łaćonskeje Ameriki je so bamž Franciskus podał. Hłowa katolskeje cyrkwje wotleća rano z Roma do chilskeje stolicy Santiaga. Štwórtk chce dale do Peruwa lećeć. W běhu tydźeń trajaceje jězby chce so bamž z Indianami kmjena Mapuche zetkać, kotřiž wo swój kraj wojuja. W Peruwje planuja wopyt bamža w dešćikowym lěsu, hdźež chce so Franciskus sam wo ničenju pralěsa přeswědčić, štož bě wón stajnje zaso šwikał.
Lawrow kritizuje USA
Moskwa (dpa/SN). Ruski wonkowny minister Sergej Lawrow je USA wumjetował, zo mjezynarodne połoženje destabilizuja. Jako najnowši přikład mjenowaše wón dźensa w Moskwje ćišć knježerstwa prezidenta Donalda Trumpa na atomowe zrěčenje z Iranom. „Najnowše wuprajenja, kotrež su wusměrjene na zwrěšćenje zrěčenja, njepřinjesu žadyn optimizm a žanu stabilitu.“ Lawrow kritizowaše, zo je Trump wospjet z namocu a wójnu hrozył, na přikład přećiwo Sewjernej Koreji abo Afghanistanej.
Ćežke busowe njezbožo
Čłonojo Choćebuskeho měšćanskeho zwjazka Lěwicy su sobotu ...
Zeleni: Plany CDU, CSU a SPDsu „nječłowjeske“
Berlin (dpa/SN). Zeleni w Němskim zwjazkowym sejmje reaguja přesłapjeni na wuslědki sonděrowanskich rozmołwow mjez CDU, CSU a SPD k wutworjenju noweje wulkeje koalicije. „Bjez nas woni zaměry klimoweho škita dawno njespjelnja. A bjez nas so nječłowjeskosć w politice ćěkancam napřećo dale rozšěrja“, rjekny wiceprezidentka zwjazkoweho sejma Claudia Roth (Zeleni) w Berlinje. Štož běchu Zeleni we wobćežnych jednanjach k zwrěšćenej jamaiskej koaliciji z uniju a FDP runje hišće wotwobarać móhli, stanje so nětko ze „surowej woprawdźitosću“, wona kritizuje.
Wosebje šwika Roth kompromisy w migraciskej politice, kotrež su we 28stronskim dojednanju zakótwjene. „W prašenju wotsunjenja ćěkancow je so CSU ze swojej politiku kaserněrowanja škit pytacych přesadźiła.“ Wobzamknjenje w prašenju přisydlenja swójbnych je hnydom „dwójce surowe, dokelž z tuchwilnym zakazom přićahowanja pokročuja a chcedźa přichodnje najwjace tysac azyl pytacym wob měsac dowolić, do Němskeje přińć. Tele wobzamknjenja su nječłowjeske a ranja zakładne prawo na swójbu.“
Dale zajim za dźěło w Němskej
Wyše mzdy a socialne posłužby předewšěm Polakow wabja
Nürnberg (dpa/SN). Ličba pólskich staćanow, kotřiž w Němskej dźěłaja a tule dawki płaća, dale přiběra. Loni w měrcu bě jich po informacijach Zwjazkoweje agentury za dźěło w Nürnbergu něhdźe 366 400. Lěta 2012 dźěłaše 157 000 Polakow w Němskej. Rozrost je po měnjenju agentury wuslědk wotewrjenych dźěłowych wikow Europskeje unije, kotrež płaća wot lěta 2011 tež za Pólsku. Wot toho časa móža ludźo ze susodneho kraja bjez wobmjezowanja w Němskej dźěłać. Přirunujo z druhimi krajemi zaběra Pólska druhe městno. Ličba turkowskich dźěławych je hišće wjetša. W měrcu 2017 bě jich wjace hač 522 000.
Z přistupom Pólskeje k Europskej uniji lěta 2004 dožiwichu němske dźěłowe wiki rozmach. Předewšěm ludźo z pomjeznych kónčin so za dźěłom w Němskej rozhladowachu. Tole potwjerdźa tež dźěłowa agentura w braniborskim Frankfurće nad Wódru. Tam su mjeztym agenturu „Eures“ z wjacorymi wotnožkami załožili, hdźež pólskich zajimcow poradźuja. Sobudźěłaćerjo su dźěl europskeje syće, kotraž mjezu přesahowace dźěło spěchuje.
