Łužiske hody z widom na susodow
Njeswačidło (CRM/SN). Hdyž so koncerty w adwentnym času wosebje kopja, njeńdźe wo někajke wubědźowanje. Kóžde ćěleso čini po swojich móžnosćach a zamóžnosćach to najlěpše. Wot profesionalneje institucije, kaž je to Serbski ludowy ansambl, pak ludźo něšto cyle wuběrneho wočakuja. A lětušemu programej tajki predikat přisteji.
Na žurli Njeswačanskeho Knježeho hosćenca móžeštej chór a orchester Serbskeho ludoweho ansambla Budyšin minjenu njedźelu pod dirigatom Krzysztofa Świtalskeho z Choćebuza nahladnu ličbu hosći witać. Tónraz je so wuměłcam SLA zaso jónu poradźiło, nowe městno wupruwujo, zawěrno wysoku hudźbnu kulturu předstajić, kotraž so wuzběhuje a přiwšěm wočakowanjam publikuma wotpowěduje.
Wo knihach a kniharni (20.12.19)
Na proze do noweho lěta njezhladujemy jenož na to, štož smy minjene dwanaće měsacow zdokonjeli, ale měrimy so hižo na přichodne lěto. Hišće nimamy wšitke planowane knihi lěta 2019 na składźe. Dawno pak na produktach za klětu dźěłamy. Ta abo tamna knižna chłóšćenka čaka na nas hižo w prěnim kwartalu.
Dwurěčna němsko-delnjoserbska publikacija wo žiwjenju a tworjenju fotografa Thomasa Kläbera nam pokazuje, kak wurjadnje awtor žiwjenje na wsy w lětach 1968 do 2018 fotografisce dokumentuje. Wudawaćel Jürgen Maćij je wěcywustojny material zestajał, zo by nam přehlad wo skutkowanju Kläbera poskićił. Jurij Koch a Carmen Schliebe so w nowostce pjera jimataj.
Lubowarjo fotow Maćija Bulanka móža so na nowy wobrazowy zwjazk wo křižerjach „Jutry doma“ wjeselić. Impresije wot přihotow na wulki wjeršk hač k dźaknym kemšam w Róžeńće wopřijimaja něhdźe 100 fotow. Literarne teksty zwjazk wudospołnjeja.
Z hodownym Předźenakom
Pjatk je našim čitarjam dźeń z kónctydźenskej přiłohu Předźenakom. Pjatk do štwórteho adwenta je lětsa zdobom pjatk do patoržicy. Wćipnosć do wobradźenja z darami pod hodowny štom wšudźe z kóždej hodźinu přiběra. Zo bychu tež wšitcy abonenća kónctydźenskeho wudaća SN swoju lekturu k swjatym dnjam sčasom dóstali, su hodowny Předźenak kaž tež strony z postrowami a zabawu hižo dźensa našemu wječornikej připołožene.
Přejemy wam, lube čitarki a lubi čitarjo, wjele wjesela při čitanju!
Hłubin duše so dótkał
Adwentny koncert 1. serbskeje kulturneje brigady znowa zahorjenje zbudźił
Wospjet wjeselachu so sobotu do třećeje adwentneje njedźele serbscy a němscy wopytowarjo w połnje wobsadźenej Michałskej cyrkwi w Budyšinje na adwentny koncert, kiž je wšeje česće a chwalby hódny. Cyrkwinski hudźbny direktor Friedemann Böhme zamó ze swojimi chowancami wosom čisłow koncerta tak předstajić, zo drje běchu wšitcy znowa wo wysokej spěwnej kulturje ćělesa, přesahacej powšitkowne naroki na šulski chór, přeswědčeni. Tež wostatni akterojo – dźěćacy chór gymnazija, Fabienne Wjacławkec jako spěwna solistka, kantorka Michałskeje wosady Yuko Ikeda na pišćelach a Gina Hentsch jako přewodźerka na klawěrje – běchu jara derje přihotowani.
Žadyn dźeń njewobžarowała
Borbora Felberowa, nowinska rěčnica Domowiny a wosobinska referentka jeje předsydy, poda so na wuměnk
Wona njebě nihdy přećelka wulkich słowow, a přiwšěm wě słowa wušiknje sadźeć a je samo do narěčow splesć. Ze swojim dźěłom njeje so nihdy hordźiła a móže přiwšěm na něštožkuli zdokonjane zhladować. Borbora Felberowa, nowinska rěčnica Domowiny a wosobinska referentka předsydy Dawida Statnika, so kónc 2019 po 16 lětach w zastojnstwje na wuměnk poda.
Wjele lět w cuzbje
Lěta 1956 w Komorowje pola Rakec jako Borbora Wuhlerjec rodźena wotrosće w serbskim staršiskim domje, chodźeše w Rakecach do šule a maturowaše na Serbskej rozšěrjenej wyšej šuli w Budyšinje. Přizamkny so wolontariat pola tehdyšeje Noweje doby a štyri lěta trajacy studij žurnalistiki, kotryž z diplomom zakónči. 1980 nawróći so do Łužicy a dósta bydlenje w Budyskim Serbskim domje. W redakciji Noweje doby bě štyri lěta wotrjadnica za nutřkownu politiku.
Z rěču wosebity sound tworić
Druhe a publikumowe myto němsko-francosko-pólskeho rockoweho a šansonoweho festiwala towarstwa Polonica je Lena Hauptmannojc lětsa srjedź nowembra w Kölnje dobyła. Wona bě tež hižo loni na delnjoserbskej schadźowance připosłucharjow w jazzowym duwje LeDazzo ze swójskimi kompozicijemi a ze serbskimi spěwami zahoriła.
Ofensiwa w Ardennach aliěrowane wójsko wohrozyła
16. hodownika 1944 zahaji němska Wehrmachta na zapadnej fronće w Ardennach mócnu napřećiwnu ofensiwu přećiwo ameriskemu a jendźelskemu wójsku. Ardenny su horiny na sewjeru wuchodofrancoskeje prowincy Elsaskeje a zapadnje Porynskich šćěpjelowych horin (Rheinisches Schiefergebirge) w Němskej. Wone rozpřestrěwaja so přewažnje w Belgiskej a Luxemburgskej. Po hórskej krajinje ćeče rěka Maas. Na sewjeru su Ardenny 200 do 300 metrow wysoke, na juhu něhdźe 450 metrow. W južnych Wysokich Ardennach je bahnojta krajina z wulkimi lěsami. Wjedro je po wšěch Ardennach jara krute, wosebje pak w zymskim počasu.
Nowy koncept za Łužiski festiwal
Lětsa prěni raz wotměty Łužiski festiwal chcedźa dale přewjedować. Dźěłowa skupina, w kotrejž stej Braniborska a Sakska paritetisce zastupjenej, wobzamkny njedawno dale wjeducy koncept, kotryž je wuměłstwowa přechodna přirada předpołožiła.
Drježdźany (SN/CoR). „Ze srědkow Zwjazka financowany Łužiski festiwal móže so z wažnej kulturnej institucije regiona stać. Za to njeje jenož trjeba akterow z Łužicy zapřijeć. Woni dyrbja tež woprawdźitu składnosć dóstać jón sobu wuhotować. Z wobzamknjenjom kraje přesahowaceje dźěłoweje skupiny je za to zakład połoženy“, podšmórny tele dny w Drježdźanach sakska ministerka za wědomosć a wuměłstwo dr. Eva -Maria Stange.
Hudźbnje po adwenće
Čorny Chołmc (SiR/SN). Čłonojo Čornochołmčanskeho nałožkoweho towarstwa Krabat pod nawodom Larsa Deki běchu njedźelu popołdnju zajimcow do tamnišeje Marineje cyrkwje přeprosyli. Na programje stejachu znate a mjenje znate adwentne a hodowne pěsnje, kotrež njepohnuwachu jenož k připosłuchanju, ale tež k sobuspěwanju. Wjac hač 70 ludźi bě přeprošenje sćěhowało. W cyrkwi su jich dwurěčnje němsce kaž tež serbsce witali. Farar Heinrich Koch wjeseleše so nad tradiciju adwentneho koncerta, z kotrymž spěwarki a spěwarjo chóra hižo wjacore lěta w Marinej cyrkwi hodownu powěsć hudźbnje posrědkuja, zo bychu přitomnych na pokojny čas nastajili.
„Rosujće, njebjesa, na zemju dele ...“
Budyšin (CRM/SN). Z adwentnym hymnusom „Rosujće, njebjesa, na zemju dele, a mróčele zdešćujće Sprawneho!“ zahaji chór 1. serbskeje kulturneje brigady sobotu do 3. adwentneje njedźele swój tradicionalny adwentny koncert pod nawodom cyrkwinskeho hudźbneho direktora Friedemanna Böhme w Budyskej Michałskej cyrkwi. Tónraz přidruži so brigadnikam dźěćacy chór gymnazija pod dirigatom wučerki hudźby Judith Škodźineje. Z wubranymi sadźbami naby program na wotměnje. Dalši zajimawy akcent staji kantorka Michałskeje wosady, Japanjanka Yuko Ikeda, ze swojej dosć swojotnej interpretaciju choraloweju wobdźěłanjow Johanna Sebastiana Bacha a pózdnjoromantiskeho komponista Sigfrida Karga-Elerta kaž tež z Bachowej popularnej „Tocattu a fugu w d-moll“.
