Hudźbnicy namjetuja pomocny paket
Sakski krajny zwjazk Zwjazkarstwa němskich hudźbnikow (DTKV) je so ze zjawnym listom na sakskeho ministerskeho prezidenta Michaela Kretschmera (CDU) wobroćił. W nim namjetuje štyri konkretne naprawy za „wudospołnjacu, skutkownu pomoc“ tysacam w hudźbnych powołanjach skutkowacym samostatnym, kotřiž su wot aktualneho zwrěšćenja kulturneho žiwjenja potrjecheni.
Lipsk (SN/CoR). Předsydka a jednaćel sakskeho zwjazka DTKV Stephanie Dathe a Christian Scheibler na to skedźbnjataj, zo njemóže kreditowy program Sakskeje natwarneje banki za najwjetši dźěl swobodnje skutkowacych hudźbnikow, komponistow a hudźbnych pedagogow, kotřiž tworja „personalny zakład w hudźbnym kraju Sakskej, jeničke rozrisanje być“.
Prěni namjet, powołansku nuzowu situaciju přemosćić, je, załožić za hač do 1 500 swobodnje dźěłacych hudźbnikow „rezidencny program koronapomoc“, přez kotryž dóstanu wuměłcy maksimalnje 4 500 eurow na šěsć měsacow. Wuchadźeja z dohromady 6,75 milionow eurow kóštow za program. Za to móhli socialne pomocy za wuměłcow wužiwać.
Ćežki čas za wuměłcow
Postajenja akceptować
Chrósćicy/Drježdźany (SN/JaW). Nawoda Chróšćanskeho křižerskeho procesiona Pětr Ćemjer a kantor Marko Smoła namołwjataj křižerjow, statne a cyrkwinske instrukcije nastupajo koronapandemiju respektować a dodźeržeć. To rěka, zo njeměli lětsa žani křižerjo jěchać. Znata forma, radostne poselstwo w křižerskich procesionach wozjewjeć, „njeje lětsa móžna a njewotpowěduje w času pandemije křesćanskim zasadam. ... Kóždy křesćan je k modlitwje za chorych a jich pomocnikow přeprošeny, njemóže a njesmě pak to napřećiwne činić. Njesměmy so potajkim w skupinach zhromadźić a tak riziko natykliwosće šěrić“, rěka w lisće, kotryž našej redakciji předleži.
Hudźbna šulapřez konsolu
Budyšin/Lubij (SN/jak). Najebać nachwilnje zawrjenu wokrjesnu hudźbnu šulu Třikrajowy róžk w Lubiju a wokrjesnej hudźbnej šuli w Budyšinje a Kamjencu chcedźa wučbu na někajke wašnje dale wjesć. Dny wotewrjenych duri, zhromadne zarjadowanje ze šulemi a pěstowarnjemi, koncerty su najprjedy raz hač do 20. apryla wotprajene.
„Činimy to ze zamołwitosće a z wulkim hospodarnym rizikom“, praji nawoda wokrjesneje hudźbneje šule Lubij Sven Rössel. Zo bychu šulerjo we wučbje dale přišli, chcedźa nětk znajmjeńša za muzicěrowanske hodźiny narunanje poskićić.
Erich Krawc
Aliěrowane wójsko wuchodnje Ryna wojowało
26. měrca před 75 lětami bě wažny dźeń we wojowanjach na zapadnej fronće, hdźež spytachu Američenjo, Jendźelčenjo, Kanadźenjo a Francozojo němske wójsko dale wróćo tłóčić a tak do Němskeje postupować. Wehrmachta dyrbješe spytać nadběhej aliěrowaneho wójska wuchodnje Ryna zadźěwać. 26. měrca 1945 poradźi so 7. ameriskej armeji pola Wormsa, rěku Ryn překročić a dale na sewjer postupować. Blisko Darmstadta bližeše so 3. ameriska armeja pod komandom generalneho leutnanta Georgea S. Pattona wojakam 7. armeje wot sewjera a zjednoći so z nimi.
Kriza wěčnje trać njebudźe
Předpředań za lětnje dźiwadło chce NSLDź 4. apryla zahajić
Carmen Schumann a Cordula Ratajczakowa stej so z intendantom Budyskeho Němsko-Serbskeho ludoweho dźiwadła Lutzom Hillmannom mjez druhim wo tym rozmołwjałoj, kak tam z aktualnym połoženjom wobchadźeja.
Kak so w tymle ćežkim času čujeće?
L. Hillmann: Sym direktor zawrjeneho dźiwadła. Da so mi tak derje njeńdźe. Mam pak zrozumjenje za postajene naprawy.
Dźiwadło je za publikum zawrjene, što pak dźiwadźelnicy tuchwilu činja?
L. Hillmann: Probujemy cyle normalnje, tak na přikład za hru „Zjednoćenje wobeju Korejow/Die Wiedervereinigung der beiden Korea“, za delnjoserbski kruch „Jaja z kraja“ kaž tež za klankodźiwadłowu hru „Jenož dźeń/Nur ein Tag“. Proby njejsu dotal wotprajene. W tuchwilnej situaciji pak móža so předpisy kóždu hodźinu změnić.
To wšitko profijow potrjechi – kak wupada z lajskimi hrajerjemi?
Křižerscy kantorojoso njezetkali
Radwor (SN/JaW). Wčerawša zhromadźizna wosadnych křižerskich kantorow w Radworju njeje so wotměła. To zdźěli na naprašowanje našeho wječornika Radworski wosadny farar a zamołwity za křižerske procesiony Beno Jakubaš. „Wona je z rozsudom Sakskeje njetrjebawša“, farar měni. Su ju tuž krótkodobnje wotprajili. Tak njeje tež k žanomu dojednanju wosadnych kantorow dóšło, kak měli w naležnosći lětušich křižerskich procesionow dale postupować. Kaž farar Jakubaš rjekny, dyrbjeli runje nětko w času coronapandemije wšitcy rozumni być. „Njejsym sej w nimale 40 lětach jako křižer myslił, zo raz k tajkej situaciji dóńdźe. Ale Sakska je rozsudźiła, a po postajenjach stata dyrbimy so měć.“
Lětsa žane mócne haleluja křižerjow?
Sakska krajna direkcija jutrowne jěchanje zakazała
Drježdźany/Budyšin (SN/JaW). Křižerjo njesmědźa lětsa jěchać. Tak je Sakska krajna direkcija w Drježdźanach rozsudźiła a křižerske procesiony zakazała. To wozjewi wčera Budyski krajnoradny zarjad w swojej wšědnej rozprawje wo aktualnym stawje nastupajo coronapandemiju.
We wozjewjenju wobkruća krajna direkcija rozsud z tuchwilu płaćiwymi postajenjemi přećiwo rozpřestrěću corony. „Hač do 5. apryla płaći powšitkowne postajenje socialneho ministerstwa, kotrež rjaduje krute wobmjezowanje swobodneho pohibowanja. Nimo toho je powšitkowny wukaz z 19. měrca k zakazej wšitkich zjawnych a njezjawnych zarjadowanjow kaž tež zhromadźenja ludźi hišće hač do 20. apryla płaćiwy. Tež při nałožowanju tohole postajenja njeje móžno jutrowne jěchanje zarjadować“, w spisu rěka.
