1. januara, hornjoserbsce

11:00 Aktualne powěsće

11:15 Přehlad lěta 2020

a hudźbne přinoški

12:00 Nabožne wusyłanje

(Christoph Rummel)

delnjoserbsce

12:30 Aktualne powěsće, mjez druhim z myslemi do noweho lěta

13:00 Nowolětny koncert z twórbami Kurta Karnawki a Richarda Kowala

13:30 Nabožne wusyłanje

(Manfred Hermaš)

3. januara, hornjoserbsce

11:00 Łužica tutón tydźeń, mjez druhim z přehladom powěsćow tydźenja

11:20 Z appami cuzu rěč nawuknyć

11:40 Što budźe w nowym lěće 2021?

12:00 Nabožne wusyłanje

(Beno Jakubaš)

po tym zbožopřeća

delnjoserbsce

12:30 Aktualny magacin, mjez druhim z dźěćacym postrowom

13:00 Rozhłosowa woklapnica

(1. dźěl)

13:40 Nabožne wusyłanje

(Till Wojto)

po tym  zbožopřeća

Za kemše so přizjewić

Ralbicy. Aktualneho połoženja koronapandemije dyrbja tež kemšerjo w serbskich a dwurěčnych katolskich wosadach swoje kontaktne daty w cyrkwi zawostajić. Wosadni fararjo proša tuž wšitkich, kotřiž tam přichadźeja, swoje daty do spřihotowanych kartkow zapisać a w za to předwidźanych tyzach zawostajić. Dale maja so wěriwi we wjacorych wosadach, kaž na přikład w Budyšinje, na Bože mšě přizjewić. Za 24., 25. a 26. december je to tež w Ralbicach, Róžeńće a Rakecach trjeba. We wšěch třoch cyrkwjach je ličba městnow wobmjezowana. W Ralbicach je jich 80, w Róžeńće 110 a w Rakecach 30. Wosadny farar Šćěpan Delan wěriwych tuž prosy so do wupołoženych lisćin w Božich domach zapisać. Za někotre Bože mšě je kontingent městnow hižo wučerpany. A kedźbu! 24. hodownika su kemše w Ralbicach prjedy hač zwučene – mjenujcy hižo w 20 hodź. W Róžeńće budźe zastup do cyrkwje jeno přez zachod we wěži móžny.

Róžant/Chrósćicy/Bluń/Njeswačidło/Rakecy (SN/JaW). Dokelž wšak su lětuše hody wot koronapandemije chětro wob­wliwowane a městna w cyrkwjach wukazow a postajenjow škita před koronu dla raznje wobmjezowane, su sej we wjacorych wosadach – katolskich kaž ewangelskich – hłójčku łamali, kak móhli Božu nóc při­wšěm na dostojne wašnje swjećić.

W Róžeńće chcedźa wjesne dźěći na nyšporje w 15.30 hodź. hodownu sta­wiznu předstajić. Dokelž wšak lětsa live hrać njemóža, poskića ju jako film. Nimo w cyrkwi pokazaja woni swoju hodownu stawiznu jako film tohorunja pod https://youtu.be/ptGm-GBKLbI. Njedźelu, 27. decembra, předstaja jón tohorunja w 14 hodź. na nyšporje w Ralbicach.

Jónu spočatk 1970tych lět, za čas mojeho dźěćatstwa, je pola nas w Hózku nimale přez cyły december sněh ležał. Běše to wjeselo! Dwaj dnjej do patoržicy dźěchmoj z dźědom do lěsa po hodowny štom. Mój prawy dźěd wšak bě „we wójnje wostał“, kaž swójbni stajnje prajachu.

Tónle mój druhi dźěd běše ćěkanc z bywšeje wuchodneje Pruskeje, kiž je po Druhej swětowej wójnje pola nas na statoku nowu domiznu namakał. Měješe mandźelsku a pjeć dźěći, ke kotrymž bě w poslednich wójnskich měsacach zwisk zhubił. Dołhož bě žiwy, je za nimi pytał – bjez wuspěcha. Za mnje pak běše wón mój dobroćiwy dźěd. Z nim smy němsce rěčeli, a na njeho mam wjele dobrych dopomnjenkow.

Znajmjeńša pytachmoj tón dźeń do hód za nas rjanu chójnu. Móžu so dopomnić, zo běchu štomy zasněžene. A nadobo wuhladach na jednej z hałužkow někajke pisane wěcy. Jako sej je bliže wobhladach, zwěsćich, zo běchu to słódkosće. Zadźiwana hladach na dźěda, a wón mi praješe: „Te je zawěsće rumpodich zhubił. Jeho wulki měch měješe najskerje dźěru.“