Aus der aktuellen Ausgabe vom Freitag, 19 Januar 2018

Berlin (dpa/SN). Piwarnje Němskeje su po prěnim trochowanju branše 2017 mjenje piwa předawali a njemóžachu z poměrnje stabilnym wuwićom minjenych lět pokročować. Zwjazk piwarnjow z toho wuchadźa, zo je wotbytk piwa wo dwaj procentaj na 94 milionow hektolitrow woteběrał. Wina je předewšěm dešćikojte lěćo, kotrež wunjese piwowym zahrodam mjenje wopytowarjow. Potrjechene su nimale wšitke wulke piwarnje kraja. Woteběracy wobrot so bjez dwěla tež na płaćizny piwa wuskutkuje. Tak su připowědźili, zo chcedźa přichodny čas piwo wo euro na kašćik podróšić.

Tež hdyž – kaž ja – žana póstniska nora njejsy, móžeš so wot Wojerowčana Křesćana Bulanka w jeho wupožčowarni kostimow spěšnje natyknyć dać. Kak zahoriće wón wo swojich kostimach powěda, kak so na wosebitych ludźi a na swójske dožiwjenja w zwisku z póstnicami dopomina, swědči wo tym, zo je Wojerowčan zawěrno nora z ćěłom a dušu. Znaju Křesćana Bulanka hižo tójšto lět, wjacore razy sym jeho za Serbske Nowiny wopytał a stajnje wón mi něšto noweho powědaše a pokazowaše. Zawčerawšim pak klinčeše z jeho słowow tež trochu njewěstosće, kak dołho drje jeho wupožčowarnja hišće wobsteji. Z 72 lětami dźě hižo najmłódši njeje, a dźěsći­ jeho žiwjenski skutk dale wjesć nochcetej resp. njemóžetej. Na kóždy pad by škoda było, by-li so Bulankec wupožčowarnja kostimow rjaneho dnja prosće zhubiła. To by wjele norow wobžarowało, a nic jenož ći. Marian Wjeńka

Wichora dla njeje kóžda domjacnosć štwórtkowne wudaće Serbskich Nowin dóstała. Transportna firma a potrjecheni roznošowarjo to dźensa nachwa­taja. Dźakujemy­ so za zrozumjenje. Ludowe nakładnistwo Domowina

Zagreb (ČŽ/K/SN). Znowa rekordna bě lońša turistiska sezona za Chorwatsku. Cyłkownje je kraj podłu Jadranskeho morja­ na wšěch 18,5 milionow hosći wopytało, cyłych 13 procentow wjac hač lěta­ 2016. Chorwatske ministerstwo za turistiku hódnoći tele daty jako „historiske“. Z wukraja bě 16,5 milionow turistow přišło, štož je přibytk 19 procentow porno lětu 2016. Najwjace z nich pochadźeše z Němskeje, sćěhuja wopytowarjo ze Słowjenskeje, Awstriskeje, Pólskeje a Čěskeje.

Čěskim dowolnikam je Chorwatska hižo­ někotre lětdźesatki najwoblubowaniši turistiski cil docyła. Chorwatski minister za turistiku Gari Cappelli přispomnja, zo su dochody z turizma loni něhdźe jědnaće miliardow eurow wučinjeli, štož je porno lětu do toho přirost wo přibližnje dźesać procentow. Najwjace přenocowanjow stej znowa starožitny Dubrovnik a wobkuzłacy Rovinj registrowałoj. Z kupow běchu Krk, Pag a Lošinj znowa najbóle wopytowane.

K bruttoproduktej kraja je turistika w lěće 2017 z 18 procentami přinošowała. Njeposrědnje a posrědnje w Chorwatskej na polu pućowanja 150 000 ludźi dźěła, zwjetša žony.

Moskwa (ČŽ/K). Dwě třećinje Rusow matej za to, zo ma jich kraj njepřećelow. Štwórćina z nich sej samo mysli, zo je Ruska wot njepřećelow wobkružena. Najwjetšich widźa w USA, Europskej uniji a Ukrainje. Tajke nahlady je agentura Lewada­ zwěsćiła, rozprawjeja čěske nowiny. USA jako njepřećela začuwa 68 procentow respondentow, Ukrainu 29 procentow a EU 14 procentow. Za njepřećelske maja Rusojo pak tež někotre post­sowjetske republiki (dźesać proc.), Pólsku (wosom proc.), Němsku, NATO a Wulku Britanisku (šěsć proc.) kaž tež přiwisnikow Islamskeho stata (pjeć proc.). Ze 66 procentami je wšak nětkole mjenje Rusow wo njepřećelstwje druhich přeswědčenych hač 2014. Po zjednoćenju poł­kupy Krim z Ruskej bě w tym lěće 84 procentow­ Rusow njepřećelstwo wosebje zapada za date měło. Z dalšim woprašowanjom zwěsćowarnje Lewada so wujewja, zo je mjez Rusami konserwatizm chětro přibył. Tak je na přikład homoseksualne partnerstwa loni 82 procentow woprašanych zasudźiło, 15 procentow wjac hač 1998. Hdyž bě přetorhnjenje samodruhosće 1998 jenož dwanaće procentow wotpokazało, činješe to loni hižo 35 procentow.

... chcu, zo so prawa narodnych mjeńšin na europskej runinje zapisaja. Rěč a kulturu kóždeje jednotliweje mjeńšiny móžemy jeničce zachować, hdyž ju wotpowědny lud abo ludowa skupina dale pěstuje. Institucije k zachowanju mjeńšin dyrbjeli tuž tež spěchowane być. Dźěći dyrbja dóstać prawo, směć w swojej maćeršćinje pisać a čitać nawuknyć.

Jeno z prawidłownym nałožowanjom lud swoju rěč a kulturu njespušći. Kóždemu čłowjekej přisteji tuž prawo, so z hordosću k swojim korjenjam wuznać směć. Narodne mjeńšiny dyrbimy tuž zaměrnje škitać a podpěrać!

Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Fede­ralistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mai­lowu adresu: .

Podaš-li so do Błótow, móžeš tam tež w zymskim času wjele zajimaweho dožiwić. Tónle kónc tydźenja a přichodne tydźenje swjeća w Bórkowach a druhdźe swoje zapusty w narodnej drasće. Hosći wita radlubje tež Gisela Christl w Lubinje-Kamjennej na swój­ Serbski burski statok, hdźež wotměwaja so prawidłownje kórkowe seminary. Foto: Wolfgang Kotisek

Pjatk 19.1. 19:00 Dźeń wotewrjenych duri na Wojerowskim Lessingowym gymnaziju

  19:30 Delnjołužiska premjera wječorneho ptačeho kwasa SLA na komornym jewišću Choćebuskeho Statneho dźiwadła

Sobotu 20.1. 10:00 Dźeń wotewrjenych duri w Kulowskej Wyšej šuli „Korla Awgust Kocor“

  16:00 Dartowy turněr we Wotrowje

  18:00 Kulinariske pućowanje po łužiskim swěće bajow, w Čornochołmčanskim Krabatowym młynje

  18:00 Wječorny ptači kwas SLA w Hochožanskim hosćen­cu „K złotemu zmijej“

  19:30 1. kapičkowy wječork w Kulowskej wjacezamě­rowej hali

  19:45 „Skónčnje doma!“ – putniski kabaret w Chróšćanskej putniskej hospodźe

  21:30 Lit The House With Serbska murja 2.0 – koncert ze skupinu Sorbian Art Trio a reje w Budyskim Kamjentnym domje

Njedźelu 21.1. 14:00 Wodźenje po elementariju Kamjenskeho Muzeja zapadneje Łužicy

  15:30 Ptači kwas Němčanskeje pěstowarnje „Pumpot“ w twarjenju La Galeria

  15:30 Ptačokwasne zarjadowanje towarstwa Stup dale w Drježdźanach

Póndźelu 22.1. 8:30 Hornjoserbsko-němski dźěćacy ptači kwas SLA na žurli SLA (tohorunja 10.30 hodź.)

Wutoru 23.1. 8:30 Hornjoserbsko-němski dźěćacy ptači kwas SLA na žurli SLA  (tohorunja 10.30 hodź.)

njedźelu hornjoserbsce

11:00 Łužica tónle tydźeń

11:15 Basnje a wurězki powědan­č­kow z literarneho wurisanja LND a załožby

11:30 Nowe spěwy rozhłosa

12:00 Ew. nabožne wusyłanje

 (farar Christoph Rummel)

po tym zbožopřeća

delnjoserbsce

12:30 Aktualny magacin z powěsćemi, rozprawa wo premjerje ptačokwasneho programa SLA

13:00 Spominanje na serbskeho basnika Fryca Rocha

13:30  Nabožne wusyłanje

 (Bernd Pittkunings)

po tym zbožopřeća 

Choćebuz (SN). Zapust słuša k najwjetšim serbskim swjedźenjam spočatk noweho lěta w Delnjej Łužicy. Po starym nałožku ma so z nim zyma wućěrić, zo móhło nalěćo přichadźeć. W Bórkowach a někotrych dalšich błótowskich gmejnach tele dny předewšěm młodostni zapust­ swjeća. W filmje Anje Kochojc a Wolfganga Dümcke móžeće sej jutře wot 13.05 do 13.35 hodź. w telewiziji RBB wobhladać, zo narodna drasta w Bórkowach wosebitu rólu hraje. Předewšěm lapy­ su w tej wsy wulke a krasne. W magacinje Łužyca so Anja Kochojc wobdźěl­nikow mjez druhim za tym praša, kak wažny jim nałožk je.