Zwjazkowy policist zadźerži na awtodróze A64 bus z pućowacymi. K ...
Kretschmer: Migraciju zrjadować
Drježdźany (dpa/SN). Sakski ministerski prezident Michael Kretschmer žada sej wot zwjazkoweho knježerstwa, zo prašenje migracije rozrisa. Ličby migrantow měli so jasnje znižić, zo by so tema změrowała, rjekny politikar CDU dźensa w Sakskim krajnym sejmje. Wobydlerjo tole wočakuja. W naćisku swojeho knježerstwoweho programa za nowu legislaturnu dobu žada sej sakska unija pola migracije „dychacu hornju mjezu“ 60 000 ćěkancow wob lěto w Němskej. Za Saksku by to rěkało, zo dyrbi 3 000 migrantow wob lěto zaměstnić.
Bórze zaso woborna winowatosć?
Berlin (dpa/SN). Zakitowanski minister Boris Pistorius (SPD) chcyše dźensa wo swojich planach nastupajo nowu wobornu słužbu informować. Dopołdnja je wón swoje předstawy zakitowanskemu wuběrkej zwjazkoweho sejma předstajił. Popołdnju chcyše wón zjawnosć na nowinarskej konferency informować.
Wobornu winowatosć běchu w Němskej lěta 2011 pod tehdyšim zakitowanskim ministrom Karlom-Theodorom Guttenbergom zběhnyli. Zakonsce předwidźane je, zo móža wobornu winowatosć w padźe wosebitych napjatosćow abo zakitowanja kraja zaso wukazać.
Najebać personalnu ofensiwu je ličba wojakow zwjazkoweje wobory loni na 181 500 wojakow woteběrała. Hladajo na to a na wójnu Ruskeje přećiwo Ukrainje je Pistorius nadawk dał, wšelake modele słužbneje winowatosće pruwować.
ANO wólby EU jasnje dobyła
Čěska opozicija při wothłosowanju wuspěšniša hač knježerstwo
Praha. Dźeń po wólbach do Europskeho parlamenta wobkrući statna wólbna komisija w Praze wuslědki za Čěsku. Andrej Babiš, předsyda najwažnišeje opoziciskeje strony Ano, je z nimi wjace hač spokojom. Z 26,14 procentami hłosow a sydom zastupjerjemi (z jednym wjace hač dotal) w Europskim parlamenće je so jeho strona jako najlěpša w susodnym kraju wopokazała. Zastupjerjo Ano zdźělichu hnydom po wólbach, zo nochcedźa prezidentku EU komisije von der Leyen w jeje dalšej kandidaturje podpěrać. Mjenje zastupjerjow w parlamenće změje wólbne zjednoćenstwo „Spolu“ ministerskeho prezidenta Petra Fiale. Fiala wobžaruje, zo budźe město wosom jenož hišće šěsć zapósłancow w Brüsselu zajimy třoch knježerstwowych stronow zastupować. Z 22,27 procentami hłosow docpě zjednoćenstwo druhe městno. Spokojom pak je Fiala z ličbu wolerjow. Minjeny pjatk a minjenu sobotu bě wjace ludźi hač dotal wothłosowało.
Kusk ćišća njeńdźe
Porjedźenka
Nowa tramwajka z Čěskeje dojěła
To a tamne (12.06.24)
Mórske lawy w Lipšćanskim zwěrjencu změja přichodne dny wjele dźěła: Dokelž sej rady z bulemi hrajkaja, zasadźuja tam zwěrjata jako orakl za hry němskeje narodneje koparskeje wubranki při europskim koparskim mišterstwje. Prěni orakl planuja jutře, dźeń do zahajenskeje hry Němskeje přećiwo Šotiskej w Mnichowje. Tež w Kamjenicy prašeja so wobydlerjow zwěrjenca za wuslědkami.
Myjernju awtow zešrotował je muž ze swojim awtom w hessenskej stolicy Wiesbadenje. Do toho bě sej šofer nohu při pedalu płuna zatłusnył. Na to prasny awto do wjacorych nastrojow, wobškodźi elektroniku a přełama skónčnje wrota na kóncu myjernje. Muž wosta njezranjeny. Awto wosta hakle při zawěrje stejo. Muž rjekny, zo njemóžeše zatłusnjeneje nohi dla borzdźić. Awto je dospołnje skóncowane, škoda w myjerni je hoberska.
Dale z třomi serbskimi radźićelemi
W nowym Budyskim wokrjesnym sejmiku budu znowa třo serbscy wokrjesni radźićeljo. Dawid Statnik (CDU) a Jan Budar (Serbske wolerske zjednoćenstwo/SWZ) staj mandat zakitowałoj. Jako třeći wróći so Alojs Mikławšk (CDU) do sejmika, kotremuž bě hižo hač do předposlednjeje wólbneje periody přisłušał. Wšitcy třo buchu w samsnym wólbnym wokrjesu 7 wuzwoleni.
Budyšin (SN/at). Wot stronskich zajimow njewotwisny wokrjesny radźićel móže serbske zajimy dale w Budyskim wokrjesnym sejmiku zastupować. Jan Budar njeje jenož mandat Serbskeho wolerskeho zjednoćenstwa zakitował, wón je z 843 hłosami swój wuslědk z lěta 2019 (508) samo polěpšił. Alojs Mikławšk bu z 3 715 hłosami wuzwoleny, Dawid Statnik z 2 100, 297 mjenje hač před pjeć lětami. W serbskich komunach wólbneho wokrjesa 7 bě CDU znowa najsylniša strona. Najwjetšu dowěru mějachu wolerjo do SWZ z 15,6% hłosow w Chrósćicach. Cyłkownje pak je SWZ ze 4 621 porno 6 065 lěta 2019 nimale štwórćinu hłosow zhubiło.
Straty za Lěwicu wuskutkowachu so tež na rezultat kandidata Hajka Kozela we wólbnym wokrjesu 4. Docpětych 1 096 hłosow (2019: 1 958) njedosahaše za wospjetny mandat w sejmiku.
„Wulke finale“ akcije za sposrědkowanje wjesela
Budyšin (SN/bn). Akcija „Happy monday Bautzen – Wjesoła póndźela Budyšin“ je „najprjedy raz“ zakónčena. Dohromady zličichu na cyłkownje dźewjeć zarjadowanjach něhdźe 3 000 wopytowarjow. Wčerawše „wulke finale“ přiwabi něhdźe 300 zajimcow na Budyske Hłowne torhošćo. Młoda skupina Šwintuchi zahori publikum mjezu druhim z reggaejowej wersiju spěwa „Hołbik dwě běłej nóžce ma“ a adapciju hita band a-ha „Take on me“. Skupina Die Baumschule zamó předewšěm ze swojim dwójce zahratym hitom „In Bautzen wird die Mate knapp“ wopytowarjow do pohiba pohnuć. Za incenaciju Němsko-Serbskeho ludoweho dźiwadła „Na tamnym boku měsačka – Hercy“ zestajana band Zynkofunk zasłuži sej sej z wobdźěłanymaj hitomaj Hercow „Ptačk“ a „Moja luba holčka“ runje tak sylny aplaws kaž z a cappella zanjesenym evergreenom „Fly me to the moon“. Performance duwa Zurück in die Zukunft, z kotrejž wabi zdobom za wustajeńcu „Je přewrót zdokonjany?“, a „kolektiwne přidawanje žonopa“ pod nawodom wuměłče Tanja Krone – mjez druhim nasta z podpěru publikuma z wjacorych družin žonopa zhotowjena mólba – program skulojćištej.
