Elektroawta bóle spěchować
Migrantow wróćo słali
Šmórnu wjele lětow
Manipulaciju přiznał
Běłoruske dźěći lětsa znowa do Łužicy přijědu
Kamjenc (IŠ/SN). Čłonojo Kamjenskeje „Iniciatiwy dźěći z Černobyla z. t.“ kaž tež našich běłoruskich partnerskich organizacijow w Buda-Košeljowskim wokrjesu (Gomelski region) a w Minsku spominaja 26. apryla na eksploziju, kotraž bě so 1986 w štwórtym bloku sowjetskeje atomoweje milinarnje w Černobylu stała. Bě to najwjetše njezbožo hladajo na ciwilne zwužitkowanje atomoweje energije, tak mjenowany super-GAU.
Rozsahłe kónčiny Běłoruskeje su radioaktiwnje zanjerodźene, a to wostanje tež w dalšich lětdźesatkach tak. Dołhodobne sćěhi radioaktiwneho poćeženja wobydlerjow znjeměrnjeja. Mnozy z našich dołholětnych běłoruskich přećelow su na sćěhi Černobylskeje katastrofy hižo wumrěli. Přiwšěm dyrbja ludźo w Běłoruskej z Černobylom dale žiwi być.
Wot lěta 1990 přeprošuje naše towarstwo běłoruske dźěći na wočerstwjenje do Kamjenca. Tež lětsa chcemy zaso dwě skupinje z Buda-Košeljowskeho wokrjesa a z Minska do Kamjenca přeprosyć. To pak je jenož móžno z pomocu a podpěru mnohich serbskich a němskich firmow, wosadow a institucijow.
Škitać cyrkwje w Egyptowskej
Vatikan (B/SN). Křesćanske cyrkwje w Egyptowskej maja so lěpje škitać. Najwyša rada za islamske naležnosće chce wozjewić směrnicy, informuje misionska powěsćernja Fides. Směrnicy maja na to skedźbnjeć, zo hodźi so respektabelne zhromadne žiwjenje wšelakich nabožinow wot korana wotwodźeć, zdźěli ministerstwo za nabožne naležnosće. Zdobom připowědźi egyptowske knježerstwo přiručku wo wopačnych předstawach wo islamje.
Nadpady na domy ćěkancow
Berlin (B/SN). W Němskej bu wot spočatka lěta 2016 znajmjeńša 118 nadpadow na domy ćěkancow skućenych. W 112 padach běchu prawicarscy złóstnicy za to zamołwići, piše zwjazkowe ministerstwo nutřkowneho w Berlinje. Ličby zapřijimaja zwěsćene nadpady hač do 15. februara. Nadpadaj w Clausnitzu a Budyšinje njejstej w statistice hišće zapřijatej. Po informacijach ministerstwa jedna so w lěće 2016 w 27 padach wo namócne delikty, wo wěcnu škodu (43 padow) kaž tež wo 31 propagandowych deliktow, nimo toho wo 17 padow zapalerstwa.
Katechizm w pismje Brailleho
To a tamne (26.04.16)
Swoju wobsedźerku před wohenjom wuchowała je kóčka we Wernigerodźe. Dokelž wona njewšědnje wótře mjawčeše, wobsedźerka domu na to wotući a móžeše jón hišće w prawym času wopušćić. Płomjenja běchu w susodnej garaži wudyrili a so na tykowany bydlenski dom rozpřestrěli, čemuž tež wohnjowa wobora zadźěwać njezamó. Kózły so dospołnje wupalichu a so sypnychu. Cyłkownu škodu trochuja na 200 000 eurow.
Swoju mać do kuchnje zamknył je dwulětny hólčk w Heidelbergu a zawini tak zasadźenje policije a wohnjoweje wobory. 34lětna wołaše policiju, po tym zo bě pytnyła, zo hižo z kuchnje njepřińdźe. Nimo hólca bě hišće dźewjeć měsacow stara dźowka w bydlenju. Dokelž běchu tež bydlenske durje wotnutřka zamknjene, dyrbjachu je wohnjowi wobornicy wočinić. Nichtó so na zbožo njezrani.
Łužica (26.04.16)
Bywši měšćanosta kandiduje
Gubin (dpa/ch/SN). Njeswěry a pokupnosće dla zasudźeny bywši měšćanosta Gubina Klaus-Dieter Hübner (FDP) k wólbam měšćanosty 26. junija znowa nastupi. Wólbny namjet bu přizwoleny, zdźěli wčera nawoda wólbow města. Hübner ma štyrjoch přećiwnych kandidatow. Kaž krajny zwjazk FDP njedawno wozjewi, strona jeho njepodpěruje. Hnydom po prawomócnym wusudźe je so krajny zwjazk wot njeho distancował. Po wčerawšim wozjewjenju wólbneho nawody pak FDP Hübnera nadobo namjetuje. Krajne sudnistwo bě jeho před dobrym lětom na chłostanje z pruwowanskim časom połdra lěta zasudźiło.
Přećiwo zmilinjenju brunicy
Při wólbach žadyn rozsud
Łaz (AK/SN). Wólby noweho Łazowskeho wjesnjanosty njejsu hišće rozsudźene. Wčera njeje žadyn ze štyrjoch kandidatow trěbnu absolutnu wjetšinu wjace hač 50 procentow hłosow dóstał. „8. meje budu tuž dalše wólby. Hač do 29. apryla dyrbja so tuchwilni kandidaća rozsudźić, hač znowa nastupja. Nowi njesmědźa so nastajić dać“, podšmórny předsydka gmejnskeho wólbneho wuběrka Mandy Liepert wčera po wozjewjenju wuslědkow.
Thomas Leberecht (CDU) z Łaza docpě 45,3 procenty hłosow, Wolfgang Tietze (njestronjan) z Běłeho Chołmca 21,2 procentaj, Ronald Woschick (Wolerske zjednoćenstwo za Łazowsku wulkogmejnu) dósta 20 procentow a Steffen Mühl (Swobodni wolerjo Hórnikečanskeho jězora) 13,5 procentow. Z dohromady 4 644 wólbokmanych je 2 877 wolić było, štož wučinja něhdźe 62 procentow.
Thomas Leberecht wčera připowědźi, zo chce nětko dalšich wolerjow za sebje zdobyć. Hač tamni třo znowa nastupja, dotal jasne njeje.
