Berlin (dpa/K/SN). Lěwica je wuslědki wjerška koalicije z dojednanjom na integraciski zakoń jako dospołnje njedosahace kritizowała. „Widźu to tak, zo simuluje koalicija z tym zawěrno swoju njekmanosć jednanja“, rjekny předsyda jeje frakcije w zwjazkowm sejmje Dietmar Bartsch. „Wěcy, kotrež bychu dyrbjeli wobjednać, su zwjetša nabok sunyli – namrěwstwowy dawk, e-awta, požčowane dźěło.“ Nastupajo dojednane připokazane bydlenje, zawjazowace kursy ćěkancow a přidatne dźěłowe móžnosće kaž job za jedyn euro Bartsch rjekny, „to polěkuje tomu, štož nochcemy: wuhrawanju słabych přećiwo słabym“. „Najwjetši čas, zo tale wulka koalicija wudycha, dokelž njezamóže hižo jednać.“

Paris (dpa/K/SN). Na kromje protestneho hibanja „Nuit Debout“ je wčera wječor w francoskej stolicy ke krawalam dóšło. Skupina něhdźe 300 na Naměsće republiki přećiwo socialnej njesprawnosći demonstrowacych ludźi poda so na na­dróžny pochod, při čimž su krawalnicy po puću tež namócnje zachadźeli. Po wudawanju Pariskeje policije bu njemało wulkich wobchodowych woknow kaž tež škleńcow busowych zastanišćow rozbitych. Pod hesłom „Nuit Debout“ (Stejo w nocy) wotměwaja so wot 31. měrca na Naměsće republiki demonstracije. Nastało je hibanje w zwisku z protestami přećiwo wotmyslenej reformje dźěłowych wikow, njewobmjezuje pak so na tule temu. Francoski statny prezident François Hollande je w telewiziji nastorčene reformy jako „nuznje trěbne“ zakitował.

Sławny monster Nessie je namakany – znajmjeńša jeho atrapa. Ta bě so při natočenju filma před 47 lětami we hłubinach jězora Loch Ness w Šotiskej podnuriła, a wot toho časa běše zhubjena. Nětko je ju nurjenski roboter norwegskeje firmy namakał, kotryž měješe dno jězora wuměrić. Něhdźe dźewjeć metrow dołhi a štyri metry wysoki nastroj wupada kaž naddimensionalny kołp. Tón měješe 1969 w filmje „Sherlock Holmes“ Nessi zwobraznjeć. Při tym so wón podnuri.

Něhdźe 60 kilogramow kokaina je letiska policija sćazała. Drogi běchu jako małe prasowane kóstki po sto gramach mjez wuhlom ke grilowanju schowane. Posyłka wjacorych stow měchow wuhla pochadźa z Paraguayja. Drogi su šěsć milinow eurow hódne, policija zdźěli.

Ma so na kóštach wobdźěleć

Choćebuz (dpa/ch/SN). Braniborski brunicowy wuběrk sej wot Zwjazka žada, zo so dale połnje na kóštach saněrowanja wuhlowych jamow wobdźěla. Z wčera schwalenej Choćebuskej deklaraciju chce gremij ćišć na Zwjazk wukonjeć, zdźěli předsyda Holger Bartsch. Financowanske dojednanje za hórnistwoweho saněrarja LMBV klětu wuběži. Tuchwilu wjedu so rozmołwy mjez Zwjazkom a krajemi, z kotrymi sumami ma so hórnistwowe saněrowanje přichodne lěta podpěrać. Tukaja na to, zo chce so Zwjazk ze wšelakich wobłukow wróćo sćahnyć, zo by lutował. We Łužicy hrozy strach, zo budu kraje drohe projekty, na přikład saněrowanje bruneje Sprjewje, financować dyrbjeć.

Rozsudźi wo předaću