Nimale 6 300 wobdźělnikow su sobotu wječor na mjeztym 10. lětanišćowym běhu na terenje přichodneho noweho wulkolětanišća BER w Berlinje zličili. Spektakularny parcours wjedźeše po wobswětlenych betonowych pistach jónu wokoło wšeho areala. Najspěšniša běharka połmarathona trjebaše 1:28:59, najspěšniši muž porno tomu 1:15:08. Kaž oficialnje rěka, chcedźa BER klětu wotewrěć.

Mjerzajo so na telewizijny program je muž w Rostocku z wosmeho poschoda swój telewizor dele ćisnył. Wobydlerka policiju sobotu wječor informowaše, zo je runje telewizor nimo jeje balkona dele padnył. Zastojnicy namakachu rozbity nastroj před zachodom domu. 52lětny muž prašacym so zastojnikam skónčnje při­zna, zo je aparat z hněwom z wokna ćisnył. Kotre wusyłanje je jeho rozhoriło, njeje znate.

Programy za požadarjow azyla

Choćebuz (dpa/ch/SN). Hač do lětnjeho semestra chcedźa wjacore braniborske wysoke šule požadarjam azyla puć na uniwersitu zrunać. Wotpowědne programy ma na přikład Europska uniwersita Viadrina, Podstupimska uniwersita a Filmowa uniwersita w Babelsbergu. Ćěkancy z hišće njejasnym statusom přebywanja njemóža so za regularny studij zapisać. Z tejele přičiny poskićuja wysoke šule tak mjenowane collegowe programy. W nim docpěte wukony móhli so potom­ w pozdźišim studiju připóznać. Lětni semester so tón tydźeń zahaji.

Za myto so požadać