Marek Krawc rozprawja wo aktualnych temach w susodnym kraju

Praha. Čěska ma zaso swoje wulkopósłanstwo w Syriskej, zdźěli minjeny štwórtk wječor wonkowny minister Jan Lipavský. Vítězslav Pivoňka je w Damaskusu jako nowy diplomatiski zastupnik za čěske naležnosće zamołwity. Spočatk decembra, jako wuswobodźichu zběžkarjo kraj wot knjejstwa Bashara al-Assada, ćeknychu čěscy diplomaća njepřehladneho politiskeho połoženja dla do Prahi. Mjeztym su so zaso do swojich běrowow nawróćili, informuje Jan Lipavský. Politikar podšmórny minjeny kónc tydźenja po telefonaće ze swojim kolegu w zastojnstwje Antonyjom Blinkenom, zo budźe Čěska w Syriskej tež zajimy USA zastupować a wobydlerjam humanitarnu pomoc poskićeć. Nimo toho wobkedźbuje jara dokładnje so wuwiwacu situaciju w krizowym kraju a je w zwisku z tamnišim nowym knježerstwom.