To a tamne (20.05.16)
Něhdźe 1,8 kilometrow dołhu pizzu su pjekarjo z cyłeho swěta zhromadnje w južnoitalskim Neapelu napjekli a tak nowy swětowy rekord tuteje italskeje delikatesy nastajili. Dotalny su tak wo 300 metrow přetrjechili. Rěčnica agentury Guiness World Records je nowy rekord wobkrućiła.
Wowcu před zatepjenjom wuchowali su policisća w srjedźofrankskim Treuchtlingenje. Wona bě wčera z pastwy twochnyła a padny do dwaj metraj hłubokeje wody. Tam tak žałostnje bječeše, zo ju skónčnje hajnik wusłyša, a tón informowaše policiju. Ze zhromadnej mocu a z wotwlečenskim powjazom jako lasom přichwatani pomocnicy zastróžane a zymu mrějace skoćo z wody wućahnychu a dowjezechu je zaso k jeho tamnym dźewjeć přećelam na pastwu.
To a tamne (19.05.16)
Pjeć koni je z pastwy w schleswigsko-holsteinskim Norderstedće ćeknyło a nastaji so dale na puć po zwjazkowej dróze B 432. Tam njejsu so tež přez policiju zamylić dali. Hakle před wukładnym woknom wobchoda za jěcharsku potrjebu wone zastachu, hdźež wuhladachu kumštneho konja w přirodnej wulkosći. Hromadźe z policistami je kedźbliwy wodźer awta konje zaso na pastwu wróćo wjedł.
Relikwija włosow bamža Jana Pawoła II. je nětko w kapałce starownje w Laatzenje pola Hannovera wustajena. Na Božej mši su tam wčera sudobjo z włosami do wołtarja zapušćili. Nawoda starownje Adrian Grandt bě relikwiju jako dźak za beneficny koncert za hospic w domiznje bamža dóstał. W Pólskej, hdźež sej Jana Pawoła II. jara česća, su jeho relikwije chětro požadane.
To a tamne (18.05.16)
Wopak připrawjena filipinska chorhoj je chinskich rybarjow přeradźiła, kotřiž su ilegalnje před pobrjohom Filipinow ryby łójili. Mórskej straži bě napadnyło, zo su barby chorhoje zawjerćane. Při kontroli stražnicy zwěsćichu, zo je łódź jeničce za Chinu registrowana. Cyłkownje 25 Chinjanow zajachu. Filipiny a China so hižo dołho wo mórsku mjezu wadźitej.
Małej běłej lawaj Magdeburgskeho zwěrjenca dóstawatej wotnětka mloko z pólki. Tole je nawodnistwo zwěrjenca rozsudźiło, po tym zo běštej wobaj tójšto wahi přisadźiłoj a hrožeštej zahinyć. Hladarka so nětko wodnjo a w nocy wo njej stara. Čehodla stej młodźeći takle wotbyłoj, dotal njewědźa: Pak njeměješe lawica-mać Kiara mloka dosć, pak stej wonej infekt přećerpjeć dyrbjałoj.
To a tamne (17.05.16)
Ze železnej žerdźu w ruce je muž w durinskim měsće Gotha swoju ekspřećelku prosył, so na njeho wudać. Spočatnje bě 36lětny pola staršeju žony wokno w chěžinych durjach rozbił. Na to direktnje pola njeje randalěrowaše a do duri kopaše. Na to ju wo mandźelstwo prošeše, štož žona wotpokaza, kaž policija „ze zadźiwanjom“ w swojej rozprawje zwěsći. Přećiwo mužej přepytuja nětko wobškodźenja dla.
Z konjaceho wubědźowanišća runjewon do města smalił je sportowy kóń w Bremenje. Do toho bě jěcharja wotćisnył a galopěrowaše do směra na nutřkowne město. Pjeć policajskich awtow konja přewodźeše. Tola tež spěšnje natwarjena zawěra njezamó jeho zadźeržeć. Skónčnje so policistce poradźi, brunača dosahnyć a změrować. Jěchar a kóń wostaštaj na zbožo njezranjenaj.
To a tamne (13.05.16)
Mysteriozneho paducha całtow je policija w Sewjerorynsko-Westfalskej wuslědźiła, byrnjež jeho njedosahnyła. Jedna so wo rapaka, štož fota dokumentuja. Muž z Aachena bě so na policiju wobroćił, dokelž běchu so dny dołho całty při durjach zhubjeli. Ta da so do dźěła a nastaji kamery. Wobrazy pokazuja, kak je čorny ptak wušiknje titu wočinił a jednu całtu po druhej spakosćił. Z kóždej całtu je ekstra do swojeho schowa lećał. Jeho přesćěhać bě bjez zmysła.
Bombowy alarm zawiniła je dźěćaca kniha w Berlinskim Domje němskeho hospodarstwa. Twarjenje, w kotrymž maja wodźace gremije hospodarstwa swoje běrowy, dyrbjachu wčera kompletnje ewakuować, zo bychu fachowcy podhladny pakćik přepytowali. W nim bě dźěćaca kniha z bateriju a wótřerěčakom, kotraž čłowječe a zwěrjace hłosy napodobnja.
To a tamne (12.05.16)
Faktisce sam popadnył je so paduch w Kamjenicy, chowacy so před policiju. 25lětny bě sej minjenu nóc w běrowowym domje do lifta wućeknył a njemóžeše so z njeho hižo sam wuswobodźić. Policisća běchu rěbl při domje a rozbite wokno wuhladali. Zhromadnje z psom za paduchom pytachu a namakachu jeho w lifće. Durje wočinić pak dyrbješe přiwołana wohnjowa wobora. Jako jeho ze schowa „wuswobodźichu“, paducha zajachu. Pozdźišo jeho zaso pušćichu.
Třilětny šofer awta je w delnjej Bayerskej cyły rjad kolesow wobškodźił. Staršej w starobje 19 a 20 lět běštaj we wobchodźe kolesow w Pfarrkirchenje. W awće čakacy synk widźeše, zo bě nan klučik tčacy wostajił, a zaswěći motor. Awto něšto metrow doprědka zjědźe a wobškodźi před wobchodom stejace kolesa. Cyłkowna škoda wučinja 7 000 eurow.
To a tamne (11.05.16)
Z 30 lětami najstaršeho kocora swěta su wčera oficialnje do Guinnessoweje knihi rekordow zapisali. Scooter bydli w Texasu pola swojeje wobsedźerki, kotraž bě jeho jako małeho kocorka kupiła. Klima w Texasu kóčkam prawdźepobnje wosebje tyje: Najstarša hdy w Guinnessowej knize registrowana kóčka bě tohorunja wottam: Crème Puff bu 38 lět a tři dny stara. Scooter narodźi so 1986 – to běštaj Ronald Reagan prezident USA a Helmut Kohl zwjazkowy kancler.
Chětro drohi zmylk je so Čěskemu póstej stał: Na wurjadnej listowej znamce k 700. narodninam kejžora Korle IV. je zmylk: Město „Karolus Quartus“ za Korlu IV. steji tam „Karolus Quatrus“, kaž rěčnik předewzaća zwěsći. Nětko chcedźa nowe znamki wudać. Stare, kotrež smědźa so dale wužiwać, su wšak nětko zmylka dla mjez zběrarjemi ćim požadaniše.
To a tamne (10.05.16)
Ćěłowe awto zaso namakali su po nimale 24hodźinskim pytanju w Mnichowje. Pěšcy wuhladachu pólski ćěłowy wóz, w kotrymž ležeše zemrěta žona, njedaloko rěki Isar. Šofer je po zdaću woprawdźe zabył, hdźe bě awto wotstajił. 24lětny měješe ćěło z Italskeje do Pólskeje wjezć. Njedźelu bě so za přestawku w Mnichowje rozsudźił. Parkowanišćo pak pozdźišo wjace njenańdźe. Město toho pytaše w dospołnje wopačnej kónčinje wokoło hłowneho dwórnišća. Bjezradny prošeše wón na to policiju wo pomoc. Pokiwow na alkohol žanych njebě.
Do hłubiny padaca kruwa je w Pfalcy třěchu bydlenskeho domu wobškodźiła. Kaž policija zdźěli, bě skoćo njedźelu we Waldfischbachu z tři metry wysokeje skały padnyło, před kotrejž domske steji. Tam wottorhny dešćikowu rołu, při čimž so kaž dźiw jeno snadnje zrani. Kak bě kruwa na skału přišła, njeje jasne.
To a tamne (09.05.16)
Za ćěłowym awtom, w kotrymž leži zemrěta žona, pytaja wot wčerawšeho w Mnichowje. Njewuchadźeja pak z padustwa, kaž rěčnik policije zdźěli. Prawdźepodobnje šofer prosće wjace njewě, hdźe je awto wotstajił. Muž měješe ćěło z Italskeje do Pólskeje dowjezć. Njedaloko hłowneho dwórnišća je so za přestawku rozsudźił, ale parkowanišćo wjace njenańdźe. Hač měješe alkohol w sebi, njewědźa. Policija ludźi namołwja, zo bychu sobu za čornym ćěłowym awtom z běłymi zawěškami pytali.
Do twarskeje jamy padnyła je 23lětna žona w Ulmje, dokelž bě na swój smartphone hladała. W nocy na sobotu wona wotpowědnu warnowansku taflu runje tak přewidźa kaž zašlahane twarnišćo. Policiji žona pozdźišo w chorowni rozjasni, zo njebě telefona dla swój wobswět hižo na wědomje brała.
To a tamne (06.05.16)
Ze swojimi rolatorami su wobydlerjo starownje w awstriskim Mehrnbachu meju wróćo přiwjezli, kotruž běchu jim pokradnyli. Widejo z wobrazami njewšědneje akcije su sej ludźo w interneće mjeztym 34 000 króć wobhladali. Ratar senioram mejski štom hižo wjele lět darmotnje přewostaja. Runje tak je tam z nješwarnej tradiciju, zo mužojo z bliskeje korčmy štom kradnu, tak tež minjenu njedźelu. Tónkróć pak so šěsć wobydlerjow z rolatorami zhromadnje z hladarjemi na puć nastajichu a sej swoju meju wróćo přiwjezechu.
Kuna je wčera železnisku čaru mjez Berlinom a Drježdźanami zlemiła. Pola Wikowa (Elsterwerda) bě wona na milinowy sćežor zalězła a krótkospjeće zawiniła. Při tym kuna zahiny. Milinowód so roztorha a so w nimojěducym ćahu zapopadny. Čara bě wjacore hodźiny zaraćena.
