To a tamne (23.12.16)
Tójšto zboža měješe wopity muž w Nürnbergu, jako jeho železnica přejědźe. 21lětny ležeše po informacijach policije „chětro za alkoholom wonjacy“ na kolijach Nürnbergskeho dwórnišća. Lokomotiwnik přijěduceho spěšnoćaha njemóžeše hižo w prawym času zaborzdźić a přejědźe muža, kiž po dołhosći wosrjedź kolijow ležeše. Njezranjeneho dowjeze wuchowanska słužba natutkaneho muža do chorownje. Jeho drje nětko strašneho zapřimnjenja do železniskeho wobchada dla wobskorža.
Nowe rekordy drje lětsa zaso na Drježdźanskich dohodownych wikach nastaja. Město trochuje, zo budźe to 2,5 milionow wopytowarjow, kaž dźensa rěkaše. Loni bě jich 2,2 milionaj. Tež horce wino tam derje předawaja: Dotal bě to 730 000 hornčkow, 120 000 wjace hač před lětom. Hač do jutřišeho w 14 hodź. su dohodowne wiki hišće přistupne.
To a tamne (22.12.16)
Pašowaneje kóčki dla su žonu z Kanady na lětanišću w Nowoseelandskej wupokazali. Žona bě z Vancouvera přilećawši w Aucklandźe přizemiła. Zastojnikam zarjada za biowěstotu wona zataji, zo ma kóčku w ručnej tobole. To so hakle wukopa, jako chcychu cłownicy tobołu přepytować. Runu smuhu sadźichu žonu do přichodneho lětadła do Kanady. Nowoseelandska ma krute prawidła w zwisku ze zwěrjatami. Psy a kóčki njesmědźa do kraja, zo by so tam chorosćam zadźěwało.
Inscenowany rubježny nadpad za widejo budźe za fanow rapa w Kasselu droha wěc. Swědk bě policiju wołał, po tym zo bě nadpad na kiosk wobkedźbował. Zastojnicy přijědźechu z wjacorymi awtami. Wobsedźer kioska rozprawješe wo přećelach, kotřiž běchu jenož film natočili. Přiwšěm čaka na nich zličbowanka něšto stow eurow policajskeho zasadźenja dla.
To a tamne (21.12.16)
Z nowym internetnym portalom za žiwidła chce młode Berlinske předewzaće něšto přećiwo gigantiskemu brojenju žiwidłow w Němskej činić. Konkretnje posrědkuje wosebita app informacije wo nadbytku žiwidłow w gastrononiji. Tak wužiwar widźi, hač w bliskich hosćencach tajki maja. Za 1,50 hač do 4,50 eurow móže tam potom jěsć hić. 160 hosćencow w Berlinje so dotal na akciji „MealSaver“ wobdźěla. W Němskej mjetaja kóžde lěto jědnaće milionow tonow žiwidłow do wotpadkow.
Před wjele lětami pokradnjenu drastu a črije je policija na łuce pola Kaiserslauterna namakała. Drasta měješe samo hišće etikety wjacorych Kaiserslauternskich wobchodow, w kotrychž bu w lětomaj 2009 a 2010 pokradnjena. Policisća su po łuce rozbrojene rubjenstwo zezběrali a jako dar socialnym zarjadnišćam přewostajili.
To a tamne (20.12.16)
Dźiwje swinjo je so w Badensko-Württembergskej do fitnesoweho studija zadobyło a bu při tym samo filmowane. Kaž policija zdźěli, bě mějićel studija we Walldorfje minjenu nóc awtomatiski signal dóstał, zo je so něchtó do objekta zadobył, a alarmowaše policiju. Ta twarjenje wobstupi a je bjez wuspěcha přepyta. Nahrawanja kamery pokazachu přičinu: Dźiwje swinjo bě zachodne durje rozbiło a so hač do předrasćernje a k dušam dóstało. Jako spyta twochnyć, přełama hišće škleńčane durje. Snadnje zranjene wone dom skónčnje zaso wopušći.
Na wšě 57 lět přepozdźe je 72lětna New- Yorkčanka wupožčenu knihu wróćiła. „Nochcych kradnyć. Bě to młodźinska lochkomyslnosć“, rjekny wona nowinarjam. Knihu „Vom Winde verweht“ dyrbješe žona 18. nowembra 1959 w Brooklyn Public Library zaso wotedać. Po směrnicach knihownje by nětko tysac dolarow pokuty płaćić dyrbjała. Kniharnja pak bě z 50 dolarami spokojom.
To a tamne (19.12.16)
Spódnje cholowčki kralowny Victorije njejsu na awkciji žanoho kupca našli. Při přesadźowanju w juhozapadojendźelskim Wiltshiru njebě sobotu nichtó zwólniwy postajenu płaćiznu wudać, kaž rěčnica awkciskeho domu zdźěli. W prospekće bě rubjana spódnja drasta za něhdźe 5 000 eurow jako „w dobrym stawje ze snadnymi zabarbjenjemi“ zapisana. Queen Victoria knježeše wot lěta 1837 do 1901 we Wulkej Britaniskej a Irskej. Na minjenych awkcijach bě jeje spódnja drasta wjace hač 10 000 eurow wunjesła.
Z pistolu w myjerni awtow druhemu hrozył je muž w Kaiserslauternje. Tón bě so wčera ze swojim awtom do rynka čakacych tłóčił. Jedyn z čakacych šoferow jeho tohodla narěča. Na to wućahny „doprědkatłóčak“ pistolu a měrješe so z njej skrótka na 45lětneho, prjedy hač so ze swojim awtom njezminy.
To a tamne (16.12.16)
Wustawowe sudnistwo Čěskeje republiki je žadanje wobydlerja wotpokazało, swójske „wosobinske identifikaciske čisło“ změnić. Požadar ma dźě w dokumentach muski splah zapisany, po swójskim wuprajenju čuje pak so jako žona. Dokelž móžeš z čěskeho identifikaciskeho čisła splah wučitać, čuje so skóržbnik z přirjadowanjom k mužam „trawmatizowany“.
Dźakowano swojemu dobremu čuchej staj policistaj plantažu konopja namakałoj. W vogtlandskim Muldenhammeru jimaj wčera spodźiwna wóń napadny. Slědujo podhladnu wóń dóńdźeštaj ke kólni. Při přepytowanju tepjeneho twarjenja nańdźeštaj wjace hač 50 rostlin konopja (Canabis). Kólnja steji na ležownosći 39lětneho muža. Tón dyrbi so nětko ilegalneho plahowanja wopojnych srědkow dla zamołwić. Poprawom běštaj policistaj padustwa dla po puću.
To a tamne (15.12.16)
Dokelž njebě ručne spinadło přićahnył, jako chcyše wustupić, je muž we wuchodnej Friziskej swoje nowe awto přisadźił. Muž bě při něhdyšim zastanišću přewózneje łódźe při rěce Ems zastał. Při wustupjenju dyrbješe přihladować kak štyri tydźenje stare awto po nahłej skłoninje runu smuhu do rěki zjědźe a so podnuri. Wohnjowa wobora dospołnje skóncowany wóz zaso z wody wućahny.
Dočasne narodninske zbožopřeća přinjesu njezbožo. Na to je bamž Franciskus wěriwych skedźbnił, kotřiž běchu jemu na wčerawšej generalnej awdiency w Romje k 80. narodninam gratulowali, kotrež bamž zajutřišim, sobotu, swjeći. „W mojej domiznje přinjese wulke njezbožo, hdyž přezahe gratuluješ“, wón rjekny. Přichwatani běchu bamžej tortu darili, na kotrejž běchu swěčki w formje 80. nastajane. Bamž zamó wšitke wuduć.
To a tamne (14.12.16)
Z karu je 14lětny spytał 114 kilogramow praskotakow do Berlina pašować. Na němsko-pólskej mjezy w Frankfruće nad Wódru pak zastojnicy jeho z dźewjeć kistami ilegalneje pyrotechniki lepichu. Z regionalnym ćahom bě so młodostny wčera z něhdźe 8 600 praskotakami na puć do Berlinskeho měšćanskeho dźěla Wedding nastajił. Skedźbliwa wodźerka taksija, kotraž bě jeho na ćah dowjezła, pak zawoła policiju.
Znata rjekowka Wonder Woman njeje hižo dlěje pósłanča UNO. Comicowa figura chcyše so poprawom za zesylnjenje žonow w towaršnosći a boju wo runostajenje angažować. To pak zbudźi protest, dokelž njezastupuje figura feministiske zaměry. Zjednoćene narody su tuž nětko zhromadne dźěło z Wonder Woman zakónčili, zdźěli nakładnistwo, w kotrymž comic wuńdźe.
To a tamne (13.12.16)
Bjez woprawdźiteje šansy bě paduch přećiwo policajskemu psej na awtodróze A 12 pola Frankfurta nad Wódru. Kaž zwjazkowa policija zdźěli, chcyše wona dźensa rano transporter kontrolować. Šofer pak jědźeše dale. Njedaloko wotjězda Müllrose wón zasta, skoči z awta a ćěkaše pěši dale. Policajski pos Ivo pak bě spěšniši hač 24lětny paduch a jeho na polu zadźerža. Zastojnicy móžachu muža zajeć. Po wšěm zdaću bě wón transporter w nocy w Berlinje pokradnył.
Přihotujo 80. narodniny bamža Franciskusa přichodnu sobotu je Vatikan we wjacorych rěčach e-mailowe konta zarjadował, zo móhli jemu ludźo gratulować. Pod móža to w němskej rěči činić. Tež łaćonsku, jendźelsku a pólsku adresu su zarjadowali, kaž Vatikan zdźěla. Bamž sam wšak změje po rańšej Božej mši w Romje skerje „normalny dźěłowy dźeń“.
To a tamne (12.12.16)
Z kolesom w podkopkach po puću bě wčera něhdźe sto mountainbikerow w durinskim Merkersu. W podzemskim arealu dožiwjenskich podkopkow, hdźež wudobywachu hač do lěta 1990 kali, knježi ćopłota hač do 28 stopnjow. Kolesowanska jězba w swětle lampow, kotruž tam wjackróć wob lěto poskićeja, wjedźe hač do 800 metrow hłuboko a 20 kilometrow daloko.
Dospołnu kontrolu nad narodninskej party zhubił je 16lětny w badensko-württembergskim Hohentengenje. Něhdźe 80 njeprošenych hosći zapusći bydlenje młodostneho, po tym zo běchu so informacije wo planowanym swjedźenju internetnje šěrili. Na kóncu dyrbješe policija zakročić. W bydlenju nańdźe wona 50 młodostnych a dospołnje přežadaneho 16lětneho. Policija swjedźeń skónči a pósła „hosći“ domoj.
