To a tamne (02.05.17)
Kuriozna zwada wo předań praženych kołbaskow při płoće awtodróhoweho parkowanišća durinsku justicu dale zaběra. Tuchwilu čakaja na rozsud Weimarskeho wyšeho zarjadniskeho sudnistwa, hač rewiziju přećiwo rozsudej prěnjeho sudnistwa dopušća. Mějićelka předawanskeje budki při A 9 jězdźerjam wozydłow mjeztym dale kołbaski a kofej poskića, a to přez dwaj metraj wysoki płót. Wotpowědny zakaz města bě sudnistwo w Gerje w prěnjej instancy wobkrućiło.
Problemowy baćon Ronny, kotryž bě loni braniborsku wjes Glambeck ze swojimi atakami terorizował, tam zaso je, kaž wjesna předstejićerka wobkrući. Loni bě wón z pyskom stajnje zaso do awtow a woknow dypał, hdyž so tam w špihelu widźeše. Naposledk wěšachu ludźo płachty před wokna, zo bychu so škitali.
To a tamne (28.04.17)
Ze 37 lětami hižo 38 dźěći porodźiła je Ugandźanka Mariam Nabatanzi. Tole su zamołwići kraja oficialnje wobkrućili. Trójce bě žona dwójniki porodźiła, štyri razy trójniki a trójce samo štwórniki. Dźěći pochadźeja wot samsneho nana. Najstarše dźěćo je mjeztym 23 lět, najmłódše štyri měsacy. Swójba we wsy Kabimbiri, połsta kilometrow zwonka stolicy Kampala, bědźi so z pjenježnymi problemami. Regionalni politikarjo namołwjeja ludźi, swójbu podpěrać.
Krokodila na zahrodźe namakali su awstralscy wohnjowi wobornicy, jako w Darwinje palacy so dom hašachu. Swójba dźeržeše mjeztym 70 lět stareho a štyri metry dołheho rjapnika Alberta kaž domjace zwěrjo, samo z dowolnosću zarjadnistwow. Mjeztym zemrěty wobsedźer domu bě krokodila 1958 w rěce popadnył.
To a tamne (27.04.17)
Přeswědčeny, zo je w swojim bydlenju, je so pjany muž dušował. Jako wobydlerka w badensko-württembergskim Mainhardće jeho wuhlada, zamkny so z dźěćimi do druheje stwy a zawoła policiju. Na prašenje zastojnikow, hdźe bydli, jim wopity rjekny: „Nó tule.“ Poněčim jemu switaše a wón so pola žony zamołwi. Muž bydleše někotre hasy dale. Do bydlenja žony bě so dóstał, dokelž njebě zamknjene.
450 eurow pokuty dyrbi němska turistka płaćić, dokelž je so w sławnej Trevi-studni w Romje kupała. Policisća běchu ju při tym lepili. Čehodla je 60lětna do studnje zalězła, kotraž bu přez nócne kupanje Anity Ekberg w filmje „La Dolce Vita“ swětosławna, dotal njewědźa. Turisća studnju stajnje zaso wužiwaja, zo bychu so spektakularnje prezentowali. Zamołwići města spytaja, kupacych z wysokimi pjenježnymi chłostanjemi wottrašić.
To a tamne (26.04.17)
Na kruwje jěchać – tole njeje w Delnjej Sakskej, hdźež maja wjele koni, runjewon samozrozumliwe. W friziskim Ellenserdammje třinaćelětna Hanna prawidłownje na chribjet kruwy Luny zalěze, zo by z njej po łuce jěchała. „To cyle derje funguje, dokelž je Luna wot naroda sem na mnje zwučena“, Hanna při sedłowanju Luny do wujěchanja rjekny. Trab, galop a skoki přez niske zadźěwki su móžne. Jako myto dóstawa Luna chłóšćenki, kaž na přikład rozkrate jabłuka.
Tysacy litrow brěčki z fabriki su ruske městačko Lebedjan na juhu kraja zapławili. Twarjenje brěčkarnje bě so wčera zdźěla sypnyło, při čimž so dźěłaćerjej zraništaj. Brěčka so do wokolnych hasow a do bliskeje rěki Don wuliny. Kaž zamołwići informowachu, maja woni połoženje pod kontrolu. Čehodla je so twarjenje zwjezło, pak hišće njewědźa.
To a tamne (25.04.17)
Z wostudy na chorołožu je štyrilětna holca nakupować šła. Jako chcyše w drogeriji w frankskim Bad Kissingenje sama při kasy stejo nakup w hódnoće 50 eurow z kapsnymi pjenjezami – runje tři eura w lutych centach – zapłaćić, ju předawarka narěča. Sprawnje holčka wuzna, zo njesmě chorosće dla do pěstowarnje a zo so jej wostudźi. Přećel maćerje bě na nju kedźbował. Holčka pak so we wokomiku njekedźbnosće zminy. Policija přepoda holcu mužej, kiž bě so hižo přizjewił.
Při wobdźěłanju panochtow je kruwa Kuki w badensko-württembergskim Böblingenje ćeknyła a železniski wobchad zlemiła, po tym zo bě na kolije běžała. Skoćo njeda so ani wot wobsedźerja ani wot přećelow a policije popadnyć. Skótnej lěkarce so poradźi kruwu pohłušić. Dowjezechu ju wróćo k ratarjej. Při honjeńcy wšak bě Kuki štyri awta wobškodźiła a 5 000 eurow škody zawostajiła.
To a tamne (24.04.17)
Pěši a bjez nawigaciskeho nastroja je so šofer nakładneho awta zabłudźił. 32lětny bě swój Lkw sobotu popołdnju na parkowanišću při awtodróze A 4 njedaloko Kodersdorfa wotstajił, zo by so trochu w lěsu přechodźował. Při tym pak orientaciju zhubi. Jako we wječornych hodźinach lěs wopušći, bě w šěsć kilometrow zdalenym Nieder Seifersdorfje. Wobydler informowaše policiju, kotraž šofera Lkw-ja zaso na parkowanišćo wróćo dowjeze.
Swoje New-Yorkske luksusowe bydlenje předała je hrajerka Demi Moore. Po informacijach medijow je jej njeznaty kupc za třiposchodowy apartement 45 milionow dolarow zapłaćił. Bydlenje na 28. poschodźe ma pjeć spanskich stwow a nimo toho hobersku terasu, z kotrejež město přewidźiš. Moore bě 1990 bydlenje za sydom milionow dolarow kupiła.
To a tamne (21.04.17)
Dospołnje rozhorjeny, dokelž njeměješe krajnoradny zarjad w braniborskim Prenzlauwje zawčerawšim, srjedu, žane rěčne hodźiny, je muž tam wohnjowy alarm zawinował. 31lětny bě papjeru zapalił, na čož alarmowy system reagowaše, policija zdźěli. 25 přistajenych móžeše so wuchować. Woheń hasny, po tym zo bě papjera spalena. Muž chcyše po swójskich wuprajenjach swój wupokaz wotewzać. Policisća jeho ranjenja domjaceho měra dla nachwilnje zajachu.
Policija pyta dale za njeznatym, kiž bě jutry w Konstanzu sta eurow rozdźělował. Tež dźensa hišće njewědźachu, štó wony dobroćiwy darićel je. „Pytamy za tutym čłowjekom“, rěčnik policije zdźěli. Papjerjane pjenjezy w hódnoće 20 a 50 eurow tčachu při woknach awtow abo w listowych kašćikach. Ludźo běchu na to policiju informowali. Zastojnicy pjenjezy zezběrachu, zo bychu pruwowali, hač pochadźeja z njeskutka.
To a tamne (20.04.17)
Pobrachowacych doktorowych a druhich titulow dla dyrbja w Münsteru něhdźe 9 000 wólbnych zdźělenkow znowa rozesłać. Při programěrowanju čišćakow je so misnjenje stało. Tak njeběchu akademiske abo zemjanske titule widźeć. Potrjecheni dóstanu nowu zdźělenku za wólby krajneho sejma 14. meje. Přiwšěm na to skedźbnjeja, zo smě kóždy jenož jónu wolić hić, byrnjež dwaj lisćikaj měł.
Z fantomowym wobrazom pyta policija w Heidelbergu za rubježnikom nohajcow. Dotal njeznaty bě minjeny tydźeń kolesowarku z nožom w ruce nuzował, jemu nohajcu přepodać. Njeznaty na to ćekny. Do toho bě wón dalšu kolesowarku wohrožował a sej nohajcu žadał. Ta pak móžeše ćeknyć. Motiwy muža njejsu znate. Policija wšak nima wěc za žortnu. Skućićel je pječa 25 lět stary.
To a tamne (19.04.17)
Něhdźe 400 eurow je dotal njeznaty jutry w Konstanzu rozdźělował. Pjenjezy tčachu při woknach awtow abo w listowych kašćikach, policija zdźěli. Pjenjezy w hódnoće 20 a 50 eurow běchu ze symbolemi pomolowane, kotrež so tež w interneće wužiwaja. Policija nětko pruwuje, hač móhli pjenjezy z njeskutka pochadźeć. Dotal wšak žane pokiwy za to nimaja. W tym padźe směli wobdarjeni pjenjezy wězo wobchować, rěčnik zdźěli.
Preč ćisnjeny zbytk cigarety je w Koblencu tójšto mjerzanja zawinował. 41lětny šofer wosoboweho awta bě jón z wokna šnypnył. Myslo sej, zo je wětřik cigaretu na zadnju ławku awta stłóčił, so muž za njej wobhladowaše. Při tym zajědźe na prawy bok, zrazy do parkowaceho awta a je na před nim stejace awto suny. Wšitke tři awta dyrbjachu wotwlec. Policija trochuje škodu na 11 000 eurow.
To a tamne (18.04.17)
Kotre jejko je najtwjerdše? Tole bě hesło wubědźowanja na wikach w badensko-württembergskim Leutkirchu. Prawidła při tymle zarjadowanju su cyle jednore. Dwaj wobdźělnikaj bijetaj swojej warjenej jejce na hornim a delnim kóncu hromadźe. Jejko, kotrež njeje so rozbiło, je dobyło. Mjeztym maja wobdźělnicy wubědźowanja samo wěstu strategiju, kak swoje jejka wosebje twjerde zwarja.
Wosrjedź jutrownych prózdnin su młodostni w Münsteru ludźi na spontanu party do sportoweje hale přeprosyli. Do toho pak běchu so do njeje zadobyli. Za slědowacy swjedźeń žadachu sej samo zastup. Kedźbliwemu susodej bě skónčnje napadnyło, zo so sobotu wječor a w prózdninach njewšědnje wjele młodych ludźi na šulskim dworje zetkawa a tuž zawoła policiju. Zastojnicy ilegalne zarjadowanje zakónčichu.
