Awtor dźensa

Clemens Šmit

„Póstnicam sym clown so přehotował …“ – to je sej zawěsće tež někotryžkuli hrajer z Mnichowa sobotu wječor po top-hrě přećiwo Bayer 04 rjekł. 3:0 su koparjo z Leverkusena poprawneho ligoweho primusa porazyli. Njebě pak jenož jasny rezultat poražki, kotryž dyrbjał trenarja Bayerow z Mnichowa, Thomasa Tuchela zaběrać. Tež cyłkowny mustwowy wukon njewotpowědowaše duelej prěnjeho přećiwo druhemu. To dopokazaja tež ličby sportoweho portala KICKER. Tak njeje sej mustwo po jich ličenju w běhu cyłeje hry přećiwo Leverkusenej ani jednu woprawdźitu šansu z wotzamknjenjom na přećiwniske wrota wuhrało! Jako dopomnjenka: Za Bayerow su zašłu sobotu mjez druhim Kane, Musiala a Sane zasadźeni byli. Hižo­ wot lěta 1989 zběraja reporterojo KICKERa­ tute ličby. Bayeram bě so dotal jenož dwójce poradźiło w hrě bjez šansy wostać – 1995 přećiwo Rostockej a zašłu sobotu.

Awtor dźensa

Křesćan Korjeńk

Awtor dźensa

Michał Nuk

Wot wjedra je tele lěta tójšto wotwisne w zymskim sporće. Tež tuchwilna zyma běše dotal chětro měnjata. Před dwěmaj tydźenjomaj hišće swarjachu biatleća, jako dyrbjachu so na brunoběłej šlebjerdźe zeškrabaneho zbytka sněha w durinskim Oberhofje šmjatać, zo tute stejnišćo za mjezynarodne wubědźowanja hladajo na změnu klimy hižo žadyn přichod nima. A nětko, minjeny kónc tydźenja, prezentowachu so samsne lojpy w najrjeńšej běłej krajinje, jako specialisća-sněhakowarjo tu za dypkami w swětowym cupje honjachu. Za Němsku činja to runje z wulkim wuspěchom předewšěm žony, nawjedowane wot Kathariny Hennig a Victorije Carl. Wobě startujetej za wuchodoněmskej towarstwje z Rudnych horin a Durinskeho lěsa. Za swoje medalje a dalše prědnje městna w jednotliwych kaž tež staflowych wubědźowanjach pak bychu sej poprawom runje telko publikuma zasłužili, kaž biatleća spočatk lěta.

Awtor dźensa

Tadej Cyž

Nowe lěto je so započinało a swět sporta so hižo razantnje wjerći. Nimo toho zo so přichodny kónc tydźenja w zwjazkowej lize zaso za bulom honi, je wjeršk w januarje zawěsće europske mišterstwo w mjetańcy. Tu maja němscy mužojo domjacu lěpšinu a startuja přećiwo Šwicarskej do turněra. Kuriozum při tym je, zo přewjedźe so hra w Düsseldorfskim koparskim stadionje. Dalše hrajne města budu Mannheim, Mnichow, Berlin a Köln. Jara młode mustwo narodneho trenarja Gislasona njeliči tónraz k wulkim faworitam. Ale snano je runje to přijomnišo za němski cyłk. Tak njeje ćišć přewulki.

Dalše wulke sportowe zarjadowanje budźe swětowe mišterstwo wot 7. do 18. februara w biatlonje. Tute wotměje so pola našich susodow w Čěskej. Cyłkownje 12 rozsudow padnu w Nowym Měsće na Morawje. Tež němske biatlonowe mustwo ma šansy na medalje.