Nowe wuhladnišćo na Horjanskim jězoru
Hory (SN/SiR). Wuhladnišćo na Horach w gmejnje Halštrowska Hola je domoródnym kaž cuzym fotografam woblubowane zetkanišćo a wobkedźbowanišćo. Tež filmytwórcy a přećeljo přirody su tam hižo rjane wideja a wobrazy zapopadnyli. Kolesowarjo a pućowarjo tam runje tak rady pozastawaja.
Z drjewjaneho pawiljona maš rjany wuhlad na Horjanski jězor. W aprylu 2008 su wuhladnišćo přepodali. Zwjetša je tam wšitko čiste a porjadnje zawostajene. Wo wotstronjenje wotpadkow stara so gmejna Halštrowska Hola.
W minjenych tydźenjach so wobraz wuhladnišća trochu změni. Tak připrawichu tam nowy płót, zo móhli wopytowarjow lěpje wodźić. Móžno bě to dźakowano crowdfundingowej akcije Wuchodosakskeje lutowarnje Drježdźany, z kotrejž su podpěraćeljo naprawy wjac hač 4 000 eurow nazběrali. Nasypana bu před wuhladnišćom nětko wosebita měšeńca kamuškow, kotrež chcedźa za nowy pućik wužiwać. „Zdobom je hišće dalši škitny płót předwidźany, zo móža pawiljon jenož hišće pěšcy abo ludźo z jězbnym stołom wužiwać“, rozłožuje nawoda přirodoškitneho projekta Łužiska jězorina dr. Alexander Harter.
Butra ma w Serbach wosebity wuznam
Wudźěłk wulkeje hódnoty hižo 3 000 lět do Chrystusa zhotowjeli a wužiwali a to nic jenož k jědźi
Tež w serbskich přisłowach jewja so wšelke zajimawostki kołowokoło butry, pokazowace na jeje wuznam:
• Mjasa so zminyć njej’ ćežko, hdyž wobjedy z butru a wolijom kipja.
• Běłe jutry lubja mało butry.
• Włóžne jutry wěšća wjele butry.
• Zelene jutry wěšća smjetanki butry.
• Chłóšćak rodźi wšak wo suchi chlěb, ale dosć lěpjeny z butru, a něšto morweho swinjeća zwjercha.
• Na łuku hnój – wunoša butru a łój.
• Dźěd dźědźi měd a wowka butru tołka.
• Butra budźe ći žołta, jenož sykaj kruwičce morcheje.
Na blido twaroh a na wiki butru.
Přilij Bóh, zo so na butru šlachći.
Butra w Serbach předewšěm hladajo na nałožki wokoło kwasow wažnu rólu hraje. Kajki wuznam wona ma? Kak so dźěła? Štó ju dźensa zhotowja? Kotre nałožki su kołowokoło butry pěstowali abo dźensa hišće pěstuja?
Butra je žórło energije
Serbow w Budyšinje zetkać
Stajnje zaso wobhonjeja so turisća za serbskimi poskitkami w kónčinje. Hosćencarjo abo mějićeljo hotelow to stajnje zaso nazhonjeja. Brošurka móžnosćow pak w Hornjej Łužicy dotal hišće žana njeje. Towarstwo Serbski kulturny turizm (SKT) problem znaje a chce nětko wšelke poskitki zestajeć.
Budyšin (SN/BŠe). „Chcemy wosebity dźeń z turistikarjemi přewjesć a jich na knihujomne móžnosće w Budyšinje skedźbnjeć“, rjekny předsyda SKT Pětr Brězan na póndźelnym wuradźowanju čłonow towarstwa w Budyskim Serbskim domje. Tak mjenowany Fam-trip chcedźa 13. nowembra wotměć. Potom je pódlanska sezona a akterojo móža sej čas lěpje zarjadować. Na přeprošensku turu chcedźa zastupjerjow turistiskich informacijow, sobudźěłaćerjow hotelow a knihowanskich agenturow witać. Zapřijeć dyrbjeli tež hotele ze Zhorjelca a Drježdźan kaž tohorunja busowe předewzaća, čłonojo na posedźenju namjetowachu.
Předewzaća přeja dobru jězbu
Železniski bliskowobchad na wuchodźe Sakskeje je hač do lěta 2031 zawěsćeny. Minjeny pjatk su zamołwići wobchadnych zwjazkow ze Sakskeje a Čěskeje zrěčenje z Krajnej železnicu podpisali.
Budyšin (SN/BŠe). Ludźo často twjerdźa, zo njeje železniska syć na wuchodźe Sakskeje atraktiwna dosć. To pak ma so po słowach Budyskeho krajneho radu Michaela Hariga (CDU) bórze změnić. Jako předsyda wobchadneju zaměroweju zwjazkow Hornja Łužica-Delnja Šleska a Hornje Łobjo chwaleše wón nowe zrěčenje z Krajnej železnicu (Länderbahn). „Smy docpěli, zo komfort a kwalita přichodnje přiběratej“, wón wuzběhny. „Chcemy zaso železniski kraj być.“ Šansu, to docpěć, widźi krajny rada w strukturnej změnje. Tak so nadźija, zo je nětko podpisane zrěčenje poslednje na zakładźe z dieselom ćěrjenych ćahow. Přichodne měło na zakładźe elektrifikacije nastać. „Přeju tuž wšěm dobru jězbu do přichoda“, Michael Harig podšmórny.
Pola Maja wažny měznik docpěli
Kulow/Drježdźany (SN/BŠe). Mjezywuslědk tarifowych jednanjow mjez dźěłarnistwom IG metal a předewzaćom Maja w Kulowje předleži. Wot minjeneho štwórtka je jasne, zo ma zakład jednanjow tarifowe zrěčenje mjez sakskej drjewowej a kumštnej industriju być. Nimo toho chce zawod přistajenym w juliju jónkrótnje 500 eurow płaćić. Hladajo na dotalne jednanja je to wěsty měznik. Hižo 16. meje su zastupjerjo dźěłarnistwa a zawoda w Drježdźanach mjeztym štwórty raz zhromadnje jednali. Wobzamknjenym dypkam pak dyrbjachu hišće wšelake gremije přihłosować. Nětko smědźa so dźěłaćerjo nad wjace pjenjezami do lěća wjeselić.
Hakle 16. apryla běchu třeće koło tarifowych jednanjow w Kulowskim zawodźe Maja přetorhnyli. Dźěłodawar njebě so hižo po dojednanjach zašłeje rozmołwy měł, kaž dźěłarnistwo tehdy zdźěli. Tak předpołoži zawod swójski poskitk mzdy, kotryž pak njeje so wot minimalneje mzdy wulce rozeznawał. Dźěłarnistwo tuž připowědźi dale ćišć wukonjeć.
Za projekt do Kambodźe wupućuja
Młoda swójba chce chudym ludźom pomhać a zwaži so na woprawdźity dyrdomdej w mało znatym kraju Azije
Kambodźa je kraj w juhowuchodnej Aziji a leži mjez Thailandskej, Laosom a Vietnamom. Stolica stata je Phnom Penh. Kraj je něhdźe poł tak wulki kaž Němska. Wulki problem maja tam z lěsnistwom. Drjewowa industrija je hoberske škody zawostajiła. Wot lěta 1969 do 1997 je so cyłkowna lěsna płonina kraja 73 procentow na 58 procentow pomjeńšiła, kaž z rozprawy Swětoweje banki wuchadźa. W Kambodźi bydli něhdźe 16 milionow ludźi. Starobny přerězk je 24,9 lět. Po trochowanju UNICEF ma Kambodźa 670 000 syrotow.Katharina a Julius Döhler z Lipska chcetaj zhromadnje z dźěsćomaj lětsa w juliju do Kambodźe hić, zo byštaj tam chudym ludźom pomhałoj. Wobaj pochadźataj poprawom z Łužicy, staj pak so před lětami w Tansaniji zeznałoj. Nicole Zimmermannec je so z młodymaj mandźelskimaj rozmołwjała.
Předstajtaj so prošu skrótka.
K. a J. Döhler: Smój Katharina a Julius z Lipska a mamoj pjećlětneho synka Jakuba a dwulětnu dźowčičku Charlotte. Smój so rozsudźiłoj lětsa do Kambodźe wupućować.
Z lochkim, ale kwalitatiwnym wačokom do přichoda
Z temu „Wo přichodźe z Krabatom znowa rozmyslować“ zaběraše so wčera něhdźe 40 zastupjerjow komunalneje politiki,organizacijow a towarstwow. Tak hódnoćachu dotalne dźěło Krabatoweho towarstwa.
