Reprezentatiwne, abo?
Złota nazyma wjace ludźi přiwabiła
Rjane nazymske wjedro loni je so po wšěm zdaću pozitiwnje na turistiski wobłuk wuskutkowało. Tak je wjac ludźi region wopytał, hač lěto do toho. Přiwšěm je hišće dosć přenocowanskich kapacitow.
Budyšin (SN/BŠe). Dale a wjac ludźi rozsudźa so za přebytk we Łužicy, zdźěli Marketingowa towaršnosć Hornja Łužica-Delnja Šleska (MGO). Wosebje zwjesela, zo je sej loni nazymu wjele dowolnikow kónčinu zbližiło. Hladajo na ličby přenocowanjow wozjewjeja turistikarjo jara dobre wuslědki. Cyłkownje bě to mjenujcy 15 procentow wjace přebytkow hač lěto do toho. Kóždy dźesaty hósć, kiž je nazymu Saksku wopytał, přebywaše w Budyskim wokrjesu. Přerěznje wostachu ludźo 2,7 dnjow w kónčinje, štož stej 0,2 dypkaj wjace hač sakski přerězk. Přiwšěm je w hotelach, pensijach atd. hišće dosć kapacitow, hdźež móhli ludźo za čas dowola přebywać, su sej turistikarjo přezjedni.
Bjezdźěłnosć wjedra dla přiběrała
Zwólniwosć hornjołužiskich zawodow, ludźi přistajić a jim dźěło dać, je nadal wulka.
Budyšin (CK/SN). Kónc decembra 2019 bě w Hornjej Łužicy 16 724 ludźi bjez dźěła přizjewjenych. To je 630 wjac hač w nowembrje. Přičinje za stupacu ličbu bjezdźěłnych drje stej wjedro a počas, po słowach operatiwneje jednaćelki Budyskeje agentury za dźěło Ilony Winge-Paul pak je to skerje snadne stopnjowanje. Porno decembrej 2018 běchu 1 703 wosoby mjenje wot bjezdźěłnosće potrjechene. W lěće 2014 bě 28 934 ludźi bjez dźěła. Najwyšu hódnotu za december wupokazuje statistika z 72 268 potrjechenymi we wuchodnej Sakskej kónc lěta 2002.
Tuchwilu stara so dźěłowa agentura wo 5 323 bjezdźěłnych, jobowe centery wokrjesow Budyšin a Zhorjelc wo 11 401 bjezdźěłneho. Kwota bjezdźěłnosće wučinja we wobłuku Budyskeje agentury za dźěło cyłkownje šěsć procentow, při čimž su regionalne rozdźěle chětro wulke. W Kamjenskim wobłuku wučinja bjezdźěłnostna kwota 3,1 procent a w Zhorjelskim 10,1 procent. „Robustne dźěłowe wiki a miłe wjedro pokazuja swoju skutkownosć“, rjekny Winge-Paul na njedawnym předstajenju ličbow bjezdźěłnosće w Budyšinje.
Planuja mnohe naprawy
Budyšin (AK/SN). Łužiska jězorina ma po wotewrjenju Kóšynskeho kanala w lěće 2013 a Borborineho kanala loni dalše atraktiwne łódźne zwiski dóstać. To připowědźi nawoda saněrowanskeho wobłuka pola Łužiskeje a srjedźoněmskeje towaršnosće hórnistwoweho zarjadnistwa (LMBV) Gerd Richter na njedawnej zhromadźiznje planowanskeho zwjazka Hornja Łužica-Delnja Šleska w Budyšinje. „Tuchwilu planujemy mjez druhim zwisk mjez Parcowskim a Nowołučanskim jězorom“, wón wujasni. Hač do kónca lěta 2019 přepruwowachu dwě warianće. Nětko chcedźa twar zwoprawdźić. Wot lońšeho februara dźěłaja na 50 metrow dołhim zwisku mjez Blunjanskim južnym a Nowołučanskim jězorom, hdźež je mjez druhim móst předwidźany.
Kaž Gerd Richter dale rozprawješe, pokročuja tež z dalšimi naprawami w jednotliwych jězorach. W Parcowskim jězorje neutralizuja ph-hódnotu, za čož zasadźeja łódź z mjenom Klara. Łódź sypa wapno do wody, tak zo hodźi so hódnota regulować.
Čaj, žałby a tinktury za swójske derjeměće
Drježdźanske předewzaće Seifertec zela sej w Budyšinje krute stejnišćo wutworiło
Na přirodnych wikach biosferoweho rezerwata Hornjołužiska hola a haty, na Ramnowskich lenowych dnjach abo hdys a hdys tež na Budyskich zelenych wikach wosrjedź tydźenja poskića předewzaće Seifertec zela z Drježdźan wulki wuběr přirodnych wudźěłkow, štož sej ludźo jara waža. Mjeztym maja w Budyšinje wobchod na Bohatej hasy, a swěrni kupcy jón rady wopytuja.
Su optimistiscy
Drježdźany (dpa/SN). Rjemjeslnicy w Sakskej zhladuja optimistisce na nowe lěto. „We wšěch branšach su nimale wšitke nadawkowe knihi derje pjelnjene“, zdźěli prezident Sakskeho rjemjeslniskeho zwjazka Roland Ermer powěsćerni dpa. Hladajo na konjunkturu nutřkokrajneho hospodarstwa su wuhlady pozitiwne. Roland Ermer njeliči z tym, zo so w tym wobłuku něšto změni. Kupcy, kotřiž chcedźa nadawki mjeńšim sakskim rjemjeslniskim zawodam přepodać, maja tuchwilu něhdźe jědnaće tydźenjow čakać. Rjemjeslnistwo profituje dale z wulkeje wole priwatnych konsumentow, něšto do wobsydstwa inwestować, wšako su danje dale na niskim niwowje.
Wot noweje sakskeje koalicije CDU, Zelenych a SPD sej Roland Ermer žada, rjemjeslnikow podpěrać. W městach a na wsach měli jenake ramikowe wuměnjenja za dualne wukubłanje abo powołansku samostatnosć knježić.
Sakski rjemjeslniski zwjazk zastupuje wjac hač 56 000 předewzaćow swobodneho stata, kotrež maja něhdźe 320 000 ludźi přistajenych. Prezident zwjazka Roland Ermer pochadźa z Njedźichowa a ma tam swójsku pjekarnju.
Bursa nawrótnikow wjacore sta zajimcow přiwabiła
Budyšin (CS/SN). Mjeztym 6. hodowna bursa Budyskeho wokrjesa za nawrótnikow „zaso tu“ přiwabi mnohich zajimcow, kiž běchu dźěła dla před lětami do starych zwjazkowych krajow wotešli, kotřiž pak su nětko na wopyće w swójbach abo pola přećelow w domiznje přebywali. Lěpšeje situacije na dźěłowych wikach dla chce wokrjes runje jich zdobyć, zo bychu so do Hornjeje Łužicy nawróćili. Wšako knježi w mnohich tudyšich zawodach wulka potrjeba fachowych mocow. Lětuša bursa wotmě so zańdźeny pjatk w Powołanskošulskim centrumje za hospodarstwo a techniku na Budyskich Schillerowych zelenišćach. Kaž Andrea Prager z wobłuka hospodarske spěchowanje wokrjesa rjekny, běše zarjadnišćo wokrjesa, hdźež běchu wiki dotal přewjedli, přemałe. Lětsa je so 66 předewzaćow z rjemjesła, industrije a posłužbow prezentowało. Dale běchu bydlenskotwarske firmy pódla, kotrež nawrótnikam pomhaja bydlenje namakać.
Po měsacy trajacym přetorhnjenju suchoty dla su tele dny započeli ...
Wokrjes Budyšin hišće zastarany
Medicinske zastaranje wobydlerjow Budyskeho wokrjesa je tuchwilu zaručene, kaž sakske zjednoćenstwo kasowych lěkarjow wobkrući. To pak njewuzamkuje, zo su tu abo tam ćeže falowacych fachowych medicinarjow dla.
Budyšin (SN/BŠe). Demografiske wuwiće a wotchad ludźi z wjesnych kónčin wjedźetej k problemam. Cyle konkretnje su to ćeže, zo dale a wjac młodych lěkarjow, hladarjow abo chorobnych sotrow radšo we wjetšich městach dźěła hač na wsy, zdźěli sakske zjednoćenstwo kasowych lěkarjow na naprašowanje SN. Tajkemu trendej pak hodźi so zadźěwać. Tohodla su politika, gmejny, wšelake gremije a chorobne kasy namołwjene hromadźe dźěłać a rozrisanje nańć.
Sakske zjednoćenstwo kasowych lěkarjow dźěła zaměrnje na tym, něšto změnić, a zasadźa we wosebje potrjechenych kónčinach Sakskeje spěchowanske srědki. Prěnje płody móžachu hižo žnjeć. Tak su we Łutach, Kamjencu, Wojerecach, Bukecach a Rakecach k tomu přinošowali, zo su so nowi domjacy lěkarjo w regionje zasydlili. Přiwšěm hrozy tež dale strach, zo njebudu ludźo medicinsce dosć zastarani.
