Hóznica (JoS/SN). Wiki tak mjenowanych koi-karpow minjeny kónc tydźenja bě za rybarske předewzaće Armina Kittnera w Hóznicy (Petershain) pola Niskeje takrjec dwójne žohnowanje. Skónčnje je so zaso raz trochu wjace a wobstajnje dešćowało. A najebać dešćik je sobotu tójšto zajimcow přijěło, zo bychu sej wosebite koi-ryby a dalše eksemplary za swoje zahrodowe a hinaše haty wobstarali.

Armin Kittner je nazhonity rybar, ale wuskutki horcoty a suchoty minjeneho lěta njeje hišće tak prawje předźěłał. A hižo prašeja so wón a jeho kolegojo, što drje lětsa budźe. Prognozy za hatarjow předobre njejsu. „Hižo nětko, něhdźe šěsć tydźenjow prjedy hač loni, mamy samsny njespokojacy staw“, Kittner rozłoži. „Dokelž w zymje přewjele sněha njebě, njemóžeše tež žadyn tać, a w aprylu njeběchu nimale žane spadki. Mjeztym je přidatna woda w hatach, kotrež smy w zymje sčasom napjelnili, nimale zaso pře­trjebana.“ Nětko samo wodu z hrjebjow do hatow klumpaja. Hdyž pak tež w hrjebjach ničo njeje, je kónc.

Towarstwa trjebaja stajnje zaso podpěru, zo móhli swoje projekty zwoprawdźić. Nowy program Budyskeje wo­krjesneje lutowarnje jim nětko pjenjezy zběrać zmóžnja.

Budyšin (SN/BŠe). Towarstwa maja zwjetša wulku ličbu čłonow, kotřiž z połnej paru za jednu wěc dźěłaja. „Zwjetša pak poslednja škrička, mjenujcy pjenjezy, pobrachuje“, zwurazni wčera nawoda předsydstwa Budyskeje wokrjesneje lutowarnje Dirk Albers na zahajenskim zarjadowanju, hdźež su program zjawnosći předstajili.

Lars Räbiger z předewzaća neorot, kotrež zestaja platformu 99 škričkow (99 Funken), je přitomnym rozkładł, kak tak mjenowany crowdfunding funguje. Crowd steji za ludźi, funding za financy. Po zmysle programa ma so tuž wjele ludźi financielnje na jednym projekće wobdźělić. W zajimawym přednošku spo­srědkowa Räbiger čłonam najwšelakorišich towarstwow Budyskeho wokrjesa mnoho pokiwow. „Powědajće swoju stawiznu z pomocu filma a wobrazow. Pokazajće swój zapal za ideju, kotruž chceće zwoprawdźić“, wón zastupnikow towarstwa namołwi.

Koćina (aha/SN). Po tym zo bě twarožkarnja Koćinskeho zawoda Krabatowy mlokowy swět w lěće 2008 produkciju swojich wudźěłkow zahajiła, wuhotuja tam na iniciatiwu jednaćela Tobiasa Kockerta stajnje nalěto wulke burske wiki łužiskich specialitow.

Wčera, njedźelu, bě to mjeztym jědnaty raz, zo su tak znowa syły ludźi přiwabili. Wulkej płoninje běštej zaparkowanej a awtowe znački přeradźichu, zo běchu zajimcy tež ze zdalenišich kónčin Sakskeje a Braniborskeje. Dźakowano perfektnej organizaciji přez kameradow Sulšečanskeje wohnjoweje wobory njeje k žanym ćežam dóšło. Wopytowarjow witachu tohorunja ze serbskim hesłom.

Budyšin (SN/at). Bjezdźěłnosć we wuchodnej Sakskej je zaso woteběrała. Kaž Budyska agentura za dźěło zawčerawšim wozjewi, bě kónc apryla 18 177 bjezdźěłnych, 1 291 mjenje hač w měrcu a 1 907 mjenje hač loni w aprylu. Aktualna kwota je 6,4 procenty. Kaž předsyda jednaćelstwa agentury za dźěło Budyšin Thomas Berndt wuzběhny, pozitiwne wuwiće na regionalnych dźěłowych wikach dale dźe. „Mnohich ludźi su w sezonalnje wotwisnych wobłukach, tak přewažnje we wysoko- a hłubokotwarje, w ratar­stwje a w gastronomiji nowo- abo znowa přistajili“, rjekny Berndt na turnusowej nowinskej rozmołwje. Wjetši dźěl ludźi, kotřiž su so zaso do dźěła dóstali, běchu mužojo. W běhu měsaca je ličba bjezdźěłnych muži wo 953 na 10 238 woteběrała, 1 007 mjenje hač loni w aprylu. Pola žonow pomjeńši so ličba wo 338 na 7 939, štož je 900 mjenje hač před lětom. 1 203 bjezdźěłni běchu w starobje do 25 lět, 51 mjenje hač w měrcu, porno lońšemu aprylej je ličba wo 57 mjeńša. Woteběrał je zdobom podźěl bjezdźěłnych w starobje nad 50 lětami wo 655 na 8 622, loni w aprylu bě jich 755 wjace.