Předewzaćeljo předstajaswoje rjemjesła
Na fachowej přehladce rjemjeslnikow 28. a 29. januara w Choćebuzu předstaji so znowa wjele serbskich předewzaćow z Delnjeje a Hornjeje Łužicy. Pokazać chcedźa tam stare rjemjesła runje tak kaž nowu techniku.
Choćebuz (SN/BŠe). Fachowu kompetencu z najwšelakorišimi rjemjeslniskimi posłužbami skići wopytowarjam tež lětša přehladka rjemjeslnikow kónc januara w Choćebuzu. Tak předstaja předewzaćeljo ze wšelakorych wobłukow swoje sylnosće a zajimcow rady wosobinsce poradźuja. Firmownicy prezentuja na wikach tež rjemjeslniske wuměłstwo. Tajke pokazaja lětsa tohorunja serbskorěčne zawody. Z Hornjeje Łužicy budźe tam Wotrowska Wjenkec blidarnja zastupjena. Dale wobdźěli so kachlestajer a kachlicykładźer Šćěpan Čornak z Konjec, kiž změje zhromadne stejnišćo z mějićelom Wulkodubrawskeho kuchinskeho studija Křesćanom Šnajderom.
Rozšěrja poskitk
Mnichow/Budyšin (SN). Dalnobusy su dźeń a woblubowaniše. Kaž předewzaće FlixBus zdźěla, mějachu loni něhdźe 30 milionow sobujěducych. Wosebje wokoło hód su mnozy poskitk wužiwali. Jeničce we Łužicy je FlixBus wosom razow rekord sobujěducych docpěł. Tohodla chce busowe předewzaće swój poskitk lětsa dale powjetšić a syć rozšěrić.
Wosebje rady jězdźa ludźo do Budyšina a Zhorjelca. Wojerecy wobsadźichu loni 3. městno. Hižo wot štwórtka, 19. januara, chce FlixBus swoje zwiski do Berlina polěpšić. Po tuchwilnym zymskim jězbnym planje zastawaja jeho busy w Budyšinje, Małym Wjelkowje, Njeswačidle, Rakecach, Wulkich Ždźarach, Mučowje, we Wojerecach a Grodku štyri razy wob tydźeń po puću do Berlina. Wot zajutřišeho chcedźa poskitk wjac hač podwojić. „Ličby sobujěducych z Łužicy su so jara derje wuwili. Bohužel nima město Budyšin decentralneho połoženja dla dosć potenciala. Naprašowanje mjez pasažěrami wšak je wunjesło, zo je centralne stejnišćo wažny kriterij zjawneho wobchada“, měni jednaćel FlixBusa André Schwämmlein.
Wuslědki dale na słabym niwowje
Sakski burski zwjazk zhladuje na aktualne połoženje ratarjow a na wuhlady lěta 2017. Niske płaćizny za wudźěłki ratarjow masiwnje wobćežuja, štož so na likwiditu zawodow wuskutkuje.
Poskića hosćom Zeleneho tydźenja łužiske chłóšćenki
Mjezynarodny zeleny tydźeń w Berlinje słuša k najwuznamnišim zarjadowanjam w Němskej. Mjeztym zhladuja tam na 91lětne stawizny a wotměja přehladku wot 20. do 29. januara lětsa hižo 82. raz.
Berlin/Budyšin (SN/BŠe). Madźarska je lětsa partnerski kraj Zeleneho tydźenja w Berlinje. Wjac hač 1 600 wustajerjow z 65 krajow z wobłukow ratarstwo, zežiwidła a zahrodnistwo kaž tež zastupjerjow zarjadow a turistikarjow tam wočakuja. Mjez nimi budu tež zaso zawody a institucije z Hornjeje Łužicy. Tak chce Kubšiski pjekar Stefan Richter wopytowarjam swoje wudźěłki ze starych žitnych družin předstajić a poskićeć. Wosebity wjeršk budźe na dnju ptačeho kwasa 25. januara, hdyž wón hosći tohorunja z najwšelakorišimi družinami pječenych srokow překwapi. Tež wosebity chlěb z mjenom Hornjołužiski kwasny smědźa ludźo tón dźeń woptać.
Tež team Wojerowskeje woleńcy chce so na lětušej přehladce wobdźělić, zo by wopytowarjam wosebite kajkosće łužiskeho laneho wolija zbližił. Předewzaće z nazhonjenjemi pak pokaza w stolicy hišće dalše wolijowe poskitki.
Z reformu hrozy stagnacija
Přichodne wuwiće Łužicy z brunicu přez krajnu mjezu kaž tež horco diskutowana zarjadniska reforma w Braniborskej stej městu Choćebuzej wulkej wužadani. To běštej wažnej temje na nowolětnym přijeću delnjoserbskeje metropole wčera w měšćanskej hali.
Choćebuz (SN/at). Přezjednaj staj sej braniborski ministerski prezident Dietmar Woidke (SPD) a Choćebuski wyši měšćanosta Holger Kelch (CDU) nastupajo krajnu mjezu přesahowacy hospodarski region Łužica. „Tworimy z trěbnej wobhladniwosću, swědomitosću a legitimaciju struktury, kotrež móža změnu přewodźeć“, zwurazni Kelch w swojej narěči na wčerawšim nowolětnym přijeću. Ministerskemu prezidentej bě wažne na to skedźbnić, zo ma so strukturnym łamkam zadźěwać. Strukturnu změnu maja w Delnjej Łužicy hižo 26 lět, pozhubjena tekstilna industrija w Baršću a Choćebuzu na přikład jasnje wo tym swědči, kaž Dietmar Woidke rozłoži.
Młodych předewzaćelow zdobyć
Zwjazk serbskich rjemjeslnikow a předewzaćelow (ZSRP) zhladuje na wuspěšne lěto 2016, při čimž su zaměry samo wjac hač spjelnili. Přiwšěm skedźbnja předsydka Monika Cyžowa na tuchwilne problemy w předewzaćach, kotrymž chcedźa so přichodnje wěnować.
Budyšin (SN/BŠe). „Lońši dźěłowy plan smy wotdźěłali a samo přepjelnili“, zdźěli předsydka ZSRP Monika Cyžowa na naprašowanje Serbskich Nowin. Mjez druhim wopytachu serbscy rjemjeslnicy wuknjacych Ralbičanskeje a Worklečanskeje wyšeje šule, zo bychu jim rjemjeslniske powołanja zbližili a jim perspektiwy do přichoda pokazali. Tež zarjadowanje we wobłuku kotrehož wopytachu šulerjo serbske institucije, bě jara wuspěšne, wšako je wažne młodostnym tež jich dźěławosć spřistupnić.
Tři dojednanja wotzamknyli
Towarstwo Serbski kulturny turizm (SKT) je loni tři kooperaciske dojednanja, a to ze Załožbu za serbski lud, z Marketingowej towaršnosću Hornja Łužica-Delnja Šleska (MGO) a ze Serbskim institutom wotzamknyło.
Slepo (SN/mwe). Po tym zo bě towarstwo SKT lěta dołho wuske zwiski ze Załožbu za serbski lud – wosebje ze Serbskej kulturnej informaciju SKI w Budyšinje a Lodku w Choćebuzu – a MGO wudźeržowało, je ze załožbu a marketingowej towaršnosću loni w měrcu a juliju kooperaciskej zrěčeni podpisało. Jako třeće wotzamkny w septembru dojednanje z Choćebuskej wotnožku Serbskeho instituta. Tak hodźa so wuslědki studijow k rozšěrjenju a wobohaćenju poskitkow kulturneho turizma w Serbach kaž tež za wuwiwanje produktow w prózdninskim regionje Hornja Łužica wužiwać a image Serbow we Łužicy polěpšić.
Šwalča Petra Kupcyna ma tež w nowym lěće dźěła dosć. Klanki w ...
Młodostnych zaměrnje wabja
Powołanske šule su dźěłarnistwam wažne žórło za nowych čłonow
Budyšin (SN/at). Němskemu dźěłarniskemu zwjazkej (DGB) přisłušace dźěłarnistwa w Sakskej wabja młodostnych zaměrnišo do swojich rjadow. Z widom na demografisku změnu je so jim loni na te wašnje poradźiło, ličby sobustawstwa w dalokej měrje konstantne dźeržeć.
„Powołanske šule su nam wuspěšny stołp podpěry. Tu dobywamy wjace młodych čłonow hač w předewzaćach“, rjekny Peter Schubert, wobwodny předsyda IG twarstwo wuchodneje Sakskeje. Na tych powołanskich kubłanišćach, hdźež maja přistup, rozłožuja dźěłarniscy sekretarojo wučomnikam skutkowanje dźěłarnistwa. Po słowach Petera Schuberta su młodostni tam wotewrjeniši a njejsu wot staršich kolegow wobwliwowani. IG twarstwo w Hornjej Łužicy zdoby loni 53 wučomnikow za sobustawstwo, cyłkownje ma tam 2 800 čłonow.
Nowy trend
Las Vegas (SN/dpa). Rěčne wodźenje přewozmje po hódnoćenju branšowych ekspertow jara spěšnje centralnu rólu při posłužowanju techniki. Lětsa móhli kompjutery prěni króć rěčane słowo runje tak zrozumić kaž ludźo, rjekny šefekonom ameriskeho elektroniskeho branšoweho zwjazka CTA Shawn DuBravac wčera do zahajenja wikow techniki CES w ameriskim Las Vegasu.
W lěće 2013 ležeše kwota zmylkow při spóznaću rěče pola 23 procentow. Lětsa steja wiki w znamjenju digitalnych asistentow, kotrež zamóža so z ludźimi rozmołwjeć a mjeńše nadawki přez na nje přiwjazane nastroje a posłužby wukonjeć. Po prognozach zwjazka CTA wočakuja eksploziwny rozrost potrjeby tuteje techniki. Nastupajo software je wotwidźeć wubědźowanje mjez platformami wulkich koncernow, kaž su to Alexa za Amazon, Siri za Apple, Googles Assistant a Cortana za Microsoft. Amazon móžeše swój kompjuter Alexa z wótřerěčakom „Echo“ do nastrojow druhich wulkoproducentow zaměstnić. DuBravac trochuje, zo bu dotal něhdźe pjeć milionow digitalnych asistentow předatych.
