Serbsku rěč a kulturu zapřijeć
Zaměry a zajimy Serbow měli so w regionalnym planje Hornja Łužica-Delnja Šleska swědomiće sobu wobkedźbować. Wčera rozjimachu radźićeljo planowanskeho zwjazka jeho dalewuwiće.
Wojerecy (AK/SN). „Serbow nańdźemy w předsłowje, w zakładnych směrnicach, we wobłuku funkcijow komunow a turizmje. Cyłkowny sedmy kapitl je jim wěnowany. Smy w stajnej rozmołwje z planowanskim zwjazkom a smy dobry dźěłowy staw docpěli“, podšmórny referent za etat a infrastrukturne naležnosće Domowiny Marko Kowar po wčerawšim posedźenju regionalneho planowanskeho zwjazka Hornja Łužica-Delnja Šleska we Wojerecach. Tam rozjimachu radźićeljo dalše wuwiće regionalneho plana. Jeho tuchwilny naćisk wopřijima cyłkownje 1 300 stron. 165 stejišćow radźićeljo wobkedźbowachu. Wotrězk po wotrězku woni plan wčera wotwažowachu.
Chinjenjo na wopyće w Budyšinje
Delegacija 33 Chinjanow, kotřiž su wot lěta 1987 w Budyskej wagonowni dźěłali, je wot wčerawšeho z hosćom w sprjewinym měsće. Woni zetkachu so wčera z bywšimi kolegami w hotelu Best Western. Najebać wšitke prócowanja njeje so jim zešlachćiło sej twornju wobhladać. Jenož wotwonka móžachu na swoje tehdyše skutkowanišćo hladać. Dźensa popołdnju witaše chinskich hosći Budyski wyši měšćanosta Alexander Ahrens (njestronjan) (srjedźa), kiž je sam někotre lěta w Shanghaiju bydlił. Foto: Carmen Schumann
Znamjenja pokazuja jasnje na rozšěrjenje
Daimler w Kamjencu zaměrnje dale inwestuje. Za rozšěrjenje twornje accumotive, kotraž baterije za jězdźidła zhotowja, nałoža 500 milionow eurow. Dźensa su twarnišćo oficialnje zahajili.
Třěšna marka wutworja identitu
Hornja Łužica ma přichodne tydźenje nowu třěšnu marku dóstać. Dowolowy region wabi hižo wot lěta 2003 z logom, kotryž dźensnišemu časej hižo njewotpowěduje.
Dwurěčnosć spóznać
Nominowane
Choćebuz (SN/at). Łužiska hospodarska iniciatiwa (WiL) je wčera w Choćebuzu pjeć předewzaćelskich konceptow wozjewiła, kotrež su we wobłuku lětušeho 13. wurisanja za Łužiske myto za załožerjow eksistency (LEX) nominowane. To su regionalna online-nowina Niederlausitz aktuell z Choćebuza, Sakska spirituozowa manufaktura z Korzymja, winoteka „Přećelka wina“ z Choćebuza, wuwiće a wupožčenje kwalitatiwnje wysokohódneho mobilneho fotoawtomata za swjatočnosće „Cheeezbude“ z Choćebuza kaž tež inowatiwna procedura k zhotowjenju indiwidualnych zubnych implantatow na zakładźe 3D-planowanja a zwoprawdźenja Zhorjelskeje firmy INDI Implant Systems GmbH. Za wosebite myto LEX „wutworjenje hódnotow generować“ stej nominowanej firma BALADI mlokowe wudźěłki z Gubina, kotraž zhotowja twarožk po syriskim wašnju, a Tittelec fabrika groćanych tworow z Großröhrsdorfa we wobłuku naslědnistwa w předewzaću.
Dobyćerjow mytuja 28. nowembra we hłownym zarjadnistwje LEAG w Choćebuzu. Dohromady steji za to mytowanski pjenjez 10 000 eurow k dispoziciji.
Marketingowa towaršnosć so strukturnje změniła
Marketingowa towaršnosć Hornja Łužica – Delnja Šleska (MGO) je so strukturnje změniła. Tohorunja je do nowych rumnosćow na Budyskej Humboldtowej zaćahnyła. Tak je za nowy start wšitko spřihotowane.
Budyšin (SN/BŠe). „Rozsud za strukturnu změnu MGO je wulki krok w stawiznach towaršnosće“, podšmórny jeje jednaćel Olaf Franke dźensa na nowinarskej rozmołwje. Hakle wčera wječor bě jasna wjetšina sobustawow na wurjadnej zhromadźiznje rozsudźiła, zo je aktualnych wuměnjenjow dla nowa struktura zhromadneho dźěła trěbna. Tak je ličba sobustawow přichodnje wo wjele mjeńša. Wot tuchwilnje 110 budźe so wot 1. januara hłownje wosom lokalnych turistiskich zjednoćenstwow kaž tež wokrjesaj Budyšin a Zhorjelc w towaršnosći angažować.
Witany wuraz wabjenja
Choćebuske nazymske wiki z pisanym programom
Choćebuz (mih/SN). Něhdźe 300 wustajerjow z jědnaće zwjazkowych krajow kaž tež z Awstriskeje, ze Šwicarskeje, z Pólskeje, Čěskeje a Tuneziskeje prezentowachu zašły kónc tydźenja na 20. Choćebuskich nazymskich wikach najwšelakoriše poskitki. Paleta sahaše wot twarskich móžnosćow hač k dekoraciji swójskeho bydlenja. Nimo toho poskićachu wustajerjo hišće słódne chłóšćenki abo skedźbnjachu na móžnosće, swój swobodny čas połny dožiwjenjow přežiwić.
Prěni raz přihotowachu organizatorojo wustajeńcu pod hesłom „Wěš hišće?“. Wšelake nastroje, kotrež ludźo za čas NDR we wšědnym žiwjenju wužiwachu, běchu do přehladki zapřijeli. Z posměwkom dopominachu so ludźo na tónle čas. Najbóle pak informowachu so wopytowarjo wo najwšelakorišich poskitkach wustajerjow. Wosebje stejnišćo pólskeho předewzaća Horex wuwabi wulki zajim.
Kulow wabi z nowosćemi
Wobchodnicy dźakuja so kupcam z nakupowanskej nocu
Kulow (SN/JaW). Wobchodnicy Kulowa hotuja so na 9. nakupowansku nóc w kuzłapołnym swětle pjatk, 21. oktobra. Hesło lětsa rěka „Kótwicu wućisnyć w Kulowskim přistawje“.
