Něhdźe 200 ratarjow je so wčera na demonstraciji před ...
Čas žiwjenja w předewzaću
Isa Töpfer so po 45 lětach z dźěłom w Hamorskej milinarni rozžohnuje
Zrědka je tomu tak, zo móže čłowjek rjec, zo je cyłe swoje powołanske žiwjenje w jeničkim předewzaću skutkował. Mjez žonami je to hišće rědšo hač mjez mužemi. Přiwšěm tajkich žonow je.
Nowi wučomnicy so z modernej techniku zeznajomili
Zjednoćenstwje molerjow a lakěrarjow kaž tež elektrotechnikarjow stej lětsa znowa camp za młodostnych zarjadowałoj, na kotrymž nowi wučomnicy powołanje bliže zeznachu.
Budyšin (CS/SN). Šěsć młodych ludźi, kotřiž nastupja swoje wukubłanje jako moler abo lakěrar, na swojim poslednim dnju w Budyskim wukubłanskim centrumje minjeny pjatk hordźe swoje dźěła prezentowachu. Tydźenski kurs na spočatku jich molerskeho wukubłanja je wšitkim wjeselo wobradźił. Młodostni změja w swojich zawodach dobry start do wukubłanja. Wšitko wšak njemóža jim předewzaća sposrědkować. Přetož tež w rjemjesle maja modernu techniku, předewšěm we wobłuku digitalizacije. Tak poskićuje so na přikład app za zhotowjenje barbow. Tohorunja móža sej molerjo wideja na youtube wobhladać, kotrež jednotliwe dźěłowe kročele zwobraznjeja. Wšo to młodźi ludźo minjeny tydźeń zeznachu. Ale wězo dóstachu runje tak dohlad do wšelakich technikow kaž pryskanskeje techniki, lazěrowanja abo airbrusha.
„Rěč a nałožki mje zahorjeja“
Hižo něšto tydźenjow je na Budyskich tydźenskich wikach stajnje na sobotach zaso stejnišćo wikow Enderec statoka z Ćětowa (Tetta) njedaloko Wósporka, ze susodneho wokrjesa Zhorjelc. Hižo loni steješe Marcus Ender wot junija do nowembra stajnje štwórtk na Žitnych wikach w Budyšinje. Na ideju, so do směra na Budyšin rozhladować, bě wón na namjet swojich kupcow přišoł, kiž kupuja jeho tak mjenowanu „dwórsku kistu“. Mnozy z nich wšak w sprjewinym měsće a jeho wokolinje bydla.
Sorabia AG skónčnje zaso plus docpěła
Agrarna akcijowa towaršnosć Sorabia je na wčerawšej hłownej zhromadźiznje za lóńše lěto pozitiwnu bilancu sćahnyła.
Nowoslicy (JK/SN). Wuměnjenja lońšeho lěta běchu tak dobre za delanske ratarske předewzaće, zo je so poradźiło, lěto drje ze snadnym dobytkom, ale z jara wysokim wobrotom a wyšimi dochodami hač hdy do toho zakónčić.
Widźomnje wolóženy přednjese předsyda předsydstwa Matej Korjenk na wčerawšej 30. hłownej zhromadźiznje Sorabia agrarneje AG swoju rozprawu k wuslědkam a dźěławosći Róžeńčanskeho agrarneho koncerna za lěto 2021. W minjenym lěće je so to poradźiło, wo čož so towaršnosć hižo wot lěta 2014 zaměrnje prócuje – docpěć plus pod smužku.
Wuspěšny comeback po pandemiji
Drježdźany (SN/BŠe). Na akciskim dnju „genialsocial“ 12. julija wobdźěli so lětsa 22 000 šulerjow z 222 sakskich kubłanišćow. Z tym zhladuja organizatorojo Sakskeje młodźinskeje załožby na wuspěšny comeback po pandemiji. Zhromadnje nadźěłachu wulku sumu něhdźe 500 000 eurow, załožba zawčerawšim wozjewi. Na akciji wobdźělichu so mjez druhim tež Budyski Serbski gymnazij a Kulowska wyša šula. W Ludowym nakładnistwje Domowina su štyrjo młodostni dźěłali, třo z nich w redakciji Serbskich Nowin.
Nadźěłane pjenjezy podpěruja iniciatiwy w Sakskej a po cyłym swěće. Hladajo na lětuši wulki wuspěch šulerjow hodźa so lětsa, město planowaneju projektow, tři projekty podpěrać. Wo nich je jury na posedźenju wuradźowała a spěchujomne projekty wuzwoliła. Tak móže so twar młodźinskeho centruma w Kigaliju w Ruandźe podpěrać. Tohorunja budu naslědnu zakładnu šulu w Fanarje w Madagaskaru spěchować. Tež iniciatiwa za twar wukubłanskeho centruma za młodostnych a žony w ghanaskim Takoradiju so nad pjenjezami wjeseli.
Ze swojimi kmanosćemi a myslenjom wón přeswědča
Za drjewo so wón jara hori. Moritz Freitag z Picnja wuknje tuž powołanje blidarja pola twarskeje a mebloweje blidarnje Bialas w Choćebuzu. Jeho rjemjeslniska wušiknosć a jeho charakter wukubłanski zawod přeswědčištej. Choćebuska rjemjeslniska komora (HWK) a jeje zastaranski skutk wuznamjeni jeho jako „wučomnika měsaca“.
Moritz Freitag kroči zaměrnje po žiwjenju. Jako wyši šuler absolwowaše wjacore praktikumy w blidarnjach. Na Choćebuskim centrumje za horni schodźenk wón z ćežišćom rjemjesło maturowaše. „Powołanski gymnazij PLUS rjemjesło“ mjenuje so kubłanski puć, na kotrymž so w južnej Braniborskej něhdźe 200 šulerjow wobdźěla. W tym zwisku je Moritz Freitag hižo překupski a pedagogiski dźěl III a IV mišterskeho pruwowanja wuspěšnje wobstał. Swoje wukubłanje je wón tak wo poł lěta skrótšił.
Rěčna zawěra wodu hišće dodawa
Błótowska kórkowa třepotawka wuznamjenjena
Lubin (SN/CoR). Nimo Błótowskich kórkow a Błótowskeho chrěna su nětko dalši wudźěłk z Błótow z kwalitnym znamješkom „g.g.A.“ (škitne geografiske podaće) wuznamjenili. Tak móža nětko Błótowsku kórkowu třepotawku z módro-žołtym zyglom jako po cyłej Europje škitany kwalitny produkt zwičnjeć.
„Tule nowu móžnosć zwičnjenja smy po dołhim procesu docpěli, kotryž smy jenož w zhromadnym dźěle z mjaso a kołbasy předźěłacymi kaž tež z gastronomiskimi zawodami z Błótow zmištrować móhli“, wjeseli so jednaćelka Błótowskeho towarstwa Melanie Kossatz nad mjezynarodnym připóznaćom. Hižo w lěće 2005 su započeli so wo wuznamjenjenje prócować. Próstwu wo wotpowědne registrowanje su Europskej komisiji zapodali. Nětko je Europska unija zapisanje do registra „g.g.A.“ wozjewiła.
List: Sankcije skónčić
Berlin/Halle (dpa/SN). Wokrjesne rjemjeslnistwo Halle-Solawski wokrjes w Saksko-Anhaltskej je zwjazkoweho kanclera Olafa Scholza (SPD) namołwiło, wšitke sankcije přećiwo Ruskej skónčić. W zjawnym lisće, kotryž je Redakciskej syći Němska (RND) wčera předležał, žadaja sej rjemjeslnicy nimo toho jednanja wo zakónčenju wójny přećiwo Ukrainje.
„Wěmy jako rjemjeslnicy z mnohich rozmołwow ze swojimi kupcami, zo wulka wjetšina zwólniwa njeje, za Ukrainu swój ćežko nadźěłany žiwjenski standard woprować. To tež naša wójna njeje!“, rěka tam, a dale: „Chceće Wy tón kancler być, kotryž je Němsku do ruina ćěrił, chceće woprawdźe swój kraj woprować?“ Wokrjesne rjemjeslnistwo kritizuje nadpad Ruskeje na Ukrainu jako ćežke złóstnistwo a „jasne zranjenje artikla 2 Charty UN“.
