Mnohe joby su njewobmjezowane
Budyšin (SN/at). Hornjołužiske předewzaća pytaja dale dźěłowe mocy. Kaž we wčerawšej rozprawje Budyskeje wotnožki Zwjazkoweje agentury za dźěło za měsac meju rěka, na wysokim niwowje. Wuraz toho je 889 swobodnych socialneho zawěsćenja winowatostnych dźěłowych městnow, kotrež su zawody w róžowniku dźěłodawarskemu serwisej tudyšeje dźěłoweje agentury přizjewili. 93 procentow přizjewjenych nowych jobow ma so njewobmjezowanje wobsadźić. Najhusćišo pytaja twornje fachowe mocy z wotzamknjenym wukubłanjom abo studijom. Jeničce 16 procentow poskićenych dźěłowych městnow so na pomocnikow měri.
Mjenje hač dwaj euraj za liter
Budyšin (SN/at). Wot dźensnišeho je w Němskej dawk na bencin a diesel na wot Europskeje unije dowolenu minimalnu měru zniženy. Potuńšenje móhło za bencin něhdźe 35 centow a za diesel něhdźe 17 centow za liter wučinjeć.
Rešerša w portalu je dopołdnja wunjesła, zo su płaćizny za ćěriwo na tankownjach we wuzwolenych łužiskich městach nimale wšudźe pod dwaj euraj padnyli. W Budyšinje sy za liter super E5 wot 1,859 do 1,909 eurow płaćił, za liter diesel 1,839 do 1,959 eurow. We Wojerecach chcychu tankownje 1,869 do 1,929 eurow (super E5) resp. 1,839 do 1,999 eurow (diesel) měć. Tróšku dróši bě w Kamjencu z 1,909 do 1,949 eurow za bencin a 1,879 do 1,949 eurow za diesel. Jedna tankownja w Běłej Wodźe měješe hišće płaćizny wyše dweju eurow, hewak sy 1,928 do 1,939 eurow (super E5) resp. 1,878 do 1,889 eurow (diesel) płaćił. Mjenowany portal je za Saksku přerěznu płaćiznu 1,925 (super E5) a 1,919 eurow (diesel) za liter podał.
Dopołdnja w Choćebuzu tankować bě dróše, liter bencin E5 płaćeše 1,969 do 1,989 eurow, diesel 1,839 do 1,959 eurow.
Skónčnje móža zaso powołanja „dožiwić“
W poslednimaj lětomaj su so korony dla lědma powołanske orientacije přez předewzaćelow přewjesć móhli. Lětsa móža šulerki a šulerjo kaž tež dalši zajimcy zaso firmy na „pózdnjej słužbje“ wopytać.
Biskopicy/Budyšin/Kamjenc/Wojerecy (SN/bš). Pjaty raz přeprošeja města Budyskeho wokrjesa zajimcow do regionalnych firmow, zo bychu so z dźěłom tutych zeznajomili. Pod hesłom „pózdnja słužba“ móža zajimcy w Budyšinje a Kamjencu 17. junija a w Biskopicach kaž tež we Wojerecach 1. julija z busom k regionalnym firmam dojěć a sej tute bliže wobhladać. W Radebergu a prěni raz tež w Załomju je projekt 9. septembra planowany. Zaměr akcije je zdobyće zajimcow za wukubłanje abo nowych dźěłowych mocow. Tola akterojo chcedźa tež wobydlerjow docpěć a jim dźěławosć regionalneho hospodarstwa zbližić.
Firmy dale tójšto personala pytaja
Budyšin (SN). We wuchodnej Sakskej bě w meji 16 427 bjezdźěłnych, 485 mjenje hač w aprylu, kaž Budyska wotnožka Zwjazkoweje agentury za dźěło dźensa we wobłuku swojeho měsačneho rozprawnistwa wozjewi. Kwota bjezdźěłnosće je wo 0,1 procent na šěsć procentow spadnyła. Pozitiwne je wuwiće přirunujo z lońšej meju. Tehdy bě 2 029 ludźi wjace bjez přistajenja a tež kwota bjezdźěłnosće bě wo 0,7 procentow wyša.
Aktualny staw wotpowěduje w počasu zwučenemu trendej. „Wot dalšeho spada bjezdźěłnosće w meji móžachu wšitke wosobowe skupiny lěpšinu měć“, zwěsći Ilona Winge-Paul, operatiwna jednaćelka Budyskeje agentury za dźěło, a naliči młodostnych, dorosćenych kóždeježkuli staroby, ćežkozbrašenych a dołhi čas bjezdźěłnych. Najebać nisku bjezdźěłnosć pak pytaja firmy z podpěru dźěłoweje agentury dale tójšto noweho personala. Jednaćelka Winge-Paul rěči wo wuchodosakskich dźěłowych wikach, kotrež ma za „robustne a přijimanjakmane“. Njewěstosće pak wójny w Ukrainje dla wobsteja, ćeže při dodawanjach abo zastaranju z energiju wuzamknjene njejsu.
Wulki zajim
Předewzaće je a wostanje spušćomny zastaraćel
Čorna Pumpa (JoS/SN). Ze zjednoćenjom Němskeje běchu za zwjazkowu republiku płaćiwe wobswětowe předpisy po přechodnej dobje wot lěta 1996 tež za nowe zwjazkowe kraje zwjazowace. Najebać zahajene naprawy w Čornej Pumpje so předewzaću Espag w starych milinarnjach njeporadźi, hranične hódnoty za proch a syrikowy dioksyd dodźeržeć. Přidatne wuhotowanje starych milinarnjow z modernej wobswětowej techniku by kóštam nowotwara wotpowědowało. Tohodla přihotowaštej předewzaći Veag a Espag twar noweje milinarnje a zahajištej tak dobu třećeje generacije milinarnjow na stejnišću Čorna Pumpa.
Zakładny kamjeń połožichu hižo 25. oktobra 1993. Hač k prěnjemu dodawanju energije do syće traješe pak hišće tři a poł lěta. Hladajo na produkciju miliny bě dwójny blok we łužiskim rewěrje měznik. Němska milinarnjowa industrija bě dopokazała zo je kmana, sej wuspěšnje njeznate techniki spřistupnić. Wobaj 800-MW-blokaj běštej tehdy samo najwjetšej swěta.
LEAG a Wojerecy chcedźa „zelene“ rozrisanja
Wojerecy (SN/BŠe). Wojerowske město a Choćebuski koncern Łužiska energija a milinarnje (LEAG) chcetej zastaranje 32 000 wobydlerjow ličaceho města trajnje dale wuwiwać a krok po kroku klimaneutralnych energijowych producentow zasadźić. Tole potwjerdźištaj minjenu wutoru Wojerowski wyši měšćanosta Torsten Ruban-Zeh a Andreas Huck z předsydstwa LEAG za nowe wobchodniske wobłuki a podpisaštaj wotpowědne dojednanje pod hesłom: „wo zhromadnym dźěle k wuwiću a zwoprawdźenju klimaneutralneho zastaranja z energiju a ćopłotu města Wojerec.“
LEAG a Wojerecy kooperuja hižo dlěje nastupajo zastaranje města z dalnoćopłotu z milinarnje w Čornej Pumpje. Tole je znajmjeńša hač do lěta 2030 zaručene. Paralelnje chcedźa w přichodnych lětach hospodarske rozrisanja dekarbonizacije, diwersifikacije a decentralizowanja zastaranja z dalnoćopłotu zhromadnje wuwiwać a konkretne projekty zwoprawdźić. Mjez druhim planuja zamołwići Šibojski jězor energetisce wužiwać, a k tomu ćopłotnu klumpu instalować.
Na lutowarni móža hriwny na euro měnjeć
Budyšin (SN). Jeli ćěkańcy z Ukrainy do Němskeje přichadźeja, maja zwjetša jenož pjenježnu měnu swojeje domizny hrywnju w móšni. Dotal njebě w EU móžno pjenjezy na euro změnić. Nětko pak su so zastupjerjo EU, zwjazkoweho knježerstwa, Němskeje zwjazkoweje banki kaž tež němske kreditne hospodarstwo wothłosowali a rozrisanje našli. Wot dźensnišeho móža połnolětni ukrainscy wobydlerjo hač do 10 000 hrywnjow (UAH) pola lutowarnje přez swójski němski girokonto měnić. Tole je najprjedy raz hač do 19. awgusta móžno. „Wjeselimy so, zo bu jednora a spěšna móžnosć namakana, tak zo móža tež w našim wobchodniskim teritoriju bydlace ćěkancy pjenjezy měnjeć“, zwurazni nawoda předsydstwa Budyskeje wokrjesneje lutowarnje Dirk Albers.
Nimo serbšćiny přełožki do dalšich rěčow planowane
Chrjebja-Nowa Wjes (CS/SN). Wokoło Chrjebje-Noweje (Kreba-Neudorf) Wsy móža zajimcy wšelakorosć domjaceje přirody derje dožiwić. Škoda tuž, zo su tam wobstejacu wučbnu šćežku 2014 wotstronili. Čłonojo Domizniskeho towarstwa pak zesydachu so 2015 z dalšimi zajimcami za kulojte blido, a rozmyslowachu kak dožiwjensku šćežku zaso zwoprawdźić. Wot minjeneje soboty přeprošuje nětko nowa „Přirodna a dožiwjenska šćežka biologiska wšelakorosć a domizniske stawizny Chrjebja-Nowa Wjes“ pućowarjow na wotkrywanske tury.
