Z přetwarom na předewzaće přichoda chce koncern Łužiska energija a milinarnje (LEAG) swoje kompetency zdobom wužiwać, zo by regionalne předewzaća podpěrał. Zo bychu so jich sobudźěłaćerki a sobudźěłaćerjo w přichodźe w nowych technologijach dale kubłali, dźěłatej LEAG a Choćebuska industrijna a wikowanska komora (IHK) ze Zwjazkom za kwalifikaciju we Łužicy za wobnowjomne energije (QLEE) hromadźe.
Choćebuz (SN/at). Poskitki maja so we wobłuku nałožowanja wodźika a wobnowjomnych energijow wuwić, kotrež su na potrjebu jednotliwych firmow wusměrjene. To je jadro kooperaciskeho dojednanja, kotrež staj personalny předstejićer LEAG Jörg Waniek a hłowny jednaćel IHK Choćebuz dr. Wolfgang Krüger wčera w delnjołužiskej metropoli podpisałoj.
Budyšin (SN/BŠe). Akciski tydźeń ratarjow dale traje. Dźensa wotměchu w Drježdźanach wulku demonstraciju, na kotruž sej tež ratarjo z Hornjeje Łužicy dojěchu. Korso je dźensa w 7 hodźin z Lubija wotjěł. Kaž krajnoradny zarjad Budyskeho wokrjesa zdźěli, jědźechu woni po zwjazkowej dróze B6 do Drježdźan. Podłu čary dyrbja šoferojo z haćenjemi ličić. Runje tak su přichodne dny lokalne akcije planowane. Zajězd na zwjazkowu awtodróhu A4 we Wósporku je wot dźensnišeho do pjatka stajnje wot ranja 6 hodźin do 12 hodźin zašlahany. Tež zajězdaj na A4 w Kodrecach a Zhorjelcu stej wot 6 hodź. do 11 hodź. do wobeju směrow Drježdźany a Wrócław blokowanej.
Serbski kowar Matej Hrjehor za měsac Łužicu wopušći a to znajmjeńša na tři lěta. Po róžowej póndźeli poda so rjemjeslnik na pućowanje po swěće – jako wandrowski. Jako zajimc pod 30 lětami, kiž njeje zadołženy, kiž nima dźěći a njeje woženjeny, chce wuwučeny rjemjeslnik dale wuknyć. Delni Sulšečan wě derje na pućach, kotrež su kamjenjojte, kročić. Hižo jako serbski skawt je wón nawuknył pod jednorymi wuměnjenjemi žiwy być. Swoje rjemjesło jako kowar je daloko zdaleny wot Łužicy, w Tübingenje nawuknył. Potom je w Berlinje a Drježdźanach w modernych předewzaćach dźěłał.
W Čornym Chołmcu porno tomu měješe njedawno składnosć, swoje rjemjesło na tradicionalne wašnje předstajić. Na Krabat-Mystica je wón tři dny kował a na mnohe prašenja wotmołwił. „Mějach mnohich zajimowanych přihladowarjow“, 28lětny rjekny, „wjele je mi powědało, zo su něhdy same powołanje kowarja nawuknyli. Někotři nanojo su swojim dźěćom tež wo kowanju powědali, štož sym tu a tam ze swojej wědu wudospołnił.“
Budyšin (SN/at). Na hornjołužiskich dźěłowych wikach so na kóncu lěta 2023 lědma něšto hiba. Budyska wotnožka Zwjazkoweje agentury za dźěło je dźensa ličby za december 2023 předpołožiła. Po tym je w regionje 19 739 bjezdźěłnych, 145 wosobow resp. 0,7 procentow wjace hač w předměsacu. Porno decembrej 2022 pak je ličba bjezdźěłnych wo 1 754 přiběrała, štož je nimale dźesać procentow. „Miłeho wjedra dla je ličba tych, kotřiž su so sezony dla bjezdźěłni přizjewili, w decembrje přewidna wostała“, zdźěli Marion Richter, předsydka jednaćelstwa Budyskeje agentury za dźěło.
Wot bjezdźěłnosće tuchwilu bóle potrjechene hač přerězk su wosoby w starobje wot 50 lět. Jich podźěl wučinja 7,8 procentow a je wyši hač aktualna kwota bjezdźěłnosće 7,2 procentaj. „Ludźo, kotřiž su nad 50, pak hižo ,staremu železu‘ njepřisłušeja“, měni Richter. Zo bychu swoje šansy na nowy job zwyšili, swoju wědu wobchowali a na nowostki přeměrili, poruči wona so kwalifikować a čas žiwjenja zwólniwi być wuknyć.
Bjezdźěłnosć młodostnych je, kaž w nowembrje, dale woteběrała.
We Wojerecach dźěłaja zaměrnje na projektach, kotrež su we wobłuku změny strukturow nastali. Tak dźe wo slědźerski campus, ponowjenje Łužiskeje kupjele, wodarnju w Ćisku, zwěrjenc a Šibojski jězor.
Wojerecy (AK/SN). Wojerecy wužiwaja dale zaměrnje šansy a perspektiwy změny strukturow. Tole wuzběhny wyši měšćanosta Torsten Ruban-Zeh (SPD) njedawno we Wojerecach. „Tuchwilu je nimale 300 milionow eurow spěchowanskich srědkow za projekty wobkrućenych a zdźěla hižo zasadźenych. Wulki dźěl toho – 89 milionow eurow – je za slědźerski campus předwidźany“, wón wujasni. Z cyłkownje 51 projektow stej mjeztym dwaj zwoprawdźenej, na 14 projektach tuchwilu dźěłaja a dwanaće projektow planuja. Za tři projekty přizwolenje předleži. Zbywace projekty su jako namjety do přichodneje spěchowanskeje periody zapisane.
„W januaru je prěnje posedźenje jury w Drježdźanach předwidźane, hdźež ma so architekturny běrow za nowy slědźerski campus wuzwolić“, Ruban-Zeh wuswětli. „Za to je wjacorych požadarjow. Tež z Wojerec je so běrow požadał, kotryž z Drježdźanskimi fachowcami hromadźe dźěła.“