Kubło dóstanje nowu jednaćelku
Smochćicy (SN). Sybille Richards přewozmje wot 1. januara funkciju jednaćelki hoteloweho managementa Smochčanskeho kubłanskeho kubła swjateho Bena. „Wjeselu so jara na nowy nadawk, dokelž směm swoje powołanske nazhonjenja na městnosći nałožować, kotrež hižo ze zažneho dźěćatstwa znaju a sej jara wažu“, rodźena Budyšanka wuzběhny.
Zhromadnje ze sobudźěłaćerjemi chce wona nowu strukturu w domje zawjesć a kubłanišćo mnohostronsce a sylnišo w regionje etablěrować. „Sprěnja je mi wažne, zo dócpěje dom tež nadregionalnje wuznam“, 45lětna praji. Tež priwatni zajimcy a wobchodnicy pak měli w atraktiwnym kuble přebywać. Syć, kotruž je sej dom w zwisku z kubłanskimi poskitkami za dorosćenych nadźěłał, ma Sybille Richards za wulku šansu.
Rodźena Budyšanka dźěłaše po swojim diplomje na Hessenskej powołanskej akademiji mjez druhim jako referentka za komunikaciju koncerna KfW w Frankfurće nad Mohanom. Tohorunja zhladuje wona mjezynarodnje na wuspěšnu karjeru. Skutkowaše mjenujcy tež w Kanadźe.
Ličba konstantna
Drježdźany (dpa/SN). W Sakskej su fachowcy lětsa dotal 142 nadpadow wjelka na wužitne zwěrjata registrowali. Cyłkownje bě z toho 569 zwěrjatow potrjechenych, zdźěli fachowa instanca wjelk krajneho wobswětoweho zarjada. Ličby wotbłyšćuja staw wosrjedź oktobra. Fachowcy institucije wuchadźeja z toho, zo drje su cyłkowne ličby lětsa trochu niše hač loni. W lěće 2023 zwěsćichu 275 nadpadow, při čimž bě 1 380 skoćatow potrjechenych.
Po aktualnym wjelčim monitoringu je w Sakskej tuchwilu 37 wjelčich črjódow zasydlenych. To je jedna mjenje hač w monitoringowym lěće 2022/2023. Ličba wostanje konstantna. K tomu je po cyłym Swobodnym staće hišće šěsć porikow, kotrež žanu kónčinu nimaja. Jich slědy pak fachowcy zawěsćichu. Monitoringowe lěto běži stajnje wot 1. meje hač do 30. apryla, kotrež so na biologiske wjelče lěto wusměrja. W 33 ze 43 sakskich teritorijow su fachowcy dorost zwěsćili. Cyłkownje drje je jich 106 młodźatow. 24 wjelkow je w zašłym monitoringowym lěće při wobchadnych njezbožach zahinyło. Štyri rubježne zwěrjata su we wobłuku wjelčeho managementa morili, dokelž wulke škody zawinowachu.
Raz hinaši šulski projekt
Ćěsliski dorost z Łužicy rjemjeslnisku wušiknosć a improwizaciski talent w Albaniskej dopokazał
W septembru smědźach ze šěsć dalšimi ćěslemi powołanskošulskeho centruma Lubij, našim wučerjom knjezom Schmiedom a kowarjom jězbu do Albanskeje nastupić. Z małym busom a připowěšakom połny grata jědźechmy 1 870 kilometrow z Budyšina přez wjacore kraje hač do wsy Zaroshkë. Tam saněrowachmy w nadawku European Heritage Volunteers třěchu sylnje wobškodźeneho hlinjaneho twara ze sćěnami z přirodnych kamjenjow. Tuta organizacija dobrowólnikow chce w Zaroshkë kontaktne městno za wšitkich na pomnikoškiće a historiskim twarjenju w regionje zajimowanych wutworić. Zdobom wotewri wona dobrowólnikam móžnosć, při wuporjedźenju twarskich pomnikow sobu skutkować. Non-profitowa organizacija European Heritage Volunteers stara so wo kulturne projekty w Europje – husto wo tajke, kotrež steja skerje mjenje w fokusu.
„Smój prosće super team!“
Kubłanske srjedźišćo UNESCO-geoparka nawjeduje pólsko-němske duwo
Před třomi lětami su zamołwići UNESCO-geoparka Mužakowski zahork Staru blidarnju we Łęknicy (serbsce: Wjeska) po saněrowanju, hromadźe z modernym přitwarom jako kulturny a kubłanski centrum wotewrěli. Zdobom je pólska wotnožka zarjadnistwa geoparka tehdy do Stareje cyhelnicy w Małym Kólsku (Klein Kölzig) přećahnyła. Nowu němsku wotnožku chcedźa bórze w Starym dwórnišću w Běłej Wodźe wotewrěć.
Powołanskej šćežce
Wot spočatka dźeržitej Pólka Agnieszka Janowska a Němka Paulina Skraba w kulturnym a kubłanskim centrumje wotežki zhromadnje w horšći. Agnieszka Janowska je na uniwersiće w Zielonej Górje wuměłstwo studowała a z masterom zakónčiła. Paulina Skraba je swój studij financow a zličbowanja na priwatnej wysokej šuli we Wrócławju z bachelorom zakónčiła. Wobě žonje bydlitej w Łęknicy.
Přetrjebarjo měli dalnoćopłotu zapłaćić móc
Wuskidź (AK/SN). Ze zhromadnym wozjewjenjom nastupajo přichodne zastaranje z dalnoćopłotu su so Běłowodźanske měšćanske zawody, město Grodk a Wojerowske zastaranske zawody tzwr na politikarjow w kraju a zwjazku wobroćili. Woni starosća so zastaranja regiona z dalnoćopłotu dla. Priorita hladajo na zaručenje spěchowanskich srědkow a financowanje dyrbjeli socialnje znjesliwe płaćizny, spěšne jednanja za schwalenje naprawow kaž tež zaměrne komunalne planowanje ćopłoty a wutwar infrastruktury być. Na posedźenju Łužiskeho koła we Wuskidźi tele dny su třo jednaćeljo Katrin Bartsch (Měšćanske zawody Běła Woda tzwr), Wolf-Thomas Hendrich (zastaranske zawody Wojerecy tzwr) a Michael Schiemenz (měšćanske zawody Grodk tzwr) tajke wozjewjenje podpisali. Dokument je nuzny apel politikarjam.
Móst dospołnje zwottorhaja
Drježdźany (SN/bn). Potorhanje Carolineho mosta w Drježdźanach, kotryž bě so spočatk septembra z nadal njejasnych přičin zdźěla sypnył, tuchwilu wysokeho pegela Łobja dla njepokročuje, prowizoriska twarska dróha při rěce je přepławjena. Jeničce łódźny bager je aktualnje aktiwny, kaž z radnicy sakskeje stolicy rěka. Přiwšěm maja so dźěła hač do kónca toho lěta zakónčić. Dźensa chce dr. Steffen Marx z Techniskeje uniwersity Drježdźany we wobłuku wurjadneho posedźenja wuběrka za wuwiće města, twarstwo, wobchad a ležownosće fachowy posudk předstajić, kotryž je w nadawku města zdźěłał, a wo aktualnym stawje informować. Město chce analyzu zjawnosći sčasom spřistupnić.
Prawdźepodobnje ma so móst dospołnje zwottorhać, dokelž buštej jězdnje hišće stejaceju wotrězkow twara přejara wobškodźenej. Nimo toho dwěluja eksperća „zasadnje na nošnosći wocloweje konstrukcije“. Wotpowědne pokazki šěrja dźenikaj Dresdener Neueste Nachrichten a Sächsische Zeitung kaž tež rozhłosowy sćelak MDR, wšitcy złožiwši so na městu bliske žórła.
Zasadźuja so za sprawnu Łužicu
Na kónčnu zličbowanku so nětko hižo wjesela
Zły Komorow (AK/SN). Za campingowarjow a wobsedźerjow bydlenskich mobilow Złokomorowski jězor woblubowany dowolowy cil wostanje. To aktualne ličby sezony 2024 wotbłyšćuja, rozkładźe Dana Hüttner ze zaměroweho zwjazka Łužiska jězorina Braniborska. „Z něhdźe 70 000 dowolowymi hosćimi prawdźepodobnje něhdźe dźewjeć procentow wjace porno lońšemu docpějemy“, nowinska rěčnica zwjazka nadźijepołna do so nachilaceje sezony rozkładźe. „Runje tak ličba přenocowanjow přiběra a drje prěni króć nad 300 000 leži. To woznamjenja něhdźe sydom procentow wjace hač loni.“
W bilancy zaměrowy zwjazk prózdninske domy w parku za swójby, přibrjóžnym hotelu Złokomorowskeho jězora, přistawnym campje, campingowanišću w Bukojnje hač do oktobra bilancowaše. Po měsacomaj nowember a december móža zamołwići potom doskónčnu zličbowanku zhotowić, kotraž budźe lětsa lěpša hač loni.
Łužica w lěće 2030 „zeleny region“?
Wuskidź (AK/SN). Łužica měła při zwoprawdźenju komunalnych projektow w zwisku ze změnu strukturow spěšnišo dźěłać. „Njeńdźe jenož wo to, znamjenja wutworić, ale dyrbimy fakty předpołožić“, podšmórny Grodkowska měšćanostka a rěčnica Łužiskeho koła Christine Herntier we Wuskidźi. Tam zetkachu so minjeny štwórtk zastupjerjo Łužiskeho koła. Při tym sej wona mjenje běrokratije nastupajo přizwolenske jednanja, sylnišu podpěru zwjazkoweju krajow a sprawne zhromadne dźěło z energijowym koncernom LEAG žadaše. „Bohužel,“ tak rěčnica dale rozkładźe, „njeje so namjet Łužiskeho koła hladajo na wosebite financielne srědki za komuny přiwzał. Tohorunja njeje za komuny a wobydlerjow spomóžne, zo so rozdźělenje spěchowanskich srědkow dlije.“
Sakske hodowne wiki w Romje
Rom (SN). Sakska ministerka za kulturu a turizm Barbara Klepsch (CDU) je wot wčerawšeho do jutřišeho w Romje. Ju přewodźa delegacija z 25 ludźimi. Wjeršk jězby je wotewrjenje sakskich adwentnych wikow w italskej stolicy. „Swobodny stat je hodowny kraj a naše hodowne wiki su wažne kulturne a turistiske wjerški. Wjeselu so jara, zo móžemy zhromadnje z našej ewangelskej wosadu a kampanju ,So geht sächsisch’ prěnje sakske adwentne wiki w Romje wotewrěć“, ministerka zwurazni. Nimo regionalnych chłóšćenkow dožiwja wopytowarjo tam tež koncerty bywšich čłonow chóra Thomanerow a sobustawow Collegiuma Zhomanum. Zdobom chce Barbara Klepsch Ochranowsku hwězdu fararjej ewangelskeje wosady w Romje Michaelej Jonasej přepodać. „Z hwězdu přinjesemy wažny symbol sakskeje hodowneje tradicije do Wěčneho města. Hwězda je symbol wěry, zhromadnosće, tradicije a nadźije. Runje to ma dźensniši čas wulki wuznam.“
W delegaciji su zastupjerjo politiki, zarjadnistwa, hospodarstwa a wědomosće. Dalša přičina wopyta je, zwiski mjez Sakskej a kónčinu Latium zesylnić.
