Lětsa hišće wjacore wiki planowane
Lipsk (dpa/SN). Po dołho trajacym lockdownje, jako běchu nimale wšitke zarjadowanja wotprajene, su wone nětko zaso dowolene. W Sakskej, Durinskej a Saksko-Anhaltskej tuž hač do kónca lěta wjacore podawki planuja. Kaž naprašowanje powěsćernje dpa wujewja, je lětsa hišće tójšto wikow, kongresow a dalšich předwidźanych. Přiwšěm poskićerjo ze skerje łahodnym polěpšenjom situacije liča, čehoždla njemóža zarjadowanja tak prawje přihotować. Woni tuž politikarjow namołwjeja, skónčnje planowansku wěstotu podawkow zmóžnić a mjez druhim jenake prawidła we wšitkich zwjazkowych krajach zaručić.
W Sakskej su hižo wot junija wiki a kongresy zaso dowolene. Lipšćanske wiki maja lětsa něhdźe 120 zarjadowanjow předwidźane. Po lońšej nuzowej přestawce planuja w septembru přehladce Cadeaux a Midora. Tam pak liča z jeničce třećinu hewak normalneho wobrota, a tak budźe to za branšu znowa ćežke lěto.
Romantika na ležacej Eiffelowej wěži
Zły Komorow (SN/BŠe). Łužiska jězorina wita runje nětko w lěću hosći zbliska a zdaloka, zo bychu sej ju wotkrywali. Pohórnistwowy region so dale a bóle měnja a ma mjeztym tójšto dožiwjenjowpołnych poskitkow. Ći, kotřiž swój dowol trajaceje pandemije dla doma přežiwjeja, abo ći, kotřiž Łužicu wopytaja, móža so nad mnohimi atrakcijemi wjeselić.
Łužiska jězorina wabi mjeztym ze sloganom, zo njetrjebaš ekstra do Parisa jěć, chceš-li romantiski wječor dožiwić. Na bywšim wuwoznym mosće F 60, kotryž dźensa ležacu Eiffelowu wěžu Łužicy mjenuja, móžeš rjane hodźinki přežiwić. W nocy je metalowy konstrukt přidatnje wobswětleny, tak zo skići wón zajimawy napohlad. Wječor hodźa so nimo toho ekskluziwne wodźenja, ale tež romantiske hodźiny při zhromadnej wječeri rezerwować.
Čěska z přikładom
Z błudnymi idejemi nowe puće kročić
Lubin (SN/BŠe). Błótowske towarstwo chce so zaměrnje za skutkowne wuwiće kónčiny zasadźeć, kotraž je tež jako Leaderowy region Błóta-plus woznamjenjena. Tak chce so tež wo pjenjezy přichodneje spěchowanskeje periody wot lěta 2023 do 2027 z hornca Europskeje unije požadać. W minjenej dobje wšak je so z pomocu 25,15 milionow z programa Leader a 13,5 milionow eurow ze zhromadneho nadawka k polěpšenju agrarneje struktury wjele zeskutkowniło. Cyłkownje 130 projektam su zamołwići spěchowanske srědki přizwolili.
We wobłuku „regionalne hódnoty a kwalita“ je projekt pod hesłom „pjekarska błudnosć“ pjenjezy dóstało. Štož trochu błudnje klinči, pak ma směrodajnu zakładnu ideju. W nowej pječerni chcedźa zhotowjenske procesy wužiwać, při čimž tak mało resursow kaž móžno přetrjebaja. „Z trochu zbožom produkujemy hižo wot klětušeho kompletnje bjez wuhlikoweho dioksida“, rozłožuje Philipp Fumfahr, kiž pjekarsku tradiciju we Wětošowje (Vetschau) wobchowuje.
Přistup wšitkim
Zhorjelc (SN/BŠe). Sakske knježerstwo přewostaji tež za lěto 2022 zaso pjenjezy za inwesticiski projekt bjezbarjerneho twarjenja pod hesłom „Najlubše městna za wšitkich“. W Budyskim a Zhorjelskim wokrjesu wotpowědny krajnoradny zarjad zajimcow namołwja so wo spěchowanske srědki požadać. Zaměr projekta je, zbrašenym ludźom wolóžić přistup do zjawnych twarjenjow abo zarjadnišćow a wobstejace zadźěwki wotstronić. Tež mjeńše inwesticije, kaž na přikład lóši přistup k lěkarskim praksam, chce sakske socialne ministerstwo spěchować.
„Zamkar dyrbi hotowy allrounder być“
Po politiskim přewróće su mnozy składnosć wužili a so zesamostatnili. Mjeztym móža woni na 30lětne wobstaće swojeho zawoda zhladować. Jedna z tychle firmow je Suchec awtowa zamkarnja w Róžeńće.
Róžant (SN/MWj). Nic kaž zwučene zynki awtow a motorskich su minjeny pjatk pola Suchec w Róžeńće słyšeć byli, ale wólna bjesada mnohich zajimowanych wjesnjanow a zajimcow z druhich kónčin. Woni běchu přišli gratulować k 30lětnemu wobstaću znateje a woblubowaneje jězdźidłoweje zamkarnje. Wjele zbožopřećow a słowo dźaka móžachu załožer firmy Jan Suchi, jeho syn a dźensniši šef Enrico kaž tež štyrjo dalši přistajeni přijimać.
Hižo za čas NDR je Jan Suchi doma po swjatoku Trabije, Wartburgi a motorske typa MZ porjedźał. Dokelž na jeho dźěłowym městnje w Kamjencu hižo dosć dźěła njebě, wón swój wotpohlad zwoprawdźi a so 1991 zesamostatni. Za to trjebaše wosebitu dowolnosć, dokelž tehdom hišće žane mišterske wukubłanje njeměješe. Te je 1994 nachwatał. Runočasnje je nowa zamkarska hala nastała. Wot wšeho spočatka syn Enrico nanej pomhaše, krok po kroku přistajichu dalšich ludźi.
Šansy na wukubłanje dale dobre
Wšitkim młodostnym, kotřiž chcedźa lětsa hišće powołanske wukubłanje zahajić, wjele chwile wjace njezwostanje. Kotre pak je prawe powołanje? Tu móže powołanske poradźowanje pomhać.
Budyšin (SN/at). Wulke prózdniny šulscy wotchadnicy wužiwaja, zo bychu swój zastup do powołanskeho wukubłanja rjadowali. Kaž Budyska wotnožka agentury za dźěło w zwisku z rozprawnistwom wo połoženju na wuchodosakskich dźěłowych wikach w juliju rozprawja, pyta tuchwilu 972 młodostnych z pomocu powołanskeho poradźowanja a młodźinskeju powołanskeju agenturow Budyšin a Zhorjelc swój start do powołanskeho žiwjenja. Tomu napřećo steji 1 123 njewobsadźenych městnow. Z wida agentury za dźěło a poskićowacych předewzaćow su šansy, hišće wukubłanske městno namakać, poprawom dobre.
Połoženjeso dale polěpša
Budyšin (SN). We wuchodnej Sakskej je w juliju 17 620 bjezdźěłnych, 316 resp. 1,8 procentow mjenje hač w juniju. Kwota bjezdźěłnosće je na 6,4 procenty spadnyła. Přiwšěm je kwota wyša hač do koronapandemije. W juliju 2019 wučinješe wona 6,0 procentow, kaž Budyska wotnožka Zwjazkoweje agentury za dźěło dźensa informuje.
„Powólnjenje koronaprawidłow a přiběraca potrjeba dźěłowych mocow stej k tomu wjedłoj, zo je bjezdźěłnosć w juliju dale woteběrała. Štóž bě hižo do započatka koronapandemije bjezdźěłny abo jenož mało kwalifikowany, tomu je tež dale ćežko so na dźěłowe wiki dóstać. Prěnjorjadnje pytaja fachowcow. Tohodla su kwalifikacije, kotrež wjedu k wotzamknjenju powołanja, wosebje wažne, zo bychu nowe dźěłowe šansy nastali“, piše předsydka jednaćelstwa Budyskeje agentury Kathrin Groschwald.
W juliju je serwis za dźěłodawarjow 1 024 nowych městnow, dwěsćě (plus 24,3 procenty) wjace hač w juliju 2020 kaž tež 90 dźěłowych městnow wjace (plus 9,6 procentow) hač w juliju 2019 aktiwěrował.
Twornja za ICE
Choćebuz (SN). Nowa twornja za hladanje ćahow typa ICE w Choćebuzu je prěnje wulke předewzaće, financowane na zakładźe zwjazkoweho zakonja wo skrućenju strukturow. Předstejićel Němskeje železnicy (DB) Richard Lutz a předsyda wotrjada DB za infrastrukturu Ronald Pofalla staj wotpowědne plany dźensa w Choćebuzu předstajiłoj. Wosebitaj hosćej prezentacije běštaj zwjazkowy minister za financy Olaf Scholz a ministerski prezident Braniborskeje Dietmar Woidke (wobaj SPD).
